समाचारहरू

माघ ९ गते ५ हजार ५ सय ९८ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ९ लाख १० हजार ३ सय ९४ पुगेको स्वास्थ्य तथा जनसङ्ख्या मन्त्रालयले जनाएको छ । माघ ९ गते परीक्षण गरिएकामध्ये ४२ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १७.८ प्रतिशतमा सङ्क्रमण पुष्टि भएको छ । गत २४ घण्टामा १३ हजार ३ सय ७७ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ८ लाख २१ हजार ६ सय ९९ जना निको भएका छन् । माघ ९ गते १ हजार ४ सय १६ जना निको भएका छन् भने निको हुनेको दर ९०.३ प्रतिशत रहेको मन्त्रालयले जनाएको छ । माघ ९ गतेसम्म ११ हजार ६ सय ५५ जना कोभिड सङ्क्रमितको मृत्यु भएको मन्त्रालयले जनाएको छ । माघ ९ गते चार जना कोभिड सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ७७ हजार ४० रहेको छ ।

मन्त्रालयका अनुसार माघ ९ गते ४ हजार ६० ओटा स्वाब एण्टिजेन विधिबाट परीक्षण गरेकामा ८ सय ६४ जनालाई कोभिड पुष्टि भएको छ । माघ ९ गतेसम्म एण्टिजेन परीक्षणबाट १ लाख १२ हजार ९ सय १३ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । माघ ९ गतेसम्म १ करोड २८ लाख ९८ हजार ९ सय २३ जनालाई पुर्ण खोप लगाइएको मन्त्रालयले जनाएको छ । मन्त्रालयका अनुसार मोरङ, सुनसरी, झापा, धनुषा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, कास्की, नवलपरासी पूर्व, बाँके, रुपन्देही र कैलालीमा सक्रिय सङ्क्रमित ५ सयभन्दा बढी रहेका छन् ।

बागलुङ प्रतिनिधि सिर्जना पन्तका अनुसार मालपोत कार्यालय बागलुङका कर्मचारीलाई कोभिड–१९ सङ्क्रमण पुष्टि भएपछि कार्यालयले माघ ९ गते सूचना प्रकाशन गरी अर्को सूचना नआएसम्म अत्यावश्यक बाहेकका सम्पुर्ण सेवा बन्द गरिएको मालपोत कार्यालय अधिकृत देवेन्द्रबहादुर थापाले जानकारी दिनुभएको छ ।

स्याङजा प्रतिनिधि तिलकुमारी थापाका अनुसार सहायक प्रमुख जिल्ला अधिकारी हरिप्रसाद शर्माले माघ ९ गते विज्ञप्ती जारी गर्दै जिल्ला प्रशासन कार्यालयका कार्मचारीहरूमा कोभिड–१९ सङ्क्रमण पुष्टि भएपछि कार्यालयबाट प्रदान गरिने अत्यावश्यक बाहेकका सम्पुर्ण सेवा माघ १० गतेदखि अर्को सूचना नआएसम्म बन्द गरिएको जानकारी दिनुभएको छ ।

पर्वत प्रतिनिधि सन्तोष थापाका अनुसार कुश्मा नगरपालिकामा कार्यरत १५ जना कर्मचारीमा कोभिड–१९ सङ्क्रमण पुष्टि भएपछि माघ ९ गतेदेखि माघ १६ गतेसम्मका लागि कार्यालय बन्द गरिएको नगरपालिकाका प्रमुख प्रशासकीय अधिकृत कुमानसिङ गुरुङले जानकारी दिनुभएको छ ।

प्युठान प्रतिनिधि रविन्द्र पाण्डेका अनुसार जिल्ला प्रशासन कार्यालयबाट प्रदान गर्ने अत्यावश्यक बाहेकका सेवा माघ ९ गतेदेखि माघ १५ गतेसम्म बन्द गरिएको छ । जिल्ला प्रशासन कार्यालयका दुई जना कर्मचारीमा कोभिड सङ्क्रमण देखिएपछि जिल्ला प्रशासन कार्यालयबाट प्रदान गर्ने सुरक्षालगायत अत्यावश्यक बाहेकका सेवा बन्द गरिएको सहायक प्रमुख जिल्ला अधिकारी मेघराज सोनीले बताउनु भयो ।

कैलाली प्रतिनिधि मैनामोति चौधरीका अनुसार गोदावरी नगरपालिकामा कार्यरत कर्मचारीमा कोभिड—१९ सङ्क्रमण देखिएपछि माघ ९ गतेदेखि माघ  १५ गतेसम्मका लागि नगरपलिकाबाट प्रवाह गरिने अत्यावश्यक सेवा बाहेकका सम्पूर्ण सेवा बन्द गरिएको गोदावरी नगरपालिकाका प्रमुख प्रशासकीय अधिकृत खेमराज विष्टले बताउनु भयो । यसैगरी जिल्ला प्रशासन कार्यालयमा कार्यरत १५ जना कर्मचारीहरुमा कोभिड सङ्क्रमण पुष्टि भएपछि सङ्क्रमणको जोखिमलाई  मध्यनजर गर्दै माघ ९ गतेदेखि अर्को सूचना  नआउँदासम्म शान्तिसुरक्षा र मुद्दा बाहेकका सम्पूर्ण सेवा बन्द गरिएको र अत्यावश्यक सेवा लिन आउनेहरुको हकमा स्वास्थ्य मापदण्डको पूर्णपालना गरिएको हुनु पर्ने र कोभिड—१९ विरुद्धको खोप कार्ड अनिवार्य लिएर आउनु पर्ने  जिल्ला प्रशासन कार्यालयका सूचना अधिकारी शिवराज जोशीले बताउनु भयो ।

दार्चुला प्रतिनिधि नरेन्द्रसिंह कार्कीका अनुसार जिल्ला अस्पताल, दार्चुलामा कार्यरत तीन जना स्वास्थ्यकर्मीमा कोभिड सङ्क्रमण पुष्टि भएपछि माघ ९ गतेदेखि अस्पतालको इमरजेन्सी बाहेकका अन्य स्वास्थ्य सेवाहरु बन्द गरिएको छ । जिल्ला अस्पताल, दार्चुलाका डाक्टर आर्दश लिम्बुका अनुसार कोभिड सङ्क्रमित बढ्दै गएपछि आइसोलेसनमा राख्नु पर्ने बिरामीहरुलाई मध्यनजर गर्दै इमरजेन्सी बाहेकका स्वास्थ्य सेवा बन्द गरिएको छ । अहिले दुई जना कोभिड सङ्क्रमित बिरामीको जिल्ला अस्पतालको आइसोलेसनमा राखेर उपचार भइरहेको र कोभिड सङ्क्रमितहरुको आइसोलेसन र ओपीडी सेवा परिसर नजिकै राखेर उपचार भइरहेकोले कोभिड सङ्क्रमणको जोखिमलाई मध्यनजर गर्दै सेवा बन्द गरिएको डाक्टर लिम्बुले बताउनु भयो । जिल्लामा कोभिडका सक्रिय सङ्क्रमित ७३ जना रहेका छन् । कोभिडको तेस्रो लहर आएयता जिल्लामा ८७ जनामा सङ्क्रमण पुष्टि भएको छ भने १४ जनालाई निको भएको छ । यसैगरी ओमिक्रोनको जोखिम बढ्दै गएपछि उच्च जोखिमलाई ध्यानमा राखेर कैदीबन्दी भेटघाटलाई बन्द गरेको जिल्ला कारागारका जेलर विरेन्द्रसिह धामीले जानकारी दिनु भयो ।

अनलाइन डेस्क