समाचारहरू

असोज २१ गते ६ सय ६७ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ८ लाख २ सय ८२ पुगेको स्वास्थ्य तथा जनसङ्ख्या मन्त्रालयले जनाएको छ । असोज २१ गते परीक्षण गरिएकामध्ये नौ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १८.८ प्रतिशतमा सङ्क्रमण पुष्टि भएको छ । गत २४ घण्टामा ७ हजार २ सय ६४ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख ७३ हजार १ सय ४० जना निको भएका छन् । असोज २१ गते ९ सय ११ जना निको भएका छन् भने निको हुनेको दर ९६.६ प्रतिशत रहेको मन्त्रालयले जनाएको छ । असोज २१ गतेसम्म ११ हजार २ सय जना कोभिड सङ्क्रमितको मृत्यु भएको मन्त्रालयले जनाएको छ । असोज २१ गते आठ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या १५ हजार ९ सय ४२ रहेको छ ।

स्वास्थ्य मन्त्रालयका अनुसार असोज २१ गते ३ हजार ४ सय ८ ओटा स्वाब एण्टिजेन विधिबाट परीक्षण गरेकामा १ सय ३८ जनालाई कोभिड पुष्टि भएको छ ।  असोज २१ गतेसम्म एण्टिजेन परीक्षणबाट ९२ हजार ७ सय ९० जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार असोज २१ गतेसम्म ६४ लाख ३० हजार ४ सय ३१ जनाले पूर्ण खोप पाइसकेका छन् ।

मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, कास्की र रुपन्देहीमा सक्रिय सङ्क्रमित ५ सयभन्दा बढी रहेका छन् ।

म्याग्दी प्रतिनिधि अमृतप्रसाद पौडेलका अनुसार मुस्ताङमा जारी रहेको निषेध आदेश कात्तिक ५ गतेसम्म थप भएको छ । जिल्ला प्रशासन कार्यालय मुस्ताङले सूचना जारी गर्दै जिल्लामा जारी रहेको निषेध आदेश असोज २० गते रातिको १२ बजे देखि कात्तिक ५ गते राति १२ बजेसम्म थप भएको जानकारी दिएको छ ।

अनलाइन डेस्क