समाचारहरू

मङ्सिर २६ गते १ हजार ४४ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ४६ हजार ६ सय ९४ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ७ हजार ४ सय १४ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ३२ हजार ८ सय ७२ जना निको भएका छन् । मङ्सिर २६ गते १ हजार २ सय ७१ जना निको भएका छन् भने निको हुनेको दर ९४.४ प्रतिशत रहेको मन्त्रालयले जनाएको छ । मङ्सिर २६ गतेसम्म १ हजार ६ सय ७४ जना कोभिड सङ्क्रमितको मृत्यु भएको मन्त्रालयले जनाएको छ । १२ हजार १ सय ४८ जनाको उपचार भइरहेको छ । ७ हजार ३ सय ४१ जना होम आइसोलेशनमा छन् भने ३ सय १० जनाको उपचार आइसीयूमा र ५० जनाको उपचार भेण्टिलेटरमा भइरहेको छ । मन्त्रालयका अनुसार मनाङ र डोल्पामा सक्रिय सङ्क्रमित छैनन् भने काठमाडौँ, ललितपुर र कास्कीमा ५ सयभन्दा बढी सक्रिय सङ्क्रमित छन् ।

सुदूरपश्चिम प्रदेश
दार्चुला प्रतिनिधि नरेन्द्रसिंह कार्कीका अनुसार लेकम गाउँपालिकाका एक जना कर्मचारी तथा वडा नम्बर ४ का एक जना शिक्षकमा कोभिड सङ्क्रमण पुष्टि भएपछि लेकम गाउँपालिकाको कार्यालय मङ्सिर २६ गतेदेखि सात दिनका लागि बन्द गरिएको छ । समुदायस्तरमा कोभिड फैलिन सक्ने सम्भावनालाई मध्यनजर गरेर एक साताका लागि सेवा प्रवाह बन्द गर्ने निर्णय गरिएको प्रमुख जिल्ला अधिकारी शरदकुमार पोखरेलले जानकारी दिनुभयो ।

अछाम प्रतिनिधि शिवराज ढुङ्गानाका अनुसार कोभिड सङ्क्रमण समुदायमा फैलने क्रम रहेको भन्दै नियन्त्रणका लागि बान्नीगढी जयगढ गाउँपालिका मङ्सिर २६ गतेबाट १० दिनका लागि सील गरिएको छ । गाउँपालिकाका अत्यावश्यक सेवा बाहेक पूर्ण रुपमा बन्द गरिएको प्रमुख प्रशासकीय अधिकृत शैलेशराज ढुङ्गानाले जानकारी दिनुभयो । बान्नीगढी जयगढ गाउँपलिकामा हालसम्म १ सय ४८ जनामा कोभिड पुष्टि भएकोमा दुई जनाको मृत्यु भइसकेको छ । सदरमुकाम मङ्गलसेन नगरपालिका, पञ्चदेवल विनायक नगरपालिका र कमलबजार नगरपालिका यसअघि नै सील अवस्थामा छन् । अछाममा हालसम्म १ हजार ४ सय ७१ जना सङ्ंक्रमण पुष्टि भएकोमा चार जनाको मृत्यु भएको छ भने अहिले ३ सय जना सक्रिय सङ्क्रमित छन् ।

अनलाइन डेस्क