कोभिड–१९ को सङ्क्रमणसम्बन्धी दैनिक अपडेट (भदौ २७ गते)

भदौ २७ गते ८ सय ३८ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ७७ हजार १ सय ६३ पुगेको स्वास्थ्य तथा जनसङ्ख्या मन्त्रालयले जनाएको छ । भदौ २७ गते परीक्षण गरिएकामध्ये ११ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.३ प्रतिशतमा सङ्क्रमण पुष्टि भएको छ । गत २४ घण्टामा ७ हजार ८ सय ७८ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख ३९ हजार ४ सय ५७ जना निको भएका छन् । भदौ २७ गते १ हजार ४ सय २३ जना निको भएका छन् भने निको हुनेको दर ९५.१ प्रतिशत रहेको मन्त्रालयले जनाएको छ । भदौ २७ गतेसम्म १० हजार ९ सय ४९ जना कोभिड सङ्क्रमितको मृत्यु भएको मन्त्रालयले जनाएको छ । भदौ २७ गते १३ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २६ हजार ७ सय ५५ रहेको छ ।

स्वास्थ्य मन्त्रालयका अनुसार भदौ २७ गते ३ हजार १ सय ४० ओटा स्वाब एण्टिजेन विधिबाट परीक्षण गरेकामा ७३ जनालाई कोभिड पुष्टि भएको छ ।  भदौ २७ गतेसम्म एण्टिजेन परीक्षणबाट ८६ हजार ६ सय ९४ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ २७ गतेसम्म ५१ लाख ६६ हजार ६ सय ८९ जनाले पूर्ण खोप पाइसकेका छन् ।

मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, मकवानपुर, काभ्रेपलाञ्चोक, नवलपरासी पूर्व, कास्की, बागलुङ, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् ।

Corona Infographics 2078-05-27

ताप्लेजुङ प्रतिनिधि देवराज गुरुङका अनुसार फक्ताङलुङ गाउँपालिका–७ स्थित याङ्माका २७ जना नागरिक कोभिड–१९ विरूद्धको दोस्रो खोपको मात्रा लगाउनबाट वञ्चित भएका छन् । १० जना कोभिशिल्ड र १७ जना स्थानीय भेरोसिल खोपको दोस्रो मात्र लगाउनका लागि प्रतिक्षामा बसेपनि खोप टोली पुग्न नसकेकाले खोप लगाउनबाट वञ्चित भएका हुन् । खोपको लागि खटिएको ओलाङचुङगोला स्वास्थ्य चौकीका अहेब मङ्गल वनेम र कार्यालय सहयोगी डुण्डु शेर्पा बाटोबाटै फर्किएका छन् । अहेब वनेमले इन्सेक प्रतिनिधिसँगको फोन सम्पर्कमा भन्नु भयो-'हामी भदौ २२ गते बाटो लागेका थियौ । तर, आधा बाटोबाट फर्कन बाध्य भयौँ ।' याङ्मा बस्तीको उचाई ४ हजार २ सय हो । तर, ५ हजार २ सय उचाईको बाटो काट्नुपर्ने र फेरि झर्नुपर्ने भौगोलिक बनावट भएकाले पुग्न कठिन भएको उहाँले बताउनु भयो । उक्त गाउँमा १३ परिवारका ५२ जनाको बसोवास रहेको गाउँपालिका अध्यक्ष सरोज एभेङले बताउनु भयो । ती मध्ये २० जना काम विशेषले सदरमुकाम तथा काठमाडौँतिर भएकाले हाल ३२ जना याङमा बस्दै आएका छन् । चीनसँग सिमा जोडिएको ओलाङचुङगोलास्थित याङ्मा बस्ती सञ्चारविहिन छ । आउँदो दशैँ आसपासमा खोप लगाउने वडाध्यक्ष छेतेन शेर्पा भोटेले जानकारी दिनु भएको छ । भदौ महिनाको अन्त्यसँगै झरी बादल हट्ने र मौसम खुल्ने भएकाले बाटो मर्मत तथा आवतजावत सहज बन्ने भएकाले दशैँसम्ममा खोप लगाउने सम्भावना रहेको वडाध्यक्ष छेतेन शेर्पाको भनाइ छ ।


अनलाइन डेस्क