कोभिड–१९ को सङ्क्रमणसम्बन्धी दैनिक अपडेट (कात्तिक २५ गते)

कात्तिक २५ गते २ हजार ७ सय ३६ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ९९ हजार ७ सय ६० पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १२ हजार ९ सय ६० जनाको स्वाब परीक्षण गरिएको मन्त्रालयले जनाएको छ । सङ्क्रमितमध्ये १ लाख ६० हजार ५ सय ७७ जना निको भएका छन् । कात्तिक २५ गते ८ सय ५३ जना निको भएका छन् भने निको हुनेको दर ८० प्रतिशत रहेको मन्त्रालयले जनाएको छ । कात्तिक २५ गतेसम्म १ हजार १ सय ४८ जना कोभिड सङ्क्रमितको मृत्यु भएको मन्त्रालयले जनाएको छ । ३८ हजार ३५ जनाको उपचार भइरहेको छ । २९ हजार ७ सय ३४ जना होम आइसोलेशनमा छन् भने ४ सय ४ जनाको उपचार आइसीयूमा र ९६ जनाको उपचार भेण्टिलेटरमा भइरहेको छ ।

गण्डकी प्रदेश
कास्की प्रतिनिधि सुशन घिमिरेका अनुसार कोभिड–१९ सङ्क्रमण बढेको भन्दै कास्कीको मादी गाउँपालिकाले कात्तिक २६ गतेदेखि मङ्सिर २ गतेसम्म गाउँपालिका मातहतका सबै कार्यालयमा अत्यावश्यक सेवा बाहेकका सेवा प्रवाह बन्द गर्ने निर्णय गरेको छ । कात्तिक २५ गते बसेको स्थानीय विपद व्यवस्थापन समितिको बैठकले अत्यावश्यक बाहेका सबै यातायात सेवा समेत रोक लगाउने निर्णय गरेको गाउँपालिका अध्यक्ष वेदबहादुर गुरुङले जानकारी दिनुभयो । उहाँका अनुसार बैठकले सङ्क्रमण दर उच्च रहेको क्षेत्रमा एक घर एक पीसीआर गर्ने निर्णय समेत गरेको छ । ‘गाउँपालिकाको वडा नं ९ नयाँबजार, वडा नं १० थुम्किोट, वडा नं ११ भगवती बजार र वडा नं १२ घुम्लेबजार र भगवतीटार सील गर्ने निर्णय गरेका छौँ ।’–अध्यक्ष गुरुङले भन्नुभयो । गाउँपालिकाको वडा नं ३ र १० मा एकएक जना कोभिड सङ्क्रमितको मृत्यु भइसकेको छ ।
स्याङजा प्रतिनिधि तिलकुमारी थापाका अनुसार वालिङ नगरपालिका–१ कार्यालयको कर्मचारीमा कोभिड–१९ को सङ्क्रमण पुष्टि भएपछि वडा कार्यालयकोे शहरी स्वास्थ्य केन्द्रले कात्तिक २४ गतेबाट सेवा प्रवाह बन्द गरेको छ । सो वडाको शहरी स्वास्थ्य केन्द्रका एक स्वास्थ्यकर्मीलाई सङ्क्रमण पुष्टि भएपछि थप सङ्क्रमित नहुन अर्को सुचना जारी नभएसम्मका लागि वडाबाट सञ्चालित दुई ओटा सेवा केन्द्र बन्द गरिएको वालिङ नगरपालिका वडा न. १ का अध्यक्ष तथा नगर प्रवक्ता केदर काफ्लेले जानकारी दिनुभयो । उहाँले वडावासीलाई अत्यावश्यक काम बाहेक घर बाहिर हिँड्डुल नगर्न तथा समुहमा जम्मा भएर भीडभाड नगर्न समेत आग्रह गरिएकोे बताउनु भयो ।


अनलाइन डेस्क