कोभिड–१९ को सङ्क्रमणसम्बन्धी दैनिक अपडेट (मङ्सिर ३ गते)

 

मङ्सिर ३ गते ६ हजार ७ सय ३१ ओटा नमूना परीक्षण गर्दा १ हजार ४ सय ४२ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख १२ हजार ९ सय १७ पुगेको स्वास्थ्य तथा जनसङ्ख्या मन्त्रालयले जनाएको छ ।  सङ्क्रमितमध्ये १ लाख ८२ हजार ७ सय ८० जना निको भएका छन् । मङ्सिर ३ गते ३ हजार ५ सय ३८ जना निको भएका छन् भने निको हुनेको दर ८५.८ प्रतिशत रहेको मन्त्रालयले जनाएको छ । मङ्सिर ३ गतेसम्म १ हजार २ सय ५९ जना कोभिड सङ्क्रमितको मृत्यु भएको मन्त्रालयले जनाएको छ । २८ हजार ८ सय ७८ जनाको उपचार भइरहेको छ । २६ हजार ४ सय २१ जना होम आइसोलेशनमा छन् भने ३ सय २६ जनाको उपचार आइसीयूमा र ५४ जनाको उपचार भेण्टिलेटरमा भइरहेको छ ।

प्रदेश १

भोजपुर प्रतिनिधि गणेश विष्टका अनुसार कोभिड–१९ को सङ्क्रमणबाट षडानन्द नगरपालिका–८ तुङगेछाकी २४ वर्षीया युवतीको मङ्सिर २ गते मृत्यु भएपछि सो वडा एक साताका लागि सील गरिएको छ । कात्तिक १९ गते वीपी कोइराला स्वस्थ्य विज्ञान प्रतिष्ठान धरानमा कोभिड परीक्षण गराउँदा युवतीको रिपोर्ट पोजेटिभ आएको थियो । कोभिड पोजेटिभ देखिएपछि होम आइसोलेशनमा बस्दै आएकी युवतीको मृत्यु भएकाले वडा एक साताका लागि सील गरिएको षडानन्द नगरपालिकाका मेयर वीरवल राईले बताउनु भयो ।


अनलाइन डेस्क