समाचारहरू

मङ्सिर २१ गते १ हजार ९६ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ४० हजार ९ सय ८१ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ६ हजार ४ सय ९५ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख २५ हजार ८ सय ५ जना निको भएका छन् । मङ्सिर २१ गते १ हजार ७ सय ५२ जना निको भएका छन् भने निको हुनेको दर ९३.७ प्रतिशत रहेको मन्त्रालयले जनाएको छ । मङ्सिर २१ गतेसम्म १ हजार ५ सय ९४ जना कोभिड सङ्क्रमितको मृत्यु भएको मन्त्रालयले जनाएको छ । १३ हजार ५ सय ८२ जनाको उपचार भइरहेको छ । ८ हजार ४ सय ६१ जना होम आइसोलेशनमा छन् भने ३ सय १३ जनाको उपचार आइसीयूमा र ५५ जनाको उपचार भेण्टिलेटरमा भइरहेको छ । मन्त्रालयका अनुसार मनाङ र डोल्पामा सक्रिय सङ्क्रमित छैनन् भने झापा, मोरङ, काठमाडौँ, ललितपुर, भक्तपुर र कास्कीमा ५ सयभन्दा बढी सक्रिय सङ्क्रमित छन् ।

सुदूरपश्चिम प्रदेश
अछाम प्रतिनिधि शिवराज ढुङ्गानाका अनुसार कोभिड सङ्क्रमण एक्कासी फैलन थालेको भन्दै नियन्त्रणका लागि मङ्गलसेन नगरपालिका र पञ्चदेवल विनायक नगरपालिका क्षेत्र मङ्सिर २१ गतेबाट एक साताका लागि सील गरिएको छ । सदरमुकामस्थित मङ्गलसेन नगरपालिकाका जनप्रतिनिधि र २० जना कर्मचारीसँगै गाउँमा कोभिड सङ्क्रमितको सङ्ख्या बढ्दो मात्रामा रहेकाले अत्यावश्यक सेवा बाहेकका सेवा मङ्सिर २७ गतेसम्म बन्द गरिएको निमित्त प्रमुख प्रशासकीय अधिकृत खकेन्द्रबहादुर सोडारीले जानकारी दिनुभयो । स्वास्थ्य, खाद्यान्न, कोभिड–१९ र विपद् व्यवस्थापनसम्बन्धी सेवा बाहेकमा सील गरिएको छ । तरकारी, दुध, खाद्यान्न बिहान ७ बजेदेखि १० बजेसम्म मात्र खुला गरिएको अधिकृत सोडारीको भनाइ छ ।
कमलबजार नगरपालिकाले कोभिड सङ्क्रमण फैलन नदिनका लागि दुई साताका लागि नगर क्षेत्र सील गरेको छ । अत्यावश्यक सेवा बाहेक अन्य क्षेत्र बन्द गर्ने गरेर मङ्सिर २२ गतेबाट लागु हुने गरेर पुस ४ गतेसम्म सील गरिएको नगरपालिकाका उपप्रमुख भूमिशरण ढकाल बजगाईंले जानकारी दिनुभयो । कमलबजार नगरपालिका सङ्कट व्यवस्थापन केन्द्रको निर्णय अनुसार कोरोना सङ्क्रमण थप फैलिन नदिनका लागि दुई साताका लागि सील गरिएको बताइएको छ । खाद्यान्न, तरकारीलगायत बिहान ७ बजेबाट १० बजे तीन घण्टा मात्र खुलाउने नगरपालिकाले जनाएको छ ।

अनलाइन डेस्क