समाचारहरू

माघ २ गते ४ हजार ५ सय ३४ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ८ लाख ५३ हजार ७ सय ३८ पुगेको स्वास्थ्य तथा जनसङ्ख्या मन्त्रालयले जनाएको छ । माघ २ गते परीक्षण गरिएकामध्ये ३६ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १७.१ प्रतिशतमा सङ्क्रमण पुष्टि भएको छ । गत २४ घण्टामा १२ हजार ५ सय ६२ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ८ लाख १६ हजार ४ सय ३८ जना निको भएका छन् । माघ २ गते ४ सय ३५ जना निको भएका छन् भने निको हुनेको दर ९५.६ प्रतिशत रहेको मन्त्रालयले जनाएको छ । माघ २ गतेसम्म ११ हजार ६ सय २० जना कोभिड सङ्क्रमितको मृत्यु भएको मन्त्रालयले जनाएको छ । माघ २ गते तीन जना कोभिड सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २५ हजार ६ सय ८० रहेको छ ।

मन्त्रालयका अनुसार माघ २ गते २ हजार ५ सय ६९ ओटा स्वाब एण्टिजेन विधिबाट परीक्षण गरेकामा ४ सय २७ जनालाई कोभिड पुष्टि भएको छ । माघ २ गतेसम्म एण्टिजेन परीक्षणबाट १ लाख १ हजार ४ सय ६८ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । माघ २ गतेसम्म १ करोड २१ लाख २७ हजार ८ सय २९ जनालाई पुर्ण खोप लगाइएको मन्त्रालयले जनाएको छ । मन्त्रालयका अनुसार मोरङ, सुनसरी, काठमाडौँ, ललितपुर, भक्तपुर, चितवन, कास्की र रुपन्देहीमा सक्रिय सङ्क्रमित ५ सयभन्दा बढी रहेका छन् ।

कास्की प्रतिनिधि सुशन घिमिरेका अनुसार जिल्ला प्रशासन कार्यलय कास्कीले माघ १ गतेदेखि सार्वजनिक सेवा लिन कोभिड विरुद्धको खोप लगाएको प्रमाण देखाउनुपर्ने आदेश जारी गरेको छ । प्रमुख जिल्ला अधिकारी जयनारायण आचार्यले आदेश जारी गर्दै जिल्लाभर खोप कार्ड अनिवार्य गरिएको जानकारी दिनु भयो । उहाँका अनुसार सार्वजनिक स्थलमा २५ जनाभन्दा बढी जम्मा हुन र राजनैतिक, सामाजिक तथा सांस्कृतिक लगायतका भेला, महोत्सव, मेला सभा सम्मेलन गर्न रोक लगाइको छ । यस्तै सार्वजनिक सवारी साधनमा यात्रुले अनिवार्य रुपमा मास्क र भौतिक दूरी कायम गर्नुपर्ने छ । हवाइ जहाजबाट यात्रा गर्नुपूर्व कोभिड नेगेटिभ भएको खोप कार्ड देखाउनुपर्ने छ ।

म्याग्दी प्रतिनिधि अमृतप्रसाद पौडेलका अनुसार रघुगङ्गा गाउँपालिका–३, मौवाफाँटको ज्ञानोदय माध्यमिक विद्यालयका शिक्षक तथा विद्यार्थीसहित १२ जनामा कोभिड–१९ को सङ्क्रमण पुष्टि भएपछि माघ २ गतेदेखि माघ ९ गतेसम्मकम लागि विद्यालयमा पठनपाठन बन्द गरिएको छ । विद्यालयमा कार्यरत एक जना शिक्षकमा पुस २८ गते कोभिड-१९ सङ्क्रमण देखिएपछि पुस २९ गते कन्ट्याक ट्रेसिङ गर्दा अर्का शिक्षकमा पनि सङ्क्रमण पुष्टि भएको थियो । त्यसपछि अरुमा पनि कोभिड देखिएको हो ।

अनलाइन डेस्क