समाचारहरू

असोज १८ गते ८ सय १२ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ९८ हजार ४ पुगेको स्वास्थ्य तथा जनसङ्ख्या मन्त्रालयले जनाएको छ । असोज १८ गते परीक्षण गरिएकामध्ये १४ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १८.८ प्रतिशतमा सङ्क्रमण पुष्टि भएको छ । गत २४ घण्टामा ५ हजार ८ सय ९३ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख ७० हजार २ सय २४ जना निको भएका छन् । असोज १८ गते १ हजार जना निको भएका छन् भने निको हुनेको दर ९६.५ प्रतिशत रहेको मन्त्रालयले जनाएको छ । असोज १८ गतेसम्म ११ हजार १ सय ७४ जना कोभिड सङ्क्रमितको मृत्यु भएको मन्त्रालयले जनाएको छ । असोज १८ गते सात जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या १६ हजार ६ सय ६ रहेको छ ।

स्वास्थ्य मन्त्रालयका अनुसार असोज १८ गते ४ हजार ९ सय ८१ ओटा स्वाब एण्टिजेन विधिबाट परीक्षण गरेकामा २ सय १८ जनालाई कोभिड पुष्टि भएको छ ।  असोज १८ गतेसम्म एण्टिजेन परीक्षणबाट ९२ हजार २ सय ५२ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार असोज १८ गतेसम्म ६३ लाख ८४ हजार १ सय ७२ जनाले पूर्ण खोप पाइसकेका छन् ।

मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर र रुपन्देहीमा सक्रिय सङ्क्रमित ५ सयभन्दा बढी रहेका छन् ।

धादिङ प्रतिनिधि सीताराम अधिकारीका अनुसार जिल्लामा चाडपर्व लक्षित गर्दै जिल्ला प्रशासन कार्यालयले असोज १८ गतेदेखि कात्तिक ५ गतेसम्मका लागि निशेध आदेशको अवधि थप गरेको छ । दशैँ मनाउँदा आफ्नो घरमा मात्र सीमित हुने गरी मनाउन, मेला पर्व, जात्रा महोत्साव, कन्सर्ट जस्ता कार्यक्रम नगर्न, मन्दिर तथा देवलहरूमा नियमित पूजामात्र गर्न र भिडभाड नगर्न प्रमुख जिल्ला अधिकारी कृष्णप्रसाद लम्सालद्वारा असोज १७ गते जारी निषेध आदेशमा उल्लेख गरिएको छ ।

बागलुङ जिल्ला प्रतिनिधि सिर्जना पन्तका अनुसार तामनखोला गाउँपालिकामा शिक्षक विद्यार्थी बिरामी पर्न थालेपछि विद्यालय बन्द गरिएको छ । तामनखोला गाउँपालिका-२ खोलेसवाङस्थित खोलेसवाङ आधारभुत विद्यालयमा शिक्षक, विद्यार्थी बिरामी हुन थालेपछि असोज २० गतेदेखि असोज २४ गतेसम्म विद्यालय बन्द गरिएको छ । विद्यालयका एक जना शिक्षकमा कोभिड-१९ पोजेटिभ देखिएको र अन्य शिक्षक र विद्यार्थीमा ज्वरो, रुघा खोकी जस्ता स्वास्थ्य समस्या देखिन थालेपछि विद्यालय पाँच दिन पूर्ण रुपमा बन्द गरिएको प्रधानाध्यापक कुलबहादुर घर्तिले बताउनुभयो ।

अनलाइन डेस्क