समाचारहरू

पुस २ गते ७ सय ७६ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ५१ हजार ६ सय ९२ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ६ हजार ५ सय ८८ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ४० हजार ३ सय ६३ जना निको भएका छन् । पुस २ गते ९ सय ४७ जना निको भएका छन् भने निको हुनेको दर ९५.५ प्रतिशत रहेको मन्त्रालयले जनाएको छ । पुस २ गतेसम्म १ हजार ७ सय ४९ जना कोभिड सङ्क्रमितको मृत्यु भएको मन्त्रालयले जनाएको छ । मृत्यु भएकामध्ये ५ सय २३ जना (३० प्रतिशत) महिला र १ हजार २ सय २६ जना (७० प्रतिशत) पुरुष छन् । ९ हजार ५ सय ८० जना सक्रिय सङ्क्रमित रहेकामा ५ हजार ८ सय ८३ जना होम आइसोलेशनमा छन् । उपचाररतमध्ये २ सय ८१ जनाको उपचार आइसीयूमा र ५९ जनाको उपचार भेण्टिलेटरमा भइरहेको छ । मन्त्रालयका अनुसार मनाङमा सक्रिय सङ्क्रमित छैनन् भने काठमाडौँ, ललितपुर र कास्कीमा ५ सयभन्दा बढी सक्रिय सङ्क्रमित छन् ।

कर्णाली प्रदेश
सल्यान प्रतिनिधि मिना बुढाथोकीका अनुसार पीसिआर परीक्षणका लागि सङ्कलन गरिएको तीन जना सर्वसाधारको स्वाब सुर्खेतसम्म पुर्‍याउन आर्थिक अभाव हुँदा मङ्सिर २८ गतेदेखि अस्पतालमै थन्किएको छ । स्वास्थ्य सेवा कार्यालयमा सङ्कलन गरिएको स्वाब कोरोना परीक्षण केन्द्र सुर्खेतसम्म पठाउन यातायातका लागि दिनु पर्ने रकम अभाव हुँदा समस्या भएको स्वास्थ्य सेवा कार्यालय सल्यानका कोरोना फोकल पर्सन रिखाराम पुनले बताउनुभयो । स्वास्थ्यका लागि सक्षम प्रणाली नामक संस्थाले महिनाको दुईपटक स्वाब पठाउनका लागि यातायात खर्च व्यहोर्ने भए पनि सो रकम पनि पर्याप्त नभएको उहाँको भनाइ छ । उहाँले भन्नुभयो–‘एउटा गाडीले सुर्खेतसम्म पुगेको ७ हजार ५ सय रुपियाँ लिन्छ तर संस्थाले ७ हजार रुपियाँ मात्र पठाउने गर्छ ।’ अस्पतालको एम्बुलेस पनि बिग्रिएर करिब ९ महिना अघिदेखि थन्किएको र अस्पतालको गाडी समेत निकै पुरानो हुँदा सङ्कलन गरिएको स्वाब समयमै परीक्षण गराउन नसकेको अस्पतालले जनाएको छ । कतिपय अवस्थामा स्थानीय तहहरूसँग समन्वय गरेर स्वाब पठाउने गरेपनि सरकारले नै कोरोनाको लक्षण देखिएमा स्वाब सङ्कलन गर्नु भनेपछि स्थानीय तहहरूले पनि नियमित स्वाब सङ्कलन नगर्ने गरेको स्वास्थ्य सेवा कार्यालय प्रमुख दशरथ श्रेष्ठले बताउनुभयो ।

अनलाइन डेस्क