समाचारहरू

माघ ३ गते ५ हजार ७ सय ४७ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ८ लाख ५९ हजार ४ सय ८५ पुगेको स्वास्थ्य तथा जनसङ्ख्या मन्त्रालयले जनाएको छ । माघ ३ गते परीक्षण गरिएकामध्ये ४१ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १७.१ प्रतिशतमा सङ्क्रमण पुष्टि भएको छ । गत २४ घण्टामा १४ हजार १४ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ८ लाख १६ हजार ९ सय ८५ जना निको भएका छन् । माघ ३ गते ५ सय ४७ जना निको भएका छन् भने निको हुनेको दर ९५.१ प्रतिशत रहेको मन्त्रालयले जनाएको छ । माघ ३ गतेसम्म ११ हजार ६ सय २३ जना कोभिड सङ्क्रमितको मृत्यु भएको मन्त्रालयले जनाएको छ । माघ ३ गते तीन जना कोभिड सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३० हजार ८ सय ७७ रहेको छ ।

मन्त्रालयका अनुसार माघ ३ गते ३ हजार ४ सय ५१ ओटा स्वाब एण्टिजेन विधिबाट परीक्षण गरेकामा ९ सय ८७ जनालाई कोभिड पुष्टि भएको छ । माघ ३ गतेसम्म एण्टिजेन परीक्षणबाट १ लाख २ हजार ४ सय ५५ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । माघ ३ गतेसम्म १ करोड २२ लाख १३ हजार ३२ जनालाई पुर्ण खोप लगाइएको मन्त्रालयले जनाएको छ । मन्त्रालयका अनुसार मोरङ, सुनसरी, काठमाडौँ, ललितपुर, भक्तपुर, चितवन, कास्की, रुपन्देही र कैलालीमा सक्रिय सङ्क्रमित ५ सयभन्दा बढी रहेका छन् ।

रामेछाप प्रतिनिधि नवराज घिमिरेका अनुसार गोकुलगङ्गा गाउँपालिकाले कोभिड सङ्क्रमण बढेपछि अत्यावश्यक बाहेकका सेवा बन्द गरेको छ । गाउँपालिकाले माघ ३ गते एक सूचना प्रकाशित गरी माघ ३ गतेदेखि माघ ७ गतेसम्म अत्यावश्यक बाहेककका सेवा बन्द गरिएको जनाएको हो । गाउँपालिका उपाध्यक्ष राधिका श्रेष्ठ नेवारले जारी गर्नुभएको सूचनामा जनप्रतिनिधि तथा कर्मचारीलाई समेत कोभिड सङ्क्रमण देखिएकोले सेवा बन्द गरिएको जनाइएको छ । स्थानीय सङ्कट व्यवस्थापन समितिको बैठकले यस्तो निर्णय गरेको उहाँले बताउनुभयो ।

रसुवा प्रतिनिधि हेमनाथ खतिवडाका अनुसार जिल्ला कोभिड–१९ सङ्कट व्यवस्थापन समन्वय केन्द्रको पुस ३० गतेको सिफारिसका आधारमा जिल्ला प्रशासन कार्यालयले माघ २ गतेदेखि अर्को सूचना जारी नभएसम्म जिल्लामा २५ जनाभन्दा बढी भेला हुन रोक लगाएको छ । प्रमुख जिल्ला अधिकारी नवराज जैसीले आदेश जारी गर्दै २५ जनाभन्दा बढी भेला हुने महोत्सव, मेला, भेलालगायतका सामाजिक गतिविधि नगर्न भनिएको छ । सार्वजनिक साधनको हकमा सिट भन्दा बढि यात्रु नराख्न, सार्वजनिक स्थलमा जान कोभिड १९ विरूद्ध खोप लगाएको कार्ड साथमा राख्न र पूर्ण रूपमा स्वास्थ्य मापदण्ड प्रयोग गर्नु पर्ने उल्लेख छ ।

अनलाइन डेस्क