समाचारहरू

फागुन २९ गते ५० जनामा कोभिड-१९ को सङ्क्रमण पुष्टि भएसँगै सङ्क्रमितको सङ्ख्या ९ लाख ७७ हजार ९ सय ८७ पुगेको स्वास्थ्य तथा जनसङ्ख्या मन्त्रालयले जनाएको छ । फागुन ३० गते परीक्षण गरिएकामध्ये एक प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १७.९ प्रतिशतमा सङ्क्रमण पुष्टि भएको छ ।
गत २४ घण्टामा ३ हजार ५ सय ३९ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ९ लाख ६१ हजार २ सय १८ जना निको भएका छन् । फागुन ३० गते १ सय ४८ जना निको भएका छन् भने निको हुनेको दर ९८.३ प्रतिशत रहेको मन्त्रालयले जनाएको छ । फागुन ३० गतेसम्म ११ हजार ९ सय ५० जना कोभिड सङ्क्रमितको मृत्यु भएको मन्त्रालयले जनाएको छ । फागुन ३० गते कोभिड सङ्क्रमितको मृत्यु नभएको मन्त्रालयले जनाएको छ । सक्रिय सङ्क्रमितको सङ्ख्या ४ हजार ८ सय १९ रहेको छ ।
मन्त्रालयका अनुसार फागुन ३० गते १ हजार ८ सय ७९ ओटा स्वाब एण्टिजेन विधिबाट परीक्षण गरेकामा आठ जनालाई कोभिड पुष्टि भएको छ । फागुन ३० गतेसम्म एण्टिजेन परीक्षणबाट १ लाख ३९ हजार ९ सय ५० जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । फागुन ३० गतेसम्म १ करोड ८५ लाख २ हजार १ सय १९ जनालाई पुर्ण खोप लगाइएको मन्त्रालयले जनाएको छ ।

बागलुङ प्रतिनिधि सिर्जना पन्तका अनुसार जिल्लामा हालसम्म १८ वर्ष भन्दा माथिका ७७.६ प्रतिशतले पूर्ण खोप प्राप्त गरेको स्वास्थ्य कार्यालय बागलुङका खोप सुपरभाइजर राजु केसीले बताउँनुभयो । १८ वर्ष भन्दा माथिका १ लाख ७५ हजार २ सय ४ जनाले पहिलो मात्रा, १ लाख ६९ हजार १ सय ३८ जनाले दोस्रो मात्रा र २७ हजार ४ सय ५५ जनाले बुस्टर खोप लगाएको उहाँले बताउँनुभयो । १२ देखि १७ वर्ष सम्मका २९ हजार ५ सय ४३ जनाले पहिलो मात्रा, २२ हजार ५ सय ३७ जनाले दोस्रो मात्रा लगाएका छन् । स्वास्थ्य कार्यालयले जिल्लाका दश ओटै पालिकाका स्वास्थ्य संस्थामा हप्ताको दुई दिन सूचना जारी गर्दै नियमित रुपमा खोप अभियान सञ्चालन गरिरहेको छ ।

पर्वत प्रतिनिधि सन्तोष थापाका अनुसार जिल्लामा कोभिड–१९ विरुद्धको खोप अभियान अन्तर्गत जिल्लाको जम्मा जनसङ्ख्याको ६९.५ प्रतिशतले मात्रै कोभिड–१९ विरुद्धको पहिलो डोज प्राप्त गरेका छन् । जिल्लाको कुल जनसङ्ख्या १ लाख ४९ हजार ३ सय ४ मध्ये १ लाख २ हजार २ सय १६ जनाले कोभिडविरूद्धको खोप अभियानमा सहभागिता जनाएको स्वास्थ्य कार्यालय पर्वतका कोभिड फोकल पर्सन नारायण रेग्मीले जानकारी दिनुभयो ।  जस अन्तर्गत पर्वत मा १८ बर्ष माथिका ९७ हजार ९ सय १५ जनालाई पहिलो खोप लगाउने लक्ष्य लिएको भएपनि ८९ हजार ८ सय ८२ ले मात्रै पहिलो डोज प्राप्त गरे भने १८ बर्ष मुनिका १६ हजार ८ सय ३५ जनालाई खोप लगाउने लक्ष्य लिएकोमा १२ हजार ३ सय ३४ जनाले मात्रै खोप प्राप्त गरेका छन् । खोप प्रति नकरात्मक सन्देश गएका कारण पहिलो चरणको अभियानमा सहभागिता कम भएको र अहिले बिस्तारै खोप प्रति जनचेतना बढ्दै गएको उहाँले बताउनुभयो । पर्वतमा स्थानीय तहसङ्गै स्वास्थ्य कार्यालय र नेपाली सेनाले समेत खोप अभियान सञ्चालन गरिरहेको छ ।

अनलाइन डेस्क