समाचारहरू

मङ्सिर ५ गते १ हजार ९ सय ५४ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख १६ हजार ९ सय ६५ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १० हजार ३ सय ४० ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये १ लाख ९१ हजार २ जना निको भएका छन् । मङ्सिर ५ गते थपिएका सङ्क्रमितभन्दा झण्डै तीन गुणा बढी ५ हजार ३ सय ६४ जना निको भएका छन् भने निको हुनेको दर ८८ प्रतिशत रहेको मन्त्रालयले जनाएको छ । मङ्सिर ५ गतेसम्म १ हजार २ सय ९८ जना कोभिड सङ्क्रमितको मृत्यु भएको मन्त्रालयले जनाएको छ । २४ हजार ६ सय ६५ जनाको उपचार भइरहेको छ । १९ हजार १४ जना होम आइसोलेशनमा छन् भने ४ सय ३ जनाको उपचार आइसीयूमा र ६३ जनाको उपचार भेण्टिलेटरमा भइरहेको छ ।

सुदूरपश्चिम प्रदेश
दार्चुला प्रतिनिधि नरेन्द्रसिंह कार्कीका अनुसार नेपाल विद्युत प्राधिकरण दार्चुला वितरण केन्द्रमा कार्यरत एक जना कोभिड सङ्क्रमित कर्मचारीको मृत्यु भएपछि नेपाल विद्युत प्राधिकरण दार्चुला वितरण केन्द्र अनिश्चितकालीन बन्द गरिएको छ । विद्युत प्राधिकरणमा कार्यरत ३० वर्षीय कर्मचारी पदम बडालको मृत्यु भएपछि मङ्सिर ३ गतेबाट विद्युत प्राधिकरणको कामकाज बन्द गरिएको हो । नेपाल विद्युत प्राधिकरण दार्चुलाको मंसिर ३ गतेबाट सम्पूर्ण कामकाज बन्द गरिएको विद्युत प्राधिकरण दार्चुला वितरण केन्द्रले जनाएको छ । कात्तिक ३० गते स्वाश्वप्रश्वासमा समस्या देखिएपछि धनगढी उपचारको लागि लैजाने क्रममा विद्युतमा कार्यरत कर्मचारीको बैतडीको सतबाँझमा मृत्यु भएको थियो । बैतडी अस्पतालको प्रयोशलामा गरिएको परीक्षणमा कोभिड पोजेटिभ देखिएपछि त्यसयता विद्युत कार्यालय सील गरिएको दार्चुला विद्युत प्राधिकरण दार्चुला वितरण केन्द्रका सूचना अधिकारी केशवदत्त भट्टले जानकारी दिनु भयो ।

अनलाइन डेस्क