समाचारहरू

मङ्सिर ७ गते १ हजार ६ सय ६९ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख २० हजार ३ सय ८ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ८ हजार ३२ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये १ लाख ९९ हजार २४ जना निको भएका छन् । मङ्सिर ७ गते ५ हजार ६ सय ९९ जना निको भएका छन् भने निको हुनेको दर ९०.३ प्रतिशत रहेको मन्त्रालयले जनाएको छ । मङ्सिर ७ गतेसम्म १ हजार ३ सय २१ जना कोभिड सङ्क्रमितको मृत्यु भएको मन्त्रालयले जनाएको छ । २० हजार १ सय ६६ जनाको उपचार भइरहेको छ । १३ हजार ६ सय १२ जना होम आइसोलेशनमा छन् भने ३ सय ५९ जनाको उपचार आइसीयूमा र ६६ जनाको उपचार भेण्टिलेटरमा भइरहेको छ ।

गण्डकी प्रदेश
कास्की प्रतिनिधि सुशन घिमिरेका अनुसार पोखरा महानगरपालिकाका जनप्रतिनिधिसहित केही कर्मचारीमा कोभिड–१९ सङक्रमण देखिएपछि मङ्सिर ७ गतेदेखि एक साताका लागि महानगरपालिकामा अत्यावश्यक बाहेकका सेवा बन्द गरिएको छ । प्रमुख प्रशासकीय अधिकृत महेश बरालका अनुसार मङ्सिर ४ गतेको महानगरपालिका कार्यपालिका वोर्डले अत्यावश्यक बाहेकका सेवा बन्द गर्ने निर्णय गरेको हो ।

कर्णाली प्रदेश
सल्यान प्रतिनिधि मीना बुढाथोकीका अनुसार जिल्ला प्रशासन कार्यालय सल्यानले प्रमुख व्यापारिक केन्द्र श्रीनगर बजारसहित आसपासको क्षेत्रमा गरिएको सील गरिएको अवधि बढाएको छ । गत कात्तिक २३ गतेदेखि २९ गतेसम्म पहिलो पटक र कात्तिक २९ गतेदेखि मङ्सिर ६ गतेसम्म दोस्रो पटक गरी १४ दिन सील गरेको प्रशासनले तेस्रो पटक मङ्सिर ७ गतेदेखि १० गतेसम्म समयावधि थपेको हो । कोभिड–१९ को जोखिम सम्भाव्यता र संवेदनशिलताको मुल्याङ्कन गरी मङ्सिर ७ गतेदेखि १० गतेसम्म सील अवधि थप गरिएको जिल्ला प्रशासन कार्यालय सल्यानद्वारा जारी विज्ञप्तिमा उल्लेख छ । सूचनामा वडा नम्बर १ को चैवाङ ज्यूला, शान्तिनगर, श्रीनगर बजार, छापडाँडा, दारिमचौर र पटनेरी, वडा नम्बर २ को जोगिदेउखोला र वडा नम्बर ६ को बरला आसपासका क्षेत्र सील गरिएको उल्लेख गरिएको छ ।
बागचौर नगरपालिका–१२ दोभान बजार अनिश्चितकालको लागि सील गरिएको छ । कोरोनाको लक्षणसहित स्थानीयमा सङ्क्रमण देखिएकाले वडा कार्यालयको निर्देशन र बजार व्यवस्थापन समितिको निर्णय बमोजिम आज मङ्सिर ६ गतेदेखि अनिश्चितकालको लागि सील गरिएको हो । पुर्वमा रोल्पाको सिमाना दर्का, पश्चिममा खौला, उत्तरमा रुकुम सुकिदह सिमाना र दक्षिणमा वडा नम्बर ११ को रातामाटा क्षेत्र भित्र सील गरिएको बजार व्यवस्थापन समितिका अध्यक्ष डिल्लीबहादुर वलीले जानकारी दिनुभयो ।

अनलाइन डेस्क