समाचारहरू

कात्तिक २३ गते ४ सय ४३ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ८ लाख १५ हजार ३ सय ७२ पुगेको स्वास्थ्य तथा जनसङ्ख्या मन्त्रालयले जनाएको छ । कात्तिक २३ गते परीक्षण गरिएकामध्ये तीन प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १८.२ प्रतिशतमा सङ्क्रमण पुष्टि भएको छ । गत २४ घण्टामा १४ हजार ९ सय १८ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख ९६ हजार ३ सय ६ जना निको भएका छन् । कात्तिक २३ गते ४ सय ८४ जना निको भएका छन् भने निको हुनेको दर ९७.७ प्रतिशत रहेको मन्त्रालयले जनाएको छ । कात्तिक २३ गतेसम्म ११ हजार ४ सय ५४ जना कोभिड सङ्क्रमितको मृत्यु भएको मन्त्रालयले जनाएको छ । कात्तिक २३ गते एक जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ७ हजार ६ सय १२ रहेको छ ।

स्वास्थ्य मन्त्रालयका अनुसार कात्तिक २३ गते १ हजार ८ सय १८ ओटा स्वाब एण्टिजेन विधिबाट परीक्षण गरेकामा ९० जनालाई कोभिड पुष्टि भएको छ । कात्तिक २३ गतेसम्म एण्टिजेन परीक्षणबाट ९४ हजार ९ सय २६ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार कात्तिक २३ गतेसम्म ७४ लाख ६८ हजार ९ सय १४ जनाले पूर्ण खोप पाइसकेका छन् । मन्त्रालयका अनुसार काठमाडौँ र ललितपुरमा सक्रिय सङ्क्रमित ५ सयभन्दा बढी रहेका छन् ।

धादिङ प्रतिनिधि सिताराम अधिकारीका अनुसार धादिङमा जारी निषेध आदेशको अवधि मङ्सिर ७  गतेसम्मका लागि थप गरिएको छ । कोभिड-१९ सङ्कट व्यवस्थापन केन्द्रको कात्तिक २३ गतेको बैठकले जारी निषेध आदेश मङ्सिर ७  गतेसम्मका लागि थप गर्ने निर्णय गरेको हो । नेपाल सरकारले जारी गरेको स्वास्थ्य मापदण्डलाई कडाइका साथ पालना गर्न निषेध आदेशमा उल्लेख गरिएको छ । देशभर कोभिड भाइरसको सङ्क्रमण बढेपछि धादिङमा ०७८ वैशाख २१ गतेदेखि निषेध आदेश जारी छ ।

अनलाइन डेस्क