समाचारहरू

मङ्सिर २९ गते ८ सय २१ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ४९ हजार २ सय ४४ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ५ हजार ४ सय २३ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ३६ हजार ५ सय ७३ जना निको भएका छन् । मङ्सिर २९ गते ८ सय ४२ जना निको भएका छन् भने निको हुनेको दर ९४.९ प्रतिशत रहेको मन्त्रालयले जनाएको छ । मङ्सिर २९ गतेसम्म १ हजार ७ सय १६ जना कोभिड सङ्क्रमितको मृत्यु भएको मन्त्रालयले जनाएको छ । १० हजार ९ सय ५५ जनाको उपचार भइरहेको छ । ७ हजार ३ सय ४० जना होम आइसोलेशनमा छन् भने २ सय ७३ जनाको उपचार आइसीयूमा र ५४ जनाको उपचार भेण्टिलेटरमा भइरहेको छ । मन्त्रालयका अनुसार मनाङमा सक्रिय सङ्क्रमित छैनन् भने काठमाडौँ, ललितपुर र कास्कीमा ५ सयभन्दा बढी सक्रिय सङ्क्रमित छन् ।

सुदूरपश्चिम प्रदेश
अछाम प्रतिनिधि शिवराज ढुङ्गानाका अनुसार रामारोशन गाउँपालिकामा कार्यरत कर्मचारी र स्थानीयमा कोभिड सङ्क्रमण पुष्टि भएको भन्दै एक साताका लागि सील गरिएको छ । कोभिड सङ्क्रमण थप फैलावटबाट रोक्न मङ्सिर २९ गतेबाट पुस ५ गतेसम्मका लागि सील गरिएको गाउँपालिकाका निमित्त प्रमुख प्रशासकीय अधिकृत रामबहादुर भण्डारीले जानकारी दिनुभयो । खाद्यान्न, स्वास्थ्य र कोभिड–१९ सम्बन्धी सेवा तथा कार्य, विपद् र कार्यालयका अत्यावश्यक बाहेक बजार क्षेत्र, बैङ्क तथा वित्तीय संस्था, शैक्षिक संस्थालगायतमा सील गरिएको गाउँपालिकाले जनाएको छ । मङ्गलसेन नगरपालिका, पञ्चदेवल विनायक नगरपालिका, कमलबजार नगरपालिका र बान्नीगढी जयगढ गाउँपालिका यसअघि नै सील अवस्था छन् । अछाममा हालसम्म १ हजार ४ सय ७१ जना सङ्क्रमित पुष्टि भएकोमा चार जनाको मृत्यु र ३ सय जना सक्रिय सङ्क्रमित छन् ।

अनलाइन डेस्क