समाचारहरू

मङ्सिर ३० गते ९ सय ३६ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ५० हजार १ सय ८० पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ७ हजार १ सय १७ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ३८ हजार ५ सय ६९ जना निको भएका छन् । मङ्सिर ३० गते १ हजार ९ सय ९६ जना निको भएका छन् भने निको हुनेको दर ९५.३ प्रतिशत रहेको मन्त्रालयले जनाएको छ । मङ्सिर ३० गतेसम्म १ हजार ७ सय ३० जना कोभिड सङ्क्रमितको मृत्यु भएको मन्त्रालयले जनाएको छ । ९ हजार ८ सय ८१ जना सक्रिय सङ्क्रमित रहेकामा ६ हजार १ सय ३ जना होम आइसोलेशनमा छन् । उपचाररत ३ हजार ७ सय ७८ जनामध्ये ३ सय २१ जनाको उपचार आइसीयूमा र ४८ जनाको उपचार भेण्टिलेटरमा भइरहेको छ । मन्त्रालयका अनुसार मनाङमा सक्रिय सङ्क्रमित छैनन् भने काठमाडौँ, ललितपुर र कास्कीमा ५ सयभन्दा बढी सक्रिय सङ्क्रमित छन् ।

कर्णाली प्रदेश
सल्यान प्रतिनिधि मिना बुढथोकीका अनुसार कपुरकोट गाउँपालिकास्थित एक विद्यालयका आठ जना शिक्षकमा कोभिड सङ्क्रमण पुष्टि भएपछि विद्यालय बन्द गरिएको छ । सङ्क्रमित शिक्षकमध्ये दुई जनामा लक्षण समेत देखिएको छ । विद्यालयमा अध्ययनरत बालबालिकाबाट समुदायमा सङ्क्रमण फैलन सक्ने भन्दै मङ्सिर २८ गतेदेखि पुस १० गतेसम्मका लागि विद्यालय बन्द गरिएको गाउँपालिकाले जनाएको छ । विद्यालयका प्रध्यानाध्यापकका अनुसार मङ्सिर ७ गते देखि विद्यालय सञ्चालनमा आएको थियो । विद्यालयमा ९ सय ५० जना विद्यार्थी अध्ययनरत छन् । सामुदायिक विद्यालयका शिक्षकहरूमा कोभिड देखिएपछि पठनपाठन अनिश्चित बनेको गाउँपालिकाको शिक्षा शाखा प्रमुख कृष्ण भण्डारीले बताउनुभयो ।

अनलाइन डेस्क