समाचारहरू

असोज ६ गते १ हजार २ सय ५१ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ८७ हजार ८ सय २८ पुगेको स्वास्थ्य तथा जनसङ्ख्या मन्त्रालयले जनाएको छ । असोज ६ गते परीक्षण गरिएकामध्ये ११ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.१ प्रतिशतमा सङ्क्रमण पुष्टि भएको छ । गत २४ घण्टामा ११ हजार ६७ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख ५५ हजार ६ सय ३० जना निको भएका छन् । असोज ६ गते १ हजार ६ सय ३० जना निको भएका छन् भने निको हुनेको दर ९५.९ प्रतिशत रहेको मन्त्रालयले जनाएको छ । असोज ६ गतेसम्म ११ हजार ५९ जना कोभिड सङ्क्रमितको मृत्यु भएको मन्त्रालयले जनाएको छ । असोज ६ गते ६ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २१ हजार १ सय ३९ रहेको छ ।

स्वास्थ्य मन्त्रालयका अनुसार असोज ६ गते २ हजार ८ सय ६३ ओटा स्वाब एण्टिजेन विधिबाट परीक्षण गरेकामा २ सय २७ जनालाई कोभिड पुष्टि भएको छ ।  असोज ६ गतेसम्म एण्टिजेन परीक्षणबाट ८९ हजार ६ सय ९ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार असोज ६ गतेसम्म ५७ लाख ५२ हजार ८ सय ५३ जनाले पूर्ण खोप पाइसकेका छन् ।

मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, मकवानपुर, कास्की र रुपन्देहीमा सक्रिय सङ्क्रमित ५ सयभन्दा बढी रहेका छन् ।

म्याग्दी प्रतिनिधि अमृतप्रसाद पौडेलका अनुसार मुस्ताङ जिल्लामा जारी रहेको निषेध आदेश थप भएको छ । जिल्ला प्रशासन कार्यालय मुस्ताङले असोज ६ गते सूचना प्रकाशन गरेर जिल्लामा जारी रहेको निषेध आदेश असोज ५ गते रातिको १२ बजेदेखि असोज २० गते राति १२ बजेसम्म थप भएको जानकारी दिएको छ ।

अनलाइन डेस्क