समाचारहरू

भदौ १२ गते १ सय ६४ जनामा कोभिड-१९ को सङ्क्रमण पुष्टि भएसँगै सङ्क्रमितको सङ्ख्या ९ लाख ९६ हजार ८ सय ३४ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा २ हजार ६४ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ९ लाख ८१ हजार ५ सय २१ जना निको भएका छन् । भदौ १२ गते ४ सय ६२ जना निको भएका छन् भने निको हुनेको दर ९८.५ प्रतिशत रहेको मन्त्रालयले जनाएको छ । सक्रिय सङ्क्रमितको सङ्ख्या ३ हजार ३ सय १३ रहेको छ ।

भदौ १२ गतेसम्म १२ हजार जना कोभिड सङ्क्रमितको मृत्यु भएको मन्त्रालयले जनाएको छ । भदौ १२ गते एक जना कोभिड सङ्क्रमितको मृत्यु भएको मन्त्रालयले जनाएको छ । मन्त्रालयका अनुसार भदौ १२ गते १ हजार ७ सय ६९ ओटा स्वाब एण्टिजेन विधिबाट परीक्षण गरेकामा ३८ जनालाई कोभिड पुष्टि भएको छ । भदौ १२ गतेसम्म एण्टिजेन विधिबाट गरिएको परीक्षणमा १ लाख ५० हजार ३ सय ७० जनालाई कोभिड पुष्टि भएको छ । भदौ १२ गतेसम्म २ करोड १३ लाख १९ हजार ७ सय ९७ जनालाई पुर्ण खोप लगाइएको मन्त्रालयले जनाएको छ ।

इन्सेक रसुवा प्रतिनिधि हेमनाथ खतिवडाका अनुसार उत्तरगया गाउँपालिका–४ को विभिन्न टोलमा कोरोना सङ्क्रमण बढ्दै गएकोले स्थानीय तहले भदौ ५ गतेदेखि अनिश्चितकालीन समयका लागि विद्यालय बन्द गरिएको छ । विद्यालयमा पढ्ने बालबालिकामा सङ्क्रमण देखिएपछि गाउँपालिका तथा वडा कार्यालयले सूचना जारी गरेर विद्यालयहरु बन्द गरेको कर्मीडाँडा स्वास्थ्य चौकीका स्वास्थ्य सहायक बलराम न्यौपानेले बताउनु भयो । एकै दिन १९ जना बालबालिकामा कोभिड–१९ को सङक्रमण पुष्टि भएसँगै विद्यालय बन्द गरिएको हो । स्वाब एण्टिजेन विधिबाट परीक्षण गर्दा धेरैमा कोभिड–१९ देखिएको छ भने लक्षण देखिएपछि परीक्षण गराउने भन्दा घरमै आराम गरेर बसेका धेरै छन् न्यौपानेले भन्नुभयो । यस वडामा मालिकादेवी आधारभूत, ढुङ्गे आधारभूत, भूवनेश्वरी आधारभूत र नवविजयी महेन्द्र मावि रहेका छन् ।

उत्तरगया गाउँपालिका–४ का नागरिकहरूलाई भदौ ५ गते सूचना जारी गर्दै कोरोना सङ्क्रमण बढ्दै गएकोले कोरोना संक्रमणको लक्षण देखिएका सवैलाई बाहिर ननिस्कन र स्वास्थ्य संस्थामा सम्पर्क राख्न अनुरोध गरेको वडा अध्यक्ष अमर बुलुनले बताउनु भयो । जिल्लाभर ३५ जना कोरोना सङ्क्रमित रहेकोमा कालिका गाउँपालिकामा तीन जना र उत्तरगया गाउँपालिकामा ३२ जनामा कोरोना सङ्क्रमण देखिएको र सबैजना होम आइसोलेशनमा रहेको स्वास्थ्य कार्यालय रसुवाको प्रतिवेदनमा उल्लेख छ ।

अनलाइन डेस्क