समाचारहरू

भदौ २९ गते १ हजार १ सय ८० जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ७९ हजार ४ सय ९२ पुगेको स्वास्थ्य तथा जनसङ्ख्या मन्त्रालयले जनाएको छ । भदौ २९ गते परीक्षण गरिएकामध्ये ११ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.३ प्रतिशतमा सङ्क्रमण पुष्टि भएको छ । गत २४ घण्टामा १० हजार २ सय ६६ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख ४२ हजार ३ सय ६ जना निको भएका छन् । भदौ २९ गते १ हजार ५ सय ८९ जना निको भएका छन् भने निको हुनेको दर ९५.२ प्रतिशत रहेको मन्त्रालयले जनाएको छ । भदौ २९ गतेसम्म १० हजार ९ सय ८४ जना कोभिड सङ्क्रमितको मृत्यु भएको मन्त्रालयले जनाएको छ । भदौ २९ गते १९ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २६ हजार २ सय २ रहेको छ ।

स्वास्थ्य मन्त्रालयका अनुसार भदौ २९ गते ४ हजार १ सय ७७ ओटा स्वाब एण्टिजेन विधिबाट परीक्षण गरेकामा ३ सय ८२ जनालाई कोभिड पुष्टि भएको छ ।  भदौ २९ गतेसम्म एण्टिजेन परीक्षणबाट ८७ हजार ४ सय १३ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ २९ गतेसम्म ५२ लाख ४३ हजार २ सय ३६ जनाले पूर्ण खोप पाइसकेका छन् ।

मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, मकवानपुर, काभ्रेपलाञ्चोक, नवलपरासी पूर्व, कास्की, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् ।

ओखलढुङ्गा प्रतिनिधि सरस्वती बानियाका अनुसार भदौ २८ गतेदेखि स्मार्ट लकडाउन लागू गरिएको छ । नेपाल सरकारको निर्णय अनुसार यसअघि बन्द रहेका सबै क्षेत्र खुल्ला गर्दै स्वास्थ्य मापदण्डलाई अनिवार्य पालना गर्न जोड दिइएको छ । नेपाल सरकारले जारी गरेको स्मार्ट लकडाउन कार्यविधि २०७८ बमोजिम अनिवार्य स्वास्थ्य मापदण्डलाई पालना गर्दै सबैक्षेत्र खुल्ला गर्ने निर्णय स्मार्ट लकडाउन हो । स्मार्ट लकडाउनलाई कार्यान्वयन गर्दै स्वास्थ्य सुरक्षाको मापदण्डलाई अनिवार्य पालना गर्न भनिएको प्रमुख जिल्ला अधिकारी बन्दना राईले बताउनु भएको छ । स्वास्थ्य सुरक्षाको मापदण्डलाई कडाईका साथ पालना गराउँदै स्वास्थ्य सेवा, नियमित कार्यालय सञ्चालन, सानो समूहमा बैठक, गोष्ठी तथा सेमिनार सञ्चालन गर्न पाउने उल्लेख गरिएको छ । शैक्षिक संस्था, पसल, कोल्ड स्टोर, डिपार्टमेन्टल स्टोर, यातयात, ढुवानी आपूर्ति, मठ, मन्दिर तथा सामाजिक रितिरिवाज पनि सानो समूहमा खुल्ला गरिएको छ । यसबाहेक उद्योग व्यवसाय, होटल तथा रेस्टुरेन्ट, कृषि उत्पादन, खेलकुद, घरायसी भेटघाट तथा हाटबजार लगायतका क्षेत्र पनि स्वास्थ्य मापदण्डलाई अनिवार्य पालना गराउँदै खुल्ला गरिएको छ ।

अनलाइन डेस्क