समाचारहरू

मङ्सिर ६ गते १ हजार ६ सय ७४ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख १८ हजार ६ सय ३९ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ८ हजार १ सय ४४ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये १ लाख ९३ हजार ३ सय २५ जना निको भएका छन् । मङ्सिर ६ गते २ हजार ३ सय २३ जना निको भएका छन् भने निको हुनेको दर ८८.४ प्रतिशत रहेको मन्त्रालयले जनाएको छ । मङ्सिर ६ गतेसम्म १ हजार ३ सय ५ जना कोभिड सङ्क्रमितको मृत्यु भएको मन्त्रालयले जनाएको छ । २४ हजार ९ जनाको उपचार भइरहेको छ । १७ हजार २ सय ६ जना होम आइसोलेशनमा छन् भने ३ सय ३६ जनाको उपचार आइसीयूमा र ४७ जनाको उपचार भेण्टिलेटरमा भइरहेको छ ।

गण्डकी प्रदेश
गोरखा प्रतिनिधि हरिराम उप्रेतीका अनुसार गोरखा नगरपालिकाका भित्रका विद्यालयहरू मङ्सिर १५ गतेसम्म बन्द गरिएको छ । मङ्सिर ६ गते गोरखा नगरपालिकाले सूचना निकालेर नगर क्षेत्रमा कोभिड सङ्क्रमणको जोखिम कायम रहेकाले शैक्षिक संस्था बन्द हुने जनाएको हो । नगरपालिकाका प्रमुख प्रशासकीय अधिकृत दिनेशराज पन्तका अनुसार हाल नगर क्षेत्रमा शिक्षक, कर्मचारी र नगरवासी समेत ६५ जना सक्रिय सङ्क्रमित छन् ।
स्याङ्जा प्रतिनिधि तिलकुमारी थापाका अनुसार वालिङ नगरपालिकामा समुदाय स्तरमा कोभिड सङ्क्रमण बढेपछि एक साताका लागि जनस्वास्थ्य विपदको अवस्था घोषणा गरिएको छ । मङ्सिर ४ गते वालिङ नगरकार्यपालिकाले एक विज्ञप्ति जारी गरी मङ्सिर ५ गते राति १२ बजेदेखि मङ्सिर १२ गते जनस्वास्थ्य विपद अवस्था घोषणा गरी नगरपालिकामा अत्यावश्यक बाहेकका सेवा बन्द गरिएको नगरपालिकाका मेयर दिलिपप्रताप खाँणले इन्सेक प्रतिनिधिलाई जानकारी दिनुभयो । नगरपालिकामा रहेका १४ ओटै वडामा जनस्वास्थ्य विपदको अवस्था रहेकाले तोकिएका बाहेकका काम नगर्न नगरपालिकाले आग्रह गरेको छ ।

अनलाइन डेस्क