समाचारहरू

असोज ४ गते ९ सय ७५ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ८५ हजार ५ सय ४१ पुगेको स्वास्थ्य तथा जनसङ्ख्या मन्त्रालयले जनाएको छ । असोज ४ गते परीक्षण गरिएकामध्ये ९ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.२ प्रतिशतमा सङ्क्रमण पुष्टि भएको छ । गत २४ घण्टामा १० हजार ७ सय ८६ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख ५२ हजार १ सय ७० जना निको भएका छन् । असोज ४ गते २ हजार ९ सय ५७ जना निको भएका छन् भने निको हुनेको दर ९५.८ प्रतिशत रहेको मन्त्रालयले जनाएको छ । असोज ४ गतेसम्म ११ हजार ४८ जना कोभिड सङ्क्रमितको मृत्यु भएको मन्त्रालयले जनाएको छ । असोज ४ गते ८ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २२ हजार ३ सय २३ रहेको छ ।

स्वास्थ्य मन्त्रालयका अनुसार असोज ४ गते ३ हजार ३१ ओटा स्वाब एण्टिजेन विधिबाट परीक्षण गरेकामा १ सय २० जनालाई कोभिड पुष्टि भएको छ ।  असोज ४ गतेसम्म एण्टिजेन परीक्षणबाट ८९ हजार ८८ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार असोज ४ गतेसम्म ५५ लाख ८८ हजार ५ सय १७ जनाले पूर्ण खोप पाइसकेका छन् ।

मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, मकवानपुर, काभ्रेपलाञ्चोक, कास्की र रुपन्देहीमा सक्रिय सङ्क्रमित ५ सयभन्दा बढी रहेका छन् ।

धादिङ प्रतिनिधि सीताराम अधिकारीका अनुसार असोज ४ गते धादिङ अस्पताललाई बागमती प्रदेश सरकारले उपलब्ध गराएको अक्सिजन प्लान्टको उद्घाटन गरिएको छ । बगमती प्रदेश सरकारका स्वास्थ्य मन्त्री प्रदिपकुमार कटवालले अक्सिजन प्लान्टको उद्घाटन गर्दै अक्सिजन प्लान्ट जडानपछि बिरामी अक्सिजनकै अभावमा मर्नु पर्ने अवस्था नआउने बताउनुभएको छ । जिल्ला अस्पतालको लागि यस अघि शव बहान र भवन मर्मतका लागि रकम उपलब्ध गराएको छ भने भेन्टीलेटर सहित आइसियु सञ्चालनको व्यवस्था भइसकेको छ । अस्पताल व्यवस्थापन समितिका अध्यक्ष महेन्द्र धमलाको अध्यक्षतमा सम्पन्न कार्यक्रममा धादिङ अस्पतालका मेडिकल सुपरिटेन्डेन्ट त्रिभुवनचन्द्र झाले हरेक दिन ५५ सिलिण्डर उत्पादन क्षमता भएकोले पहिला जस्तो अक्सिजन अभाव झेलेर बिरामी बाहिर पठाउनु पर्ने अवस्था नआउने बताउनु भयो ।

अनलाइन डेस्क