समाचारहरू

माघ २८ गते ६ सय ६६ जनामा कोभिड-१९ को सङ्क्रमण पुष्टि भएसँगै सङ्क्रमितको सङ्ख्या ९ लाख ७२ हजार १ सय ४१ पुगेको स्वास्थ्य तथा जनसङ्ख्या मन्त्रालयले जनाएको छ । माघ २८ गते परीक्षण गरिएकामध्ये चार प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १८.२ प्रतिशतमा सङ्क्रमण पुष्टि भएको छ । गत २४ घण्टामा १७ हजार ४ सय ४७ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ९ लाख ३२ हजार ८ सय २२ जना निको भएका छन् । माघ २८ गते २ हजार २ सय १५ जना निको भएका छन् भने निको हुनेको दर ९६ प्रतिशत रहेको मन्त्रालयले जनाएको छ । माघ २८ गतेसम्म ११ हजार ८ सय ७८ जना कोभिड सङ्क्रमितको मृत्यु भएको मन्त्रालयले जनाएको छ । माघ २८ गते १४ जना कोभिड सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २७ हजार ४ सय ४१ रहेको छ ।

मन्त्रालयका अनुसार माघ २८ गते ३ हजार ५ सय ४२ ओटा स्वाब एण्टिजेन विधिबाट परीक्षण गरेकामा ४ सय ६२ जनालाई कोभिड पुष्टि भएको छ । माघ २८ गतेसम्म एण्टिजेन परीक्षणबाट १ लाख ३६ हजार ९ सय ७३ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । माघ २८ गतेसम्म १ करोड ६१ लाख ५९ हजार ५ सय ७८ जनालाई पुर्ण खोप लगाइएको मन्त्रालयले जनाएको छ । मन्त्रालयका अनुसार मोरङ, सुनसरी, झापा, धनुषा, काठमाडौँ, ललितपुर, भक्तपुर, चितवन, काभ्रेपलाञ्चोक, कास्की, बाँके, रुपन्देही र कैलालीमा सक्रिय सङ्क्रमित ५ सयभन्दा बढी छन् ।

जुम्ला प्रतिनिधि मानदत्त रावलका अनुसार कनकासुन्दरी गाउँपालिकास्थित हाँडसिंजा स्वास्थ्य चौकीमा कार्यरत स्वास्थ्यकर्मीलाई कोभिड सङ्क्रमण देखिएपछि स्वास्थ्य चौकी फागुन २ गतेसम्मका लागि सील गरिएको छ । स्वास्थ्य चौकी इन्चार्ज विरेन्द्र उपाध्यायका अनुसार बर्थिङ सेन्टरबाहेकका सेवा बन्द गरी स्वास्थ्य चौकी सील गरिएको हो ।

अनलाइन डेस्क