कोभिड–१९ को सङ्क्रमणसम्बन्धी दैनिक अपडेट (मङ्सिर १५ गते)

मङ्सिर १५ गते १ हजार ४ सय ७४ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ३३ हजार ४ सय ५२ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ९ हजार ९ सय ११ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख १४ हजार ५ सय २१ जना निको भएका छन् । मङ्सिर १५ गते १ हजार ९ सय ३१ जना निको भएका छन् भने निको हुनेको दर ९१.९ प्रतिशत रहेको मन्त्रालयले जनाएको छ । मङ्सिर १५ गतेसम्म १ हजार ५ सय ८ जना कोभिड सङ्क्रमितको मृत्यु भएको मन्त्रालयले जनाएको छ । १७ हजार ४ सय २३ जनाको उपचार भइरहेको छ । ११ हजार ८ सय १४ जना होम आइसोलेशनमा छन् भने ३ सय ७५ जनाको उपचार आइसीयूमा र ५८ जनाको उपचार भेण्टिलेटरमा भइरहेको छ । मन्त्रालयका अनुसार मनाङ र डोल्पामा सक्रिय सङ्क्रमित छैनन् भने झापा, काठमाडौँ, ललितपुर, भक्तपुर, कास्की र रुपन्देहीमा ५ सयभन्दा बढी सक्रिय सङ्क्रमित छन् ।

सुदूरपश्चिम प्रदेश
दार्चुला प्रतिनिधि नरेन्द्र सिंह कार्कीका अनुसार अपिहिमाल गाउँपालिका–५ मकरीगाडमा निर्माणाधीन मकरीगाड हाइड्रोपावरमा कार्यरत दुई जना विदेशी नागरिकमा कोभिड सङ्क्रमण पुष्टि भएपछि वडामा निषेधज्ञा जारी गरिएको छ । मकरीगाड हाइड्रोपावरमा कार्यरत दुई जना श्रीलङ्कन नागरिकमा कोभिड पुष्टि भएको स्वास्थ्य कार्यालय दार्चुलाका सूचना अधिकारी खगेन्द्र कार्कीले जानकारी दिनुभयो । हाइड्रोपावरमा कार्यरत कर्मचारीमा कोभिड देखिएपछि अपिहिमाल गाउँपलिकाले वडाभर निषेधज्ञा जारी गरिदिन आग्रह गरेपछि जिल्ला प्रशासन कार्यालय दार्चुलाले मङ्सिर १४ गते बेलुकीबाट निषेधाज्ञा जारी गरेको हो । समुदायस्तरमा कोभिड फैलिन नदिन हाइड्रोपावरमा कार्यरत मजदुर र त्यस आसपासका व्यवसायीको स्वाब सङ्कलन गरेर रिपोर्ट नआउञ्जेलसम्मको लागि निषेधज्ञा जारी गरिएको प्रमुख जिल्ला अधिकारी शरदकुमार पोखरेलले बताउनुभयो ।


अनलाइन डेस्क