कोभिड–१९ को सङ्क्रमणसम्बन्धी दैनिक अपडेट (माघ ५ गते)

  ०७८ माघ ५ गते

माघ ५ गते ९ हजार ५ सय २ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ८ लाख ७७ हजार ७ सय १७ पुगेको स्वास्थ्य तथा जनसङ्ख्या मन्त्रालयले जनाएको छ । माघ ५ गते परीक्षण गरिएकामध्ये ५३ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १७.२ प्रतिशतमा सङ्क्रमण पुष्टि भएको छ । गत २४ घण्टामा १८ हजार ७८ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ८ लाख १८ हजार १ सय ६० जना निको भएका छन् । माघ ५ गते ६ सय १३ जना निको भएका छन् भने निको हुनेको दर ९३.१ प्रतिशत रहेको मन्त्रालयले जनाएको छ । माघ ५ गतेसम्म ११ हजार ६ सय २८ जना कोभिड सङ्क्रमितको मृत्यु भएको मन्त्रालयले जनाएको छ । माघ ५ गते चार जना कोभिड सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ४७ हजार ९ सय २९ रहेको छ ।

मन्त्रालयका अनुसार माघ ५ गते ५ हजार ३ सय ३१ ओटा स्वाब एण्टिजेन विधिबाट परीक्षण गरेकामा १ हजार ८ सय ५० जनालाई कोभिड पुष्टि भएको छ । माघ ५ गतेसम्म एण्टिजेन परीक्षणबाट १ लाख ५ हजार ८ सय ३३ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । माघ ५ गतेसम्म १ करोड २४ लाख ६६ हजार ९२ जनालाई पुर्ण खोप लगाइएको मन्त्रालयले जनाएको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, कास्की, बाँके, रुपन्देही र कैलालीमा सक्रिय सङ्क्रमित ५ सयभन्दा बढी रहेका छन् ।

इन्सेक प्रदेश १‚ कार्यालय विराटनगरका अनुसार कोरोना भाइरसको सङ्क्रमण बढेसँगै प्रदेश १‚ मा उपचारका लागि अस्पताल भर्ना हुने बिरामीको सङ्ख्या बढ्न थालेको छ । पछिल्लो पाँचदिनमा उपचारका लागि अस्पताल भर्ना हुने सङ्क्रमितको सङ्ख्या दोब्दर भन्दा बढीले वृद्धि भएको छ । प्रदेश सरकार सामाजिक विकास मन्त्रालयले सार्वजनिक गरेको तथ्याङ्क अनुसार पुस ३० गते अस्पतालमा भएको सङ्ख्याको तुलनामा माघ ५ गते अस्पतालमा भर्ना भएर उपचार गराउनेको सङ्ख्या दोब्बर बढीले वृद्धि भएको छ । पुस ३० गते प्रदेश १ का विभिन्न अस्पताहरूमा २३ जना सङ्क्रमितहरू उपचारका लागि भर्ना भएकामा माघ ५ गते त्यो सङ्ख्या बढेर ५६ जना पुगेको छ । अस्पतालमा उपचार गराउनेको सङ्ख्या बढेसँगै आइसीयू‚ एचडीयू र भेण्टिलेटरमा राखेर उपचार गराउने सङ्क्रमितहरूको सङ्ख्यापनि बढेको पाइएको छ । पुस ३० गते सार्वजनिक भएको विवरणमा उपचाररत २३ जनामध्ये भेण्टिलेटरमा चार जना थिए । माघ ५ गते आठ जनालाई भेण्टिलेटरमा राखेर उपचार गरिरहेको विवरण मन्त्रालयले सार्वजनिक गरेको छ । पाँच दिनको अवधिमा भेण्टिलेरमा राखेर उपचार गर्नुपर्ने बिरामी दोब्बरले बढेको पाइएको हो ।

प्रदेश १ का विभिन्न १० ओटा अस्पतालहरूमा कोभिडका बिरामी भर्ना भएर उपचार गराइरहेको पाइएको छ । सबैभन्दा धेरै विराटनगरस्थित विराट मेडिकल कलेज एण्ड टिचिङ अस्पतालमा १९ जना उपचाररत छन् । विराट नर्सिङमा १८ जनाको उपचार एचडीयूमा राखेर भइरहेको छ । एक जनालाई आइसीयूमा राखिएको छ । प्रदेश सरकारले स्थापना गरेको कोसी कोभिड अस्पतालमा १३ जनाको उपचार भइरहेको छ । उपचाररत १३ जनामध्ये १२ जना आइसीयूमा र एक जना भेण्टिलेटरमा छन् । धरानको वीपी कोइराला स्वास्थ्य विज्ञान प्रतिष्ठानमा ११ जनाको उपचार भइरहेको छ । उपचाररत ११ जनामध्ये आठ जना भेण्टिलेरमा छन् । चार जना एचडीयूमा छन् । झापाको मेची अस्पताल‚ बिर्तामोडको बि एण्ड सी अस्पताल‚ बिर्तासिटी अस्पताल र आम्दा अस्पतालमा दुई/दुई जनाका दरले सङ्क्रमणमा परेका बिरामी उपचारका लागि भर्ना भएका छन् । सोलुखुम्बुमा तीन जना‚ ओखलढुङ्गा अस्पतालमा एक जना र उदयपुर अस्पतालमा एक जना गरी माघ ५ गतेसम्म प्रदेश १ मा ५६ जना बिरामी अस्पताल भर्ना भएर उपचार गराइरहेको पाइएको छ ।

पछिल्लो पाँच दिनमा प्रदेश १ मा सङ्क्रमितको सङ्ख्या दोब्बरले बढेको छ । पुस ३० गते प्रदेश १ मा ३ सय ७९ जना थप व्यक्तिहरूमा सङ्क्रमण पुष्टि भएकोमा माघ ५ गते १ हजार ७१ जनामा थप सङ्क्रमण पुष्टि भएको छ । प्रदेश सरकारले कोरोना सङ्क्रमण दर बढ्दै गएको अवस्थामा उपचारका लागि प्रदेशभरका अस्पतालहरूमा ९ सय ६९ श्ययाहरू तयारी अवस्थामा राखेको छ । जसमा १ सय ७ श्यया भेण्टिलेटर‚ १ सय १८ श्यया आइसीयू‚ ३ सय ९ एचडीयू र २ सय ४४ आइसोलेशन श्ययाको प्रवन्ध गरिएको छ । सामाजिक विकास मन्त्रालयका कोभिड–१९ तथ्याङ्क शाखाका संयोजक डाक्टर रवीन्द्र निरौलाले दैनिक रूपमा सङ्क्रमितको सङ्ख्या बढेसँगै अस्पताल भर्ना हुने दरपनि बढी रहेको जानकारी दिनु भएको छ ।

विराटनगरस्थित कोशी अस्पतालमा कार्यरत चिकित्सकसहित ७५ जना कर्मचारी कोभिड–१९ को सङ्क्रमण पुष्टि भएको छ । अस्पतालमा कार्यरत चिकित्सक‚ नर्स र कर्मचारी सङ्क्रमित भएपछि अस्पतालबाट प्रवाह हुने सेवा प्रभावित भएको छ । अस्पतालका मेडिकल सुपरिटेण्डेन्ट डाक्टर चुमनलाल दासले अस्पतालमा कार्यरत ११ जना डाक्टरसहित नर्स‚ प्यारामेडिक्स र कर्मचारीहरू एकसाथ सङ्क्रमित भएको बताउनु भयो । चिकित्सकसहितका कर्मचारी सङ्क्रमित भएपछि सेवा प्रवाहमा समस्या भएको डाक्टर चुमनलाल दासले बताउनु भयो ।

आठ जना कर्मचारीमा एकैपटक कोभिड–१९ को सङ्क्रमण पुष्टि भएपछि मालपोत कार्यालय विराटनगरको सम्पूर्ण सेवा बन्द गरिएको छ । कार्यालयका विभिन्न फाँटमा कार्यरत कर्मचारीमा सङ्क्रमण पुष्टि भएपछि सेवा प्रवाह बन्द गरिएको कार्यालयले जनाएको छ । माघ ३ गते छ जना कर्मचारी‚ माघ ४ गते थप दुई जना कर्मचारीमा सङ्क्रमण पुष्टि भएपछि माघ ५ गतेदेखि कार्यालयबाट प्रवाह हुने सम्पूर्ण सेवा अर्को सूचना जारी नहुञ्जेल सम्मका लागि बन्द गरिएको कार्यालय प्रमुख लोकबहादुर भण्डारीले बताउनु भएको छ  ।

विराटनगरस्थित प्रदेश १‚ यातायात सेवा कार्यालयका कर्मचारीमा कोभिड–१९ को सङ्क्रमण पुष्टि भएपछि कार्यालयबाट प्रवाह हुने सेवा बन्द गरिएको छ । यातायात कार्यालयले माघ ४ गते सूचना जारी गरी सेवा प्रवाह बन्द गरिएको जानकारी गराएको छ । माघ ४ गतेदेखि अर्को सूचना जारी नहुञ्जेलसम्मका लागि कार्यालयको आन्तरिक कामकाज तथा जरिवाना लाग्ने सेवाबाहेक अन्य सेवा बन्द गरिएको कार्यालयले जारी गरेको सूचनामा उल्लेख छ ।

सुनसरी प्रतिनिधि जयकृष्ण यादवका अनुसार कोभिड–१९ को तेस्रो लहर न्यूनीकरणका लागि कोशी गाउँपालिकाले हेल्थ डेस्क सञ्चालनमा ल्याएको छ । कोशी गाउँपालिका–८ भाण्टाबारीमा हेल्थ डेस्क माघ ५ गतेदेखि सञ्चालनमा ल्याइएको छ । भारतसँगको सीमा क्षेत्र भएकाले सीमा क्षेत्रमा कडाइसहित हेल्थ डेस्क सञ्चालनमा ल्याएको जिल्ला प्रशासन कार्यालय सुनसरीले जनाएको छ । नेपाल भित्रिन सक्ने अवस्थालाई ध्यानमा राखी भारतसँगको भाण्टबारी मुख्य नाकामा कोरोना भाइरस सङ्क्रमण जाँचमा कडाइ गरिएको छ । कोभिड–१९ को तेस्रो लहरको जोखिम बढेपछि सीक्षा क्षेत्रमा कडाइका साथै हेल्थ डेस्क सञ्चालनमा ल्याएको प्रमुख जिल्ला अधिकारी इन्द्रवेद यादवले जानकारी दिनु भएको छ ।

खोटाङ प्रतिनिधि तारानाथ फुयलका अनुसार इलाका प्रशानस कार्यालय खोटाङबजारका कार्यालय प्रमुखमा कोभिड–१९ को सङ्क्रमण पुष्टि भएपछि माघ ५ गतेदेखि अर्को सूचना जारी नहुञ्जेलसम्मका लागि इलाका प्रशासनले प्रवाह गर्ने सेवामा रोक लगाइएको छ । इलाका प्रशासन कार्यालयले माघ ५ गते सूचना जारी गर्दै सेवा प्रवाहमा रोक लगाएको जानकारी गराएको छ ।

सोलुखुम्बु प्रतिनिधि भोजराज कार्कीका अनुसार जिल्लामा माघ ६ गतेदेखि कोभिड–१९ विरूद्धको बुस्टर डोज खोप लगाइने भएको छ । कोभिसिल्ड र भेरोसेल खोपको दोश्रो मात्रा लगाएको ६ महिना पूरा भएकालाई बुस्टर डोज दिने स्वास्थ्य कार्यालयका सूचना अधिकारी रामनारायण शाहले बताउनु भयो । जिल्लाका लागि ३ हजार बुस्टर डोज आएकाले पालो मिलाएर खोप लगाउने तयारी भएको कार्यालयले जनाएको छ । पहिलो चरणमा स्वास्थ्यकर्मी र सुरक्षाकर्मी‚ दोस्रो चरणमा कर्मचारी जनप्रतिनिधि‚ पत्रकार तथा त्यसपछि मापदण्ड पूरा भएका क्षेत्रमा क्रमश: बुस्टर डोज मात्रा लगाइने  तयारी छ ।

धनकुटा प्रतिनिधि ईश्वर थापाका अनुसार महालक्ष्मी नगरपालिकाले कोभिड–१९ रोकथामका लागि नगर क्षेत्रका विद्यालयहरूमा भौतिक उपस्थितीमा पठनपाठन बन्द गर्ने निर्णय गरेको छ । नगर कार्यपालिकाको माघ ५ गते बसेको बैठकले अर्को सूचना जारी नभएसम्मका लागि नगर क्षेत्रका विद्यालयहरू बन्द गर्ने निर्णय गरिएको छ । शिक्षा मन्त्रालयले विद्यालय बन्द गर्न गरेको निर्णय अस्वीकार गर्दै विद्यालय सञ्चालनमा ल्याएको थियो । नगर क्षेत्रका सरकारी कार्यालयका कर्मचारीहरू तथा सेवाग्राहीमा समेत कोभिड–१९ को सङ्क्रमण देखिएपछि विद्यालयहरू बन्द गर्ने निर्णय गरिएको नगर प्रमुख पर्शुराम नेपालले बताउनु भएको छ । राष्ट्रिय वाणिज्य बैङ्क धनकुटामा कार्यरत पाँच जना कर्मचारीमा सङ्क्रमण पुष्टि भएपछि बैङ्कले माघ ५ गतेदेखि अत्यावश्यक बाहेकका सेवा अनिश्चितकालका लागि बन्द गरेको छ ।

ललितपुर प्रतिनिधि दीपकप्रसाद घिमिरेका अनुसार जिल्ला प्रशासन कार्यालयबाट प्रदान गरिने अत्यावश्यक वाहेकका सेवाहरु बन्द गरिएको प्रमुख जिल्ला अधिकारी धनश्याम उपाध्यायद्वारा माघ ५ गते अत्यन्त जरुरी सूचना प्रकाशित गरी जनाइएको छ । सूचनामा विश्वव्यापी महामारीको रूपमा फैलिएको कोभिड–१९ को नयाँ भेरियन्ट ओमिक्रोन सहितको सङ्क्रमण बढ्दै गएको अवस्थालाई मध्यनजर गरी माघ ६ गतेदेखि लागू हुने गरी सेवा स्थगित गरिएको जनाइएको छ । शान्ति सुरक्षा र मुद्दा सम्बन्धी सेवा सञ्चालन गरी नागरिकता, प्रतिलिपी, राहदानी र सङ्घ÷संस्था, राष्ट्रिय परिचयपत्र र नाबालक परिचयपत्र बनाउने सेवा समेत स्थगित गरिएको सूचनामा उल्लेख छ । प्रमुख जिल्ला अधिकारीले माघ ४ गते मात्र सङ्क्रामक रोग ऐन, २०२० को दफा २ ले दिएको अधिकार र स्थानीय प्रशासन ऐन, २०२८ को दफा ६ को उपदफा ३ ले दिएको अधिकार प्रयोग गरी उक्त आदेश जारी गर्नु भएको हो ।

नुवाकोट प्रतिनिधि नवदीप श्रेष्ठका अनुसार त्रिशूली अस्पतालका कार्यरत चिकित्सक सहित ३० जना स्वास्थ्यकर्मी एकै चोटी कोभिड–१९ बाट सङ्क्रमित भएपछि अस्पतालले दिने सेवामा असर परेको छ । अस्पताल प्रसाशनले माघ ५ गते एक सूचना निकालेर अत्यावश्यक काम नभई अस्पताल नआउन आग्रह गरेको छ । अस्पतालका विशेषज्ञ चिकित्सक, मेडिकल अधिकृत, स्टाफ नर्स, प्रयोगशालाकर्मी र अन्य कर्मचारी गरी एकसाथ ३० जना सङ्क्रमित भएको त्रिशूली अस्पतालमा मेडिकल सुपरीटेन्डेन्ट डाक्टर दीपेन्द्र पाण्डेले जानकारी दिनुभयो । स्त्री तथा प्रसुति विभागमा कार्यरत तीन चिकित्सक नै कोभिड–१९ बाट सङ्क्रमित भएकोले हाल उक्त विभागबाट हुने प्रसुति गराउने, शल्याक्रिया गराउनु पर्ने जस्ता सेवा बन्द गरिएको डा. पाण्डेले जानकारी दिनुभयो ।

तनहुँ प्रतिनिधि प्रकाशचन्द्र भट्टराईका अनुसार शुक्लागण्डकी नगरपालिका–५ बेलचौतारामा रहेको जिपि कोईराला राष्ट्रिय श्वास प्रश्वास उपचार केन्द्रमा अक्सिजन उत्पादन सुरु गरिएको छ । संघीय सरकारको आर्थिक सहयोगमा अक्सिजन प्लान्ट जडान गरी उक्त अस्पतालबाट गत पुष २७ गतेदेखि अक्सिजन उत्पादन सुरु गरिएको अस्पतालका कार्यकारी प्रमुख डाक्टर रामकुमार श्रेष्ठले बताउनुभयो । उक्त प्लान्टको दैनिक उत्पादन क्षमता १ सय सिलिन्डर रहे पनि हाल अस्पतालको आवश्यकता अनुसार उत्पादन गरिरहेको बताउदै उहाँले अस्पतालमै अक्सिजन उत्पादन हुन थालेपछि पोखराबाट ल्याउनुपर्ने बाध्यता अन्त्य भएको जानकारी दिनुभयो ।  पछिल्लो समय कोभिडका सङ्क्रमितहरु बढ्न थालेपछि अक्सिजन उत्पादनलाई विशेष ध्यान दिएको उहाँले बताउनुभयो ।

गोरखा प्रतिनिधि हरिराम उप्रेतीका अनुसार जिल्ला प्रशासन कार्यालयका प्रमुख जिल्ला अधिकारी शङ्करहरी आचार्यले जिल्लामा कोभिड सङ्क्रमितको सङ्ख्या बढेपछि माघ ५ गते राति १२ बजेबाट लागु हुने गरी माघ मसान्तसम्म निषेध आदेश जारी गर्नुभएको छ । निषेध आदेशको अवधिभर सबै प्रकारका आमसभा जुलुस, भेला वा धेरै मानिस भेला हुने क्रियाकलाप सञ्चालनमा रोक लगाइएको छ ।

कास्की प्रतिनिधि सुशन घिमिरेका अनुसार जिल्ला प्रशासन कार्यालय कास्कीले राहदानी शाखा, तथा राष्ट्रिय परिचयपत्र विवरण दर्ता ईकाइमा कार्यरत कर्मचारीमा नयाँ भेरियन्ट सहितको कोभिड सङक्रमण देखिएपछि  माघ ६ गते देखि सेवा स्थगित गर्ने जनाएको छ । कार्यालयले माघ ५ गते विज्ञप्ति जारी गर्दै केही कर्मचारीमा कोभिड सङ्क्रमण देखिएको र केही कर्मचारीलाई मिल्दोजुल्दो लक्षण देखिएको भन्दै राहदानी शाखा एवम राष्ट्रिय परिचयपत्र विवरण दर्ता ईकाइबाट प्रदान गरिने सेवा अर्को सूचना जारी नभएसम्मका लागि स्थगित गरिएको जनाएको हो ।

म्याग्दी प्रतिनिधि अमृतप्रसाद पौडेलका अनुसार कोभिड–१९ को सङ्क्रमण बढ्दै गएपछि प्रमुख जिल्ला अधिकारी चिरञ्जीवी रानाले माघ ५ गते सूचना प्रकाशन गर्दै शैक्षिक संस्था, तातोपानी कुण्ड र धार्मिक क्षेत्र माघ ५ गते राति देखि माघ १५ गतेसम्म बन्द गर्ने जानकारी दिनुभएको छ ।

अर्घाखाँची प्रतिनिधि कुलबहादुर नेपालीका अनुसार सन्धिखर्क नगरपालिकामा कार्यरत १७ जना कर्मचारीलाई कोभिड–१९ को सङ्क्रमण देखिएपछि अत्यावश्यक बाहेकका सेवा माघ ४ गतेदेखि बन्द गरिएको छ । नगरपालिकाका उपप्रमुख ठाकुरकुमार बिकका अनुसार माघ ७ गतेसम्म अत्यावश्यक बाहेकका सेवा बन्द गरिएको हो ।


अनलाइन डेस्क