समाचारहरू

साउन २३ गते ४ सय ९८ जनामा कोभिड-१९ को सङ्क्रमण पुष्टि भएसँगै सङ्क्रमितको सङ्ख्या ९ लाख ९० हजार ६ सय २५ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा २ हजार ८ सय ६२ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ९ लाख ७२ हजार ९ सय ६७ जना निको भएका छन् । साउन २३ गते ४ सय ७३ जना निको भएका छन् भने निको हुनेको दर ९८.२ प्रतिशत रहेको मन्त्रालयले जनाएको छ । सक्रिय सङ्क्रमितको सङ्ख्या ५ हजार ६ सय ८६ रहेको छ ।

साउन २३ गतेसम्म ११ हजार ९ सय ७२ जना कोभिड सङ्क्रमितको मृत्यु भएको मन्त्रालयले जनाएको छ । साउन २३ गते एक जना कोभिड सङ्क्रमितको मृत्यु भएको मन्त्रालयले जनाएको छ । मन्त्रालयका अनुसार साउन २३ गते २ हजार ४ सय ८९ ओटा स्वाब एण्टिजेन विधिबाट परीक्षण गरेकामा ४ सय ३६ जनालाई कोभिड पुष्टि भएको छ । साउन २३ गतेसम्म एण्टिजेन विधिबाट गरिएको परीक्षणमा १ लाख ४५ हजार ४७ जनालाई कोभिड पुष्टि भएको छ । साउन २३ गतेसम्म २ करोड ६ लाख ३६ हजार ८ सय ४४ जनालाई पुर्ण खोप लगाइएको मन्त्रालयले जनाएको छ ।

भोजपुर प्रतिनिधि गणेश विष्टका अनुसार विद्यार्थीहरूमा कोभिड–१९ को सङ्क्रमण पुष्टि भएपछि टेम्केमैयुङ गाउँपालिकाका दुई ओटा विद्यालय बन्द गरिएको छ । टेम्केमैयुङ गाउँपालिका-३ को अन्नपूर्ण वाघधन रणदीपा राई माध्यमिक विधालय र छाङछाङ आधारभूत विद्यालयको पठनपाठन बन्द गरिएको छ । माध्यमिक विद्यालयका चार जना विद्यार्थी र आधारभूत विद्यालयकी एक जना शिक्षिकासहित दुई जना विद्यार्थीमा कोभिड-१९ को सङ्क्रमण पुष्टि भएपछि साउन २३ गतेदेखि साउन २७ गतेसम्म विद्यालय बन्द गर्ने निर्णय गरिएको अन्नपूर्ण माध्यमिक विद्यालयका प्रधानाध्यापक डम्वर राईले बताउनु भएको छ ।

अनलाइन डेस्क