समाचारहरू

कात्तिक ३० गते १ हजार ४ सय ७७ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ९ हजार ७ सय ७६ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ६ हजार ४ सय ७६ जनाको स्वाब परीक्षण गरिएको मन्त्रालयले जनाएको छ । सङ्क्रमितमध्ये १ लाख ७३ हजार ४ सय ३० जना निको भएका छन् । कात्तिक ३० गते २ हजार ७ सय ९८ जना निको भएका छन् भने निको हुनेको दर ८२.७ प्रतिशत रहेको मन्त्रालयले जनाएको छ । कात्तिक ३० गतेसम्म १ हजार २ सय २१ जना कोभिड सङ्क्रमितको मृत्यु भएको मन्त्रालयले जनाएको छ । ३५ हजार १ सय २५ जनाको उपचार भइरहेको छ । २६ हजार ४ सय ४९ जना होम आइसोलेशनमा छन् भने ३ सय ५४ जनाको उपचार आइसीयूमा र ६४ जनाको उपचार भेण्टिलेटरमा भइरहेको छ ।

सुदूरपश्चिम प्रदेश
बाजुरा प्रतिनिधि पदमबहादुर सिंहका अनुसार नेपाल सरकारले अस्पताल तथा प्राथमिक स्वास्थ्य केन्द्र नभएको स्थानीय तहमा अस्थायी कोभिड अस्पताल बनाउनका लागि सबै स्थानीय तहमा बजेट सहित निर्देशन गरेको थियो । तत्काल तीन महिनाका लागि बजेट व्यवस्थापनसहित बाजुराका सात स्थानीय तहमा सङ्घीय सरकारले १० लाख रुपियाँका दरले पठाएको थियो । बाजुराका नौ स्थानीय तहमध्ये सात स्थानीय तहमा अस्थायी कोभिड अस्पताल स्थापना गर्नका लागि बजेट पठाएको भए पनि सात ओटै स्थानीय तहले एक जना चिकित्सक नपाएको जनाएका छन् । सरकारले कोभिड अस्पतालका लागि एक जना मेडिकल अधिकृत, दुई जना स्टाफ नर्स, एक जना ल्याब टेक्निसियम र एक जना कार्यलय सहयोगी राख्नका लागि बजेट सहितको व्यवस्थापन गरेको थियो । सात ओटै स्थानीय तहले एक महिनाको विज्ञापन गरेको भए पनि एक जना चिकित्सकले पनि दरखास्त नदिएको स्थानीय तहले जनाएका छन् ।
बुढिगङ्गा नगरपालिकाका स्वास्थ्य संयोजक दिपक शाहले एक महिनाको सूचना निकाल्दा पनि कोही सम्पर्कमा नआएको बताउनु भयो । ‘सरकारले नेपाल सरकारको तलब स्केलमा बजेट पठाएको छ, तर मेडिकल अधिकृतले न्युनतम १ लाख रुपियाँभन्दा बढी माग्ने गरेका छन् ।’–उहाँले भननु भयो ।
बडिमालिका नगरपालिकामा जिल्ला अस्पताल रहेको छ भने बुढिनन्दा नगरपालिकामा प्राथमिक स्वास्थ्य केन्द्र रहेको छ । यी दुबै ठाँउमा मेडिकल अधिकृत रहेका छन् । गौमुल गाउँपालिकाका अध्यक्ष हरिबहादुर रोकायाले भने पत्रिकामार्फत विज्ञापन गर्दा पनि मेडिकल अधिकृत नपाएको बताउनु भयो । ‘गाँउपालिकाले थप बजेटको व्यवस्था गर्ने भनेपनि चिकित्सक पाएनौँ ।’–उहाँले भननु भयो ।
स्वामिकार्तिक गाउँपालिकाले दोस्रो पटक सूचना निकालेको भएपनि एक जनाको पनि दरखास्त नपरेको गाँउपालिकाले जनाएको छ । सङ्घीय सरकारले पहिलो पटक ३ महिनाको लागि १० लाख रुपियाँ पठाएको छ । ४ लाख ५० हजार तलब खर्च र ५ लाख ५० हजार अस्थायी कोभिड अस्पताल व्यवस्थापनका लागि बजेट पठाएको हिमाली गाँउपालिकाका निमित्त प्रशासकीय अधिकृत जनकबहादुर शाहीले बताउनु भयो ।
बाजुरामा कोभिडको चेकजाँच नभएपनि स्वाब सङ्कलन गरेर जिल्ला बाहिर पठाउने गरिएको छ । जिल्लामा अहिलेसम्म सङ्क्रमितको सङ्ख्या ५ सय ९२ पुगेको छ भने दुई जनाको मृत्यु भइसकेको छ ।

अनलाइन डेस्क