कोभिड–१९ को सङ्क्रमणसम्बन्धी दैनिक अपडेट (भदौ २५ गते)
भदौ २५ गते ९ सय ६१ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ७५ हजार ५ सय ४८ पुगेको स्वास्थ्य तथा जनसङ्ख्या मन्त्रालयले जनाएको छ । भदौ २५ गते परीक्षण गरिएकामध्ये ११ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.३ प्रतिशतमा सङ्क्रमण पुष्टि भएको छ । गत २४ घण्टामा ८ हजार ५ सय ४९ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख ३६ हजार ६ सय ६६ जना निको भएका छन् । भदौ २५ गते १ हजार ६ सय ६० जना निको भएका छन् भने निको हुनेको दर ९५ प्रतिशत रहेको मन्त्रालयले जनाएको छ । भदौ २५ गतेसम्म १० हजार ९ सय २४ जना कोभिड सङ्क्रमितको मृत्यु भएको मन्त्रालयले जनाएको छ । भदौ २५ गते २१ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २७ हजार ९ सय ५८ रहेको छ ।
स्वास्थ्य मन्त्रालयका अनुसार भदौ २५ गते २ हजार ३ सय ६७ ओटा स्वाब एण्टिजेन विधिबाट परीक्षण गरेकामा १ सय ८५ जनालाई कोभिड पुष्टि भएको छ । भदौ २५ गतेसम्म एण्टिजेन परीक्षणबाट ८६ हजार ४ सय ४ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ २५ गतेसम्म ५१ लाख २० हजार ८ सय ७७ जनाले पूर्ण खोप पाइसकेका छन् ।
मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, नुवाकोट, नवलपरासी पूर्व, कास्की, बागलुङ, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् ।
धादिङ प्रतिनिधि सीताराम अधिकारीका अनुसार स्थानीय प्रशासनले जिल्लामा भदौ २५ गते राति १२ बजेदेखि असोज ४ गते राति १२ बजेसम्मका लागि निषेध आदेश जारी गरेको छ । शैक्षिक संस्थाहरूले भौतिक उपस्थितिमा पठनपाठन गराउन पर्ने भएमा नेपाल सरकारको कोभिड–१९ सङ्क्रमण जोखिम नियन्त्रणको प्रावधानभित्र रही स्थानीय तहहरूले समितिसँग समन्वय गरी विद्यालय सञ्चालन गर्न सकिने स्पष्ट पारेको छ । धार्मिक स्थलमा गरिने नित्य पुजाबाहेक अनावश्यक जमघट, भेला, भिडभाड, सभा जुलुस, जात्रा, महोत्सव जस्ता कार्यहरू नगर्न निषेध आदेशमा उल्लेख गरेको छ ।
काभ्रे प्रतिनिधि हिरामान तामाङका अनुसार जिल्ला प्रशासन कार्यालयले १० दिनका लागि मिश्रित लकडाउन थप्ने निर्णय गरेको छ । कोभिड सङ्क्रमणका कारण यहाँका अस्पतालमा बिरामी भर्ना दर बढेकाले लकडाउनको समय थप गरिएको हो । यसअघि १० दिन थप गरिएको मिश्रित लकडाउन भदौ २५ गते राति १२ बजेसम्म रहेकामा जोखिम मूल्याङ्कन बमोजिम असोज ५ गते राति १२ बजेसम्मका लागि थप गरिएको प्रमुख जिल्ला अधिकारी शिवराम पोखरेलले जानकारी दिनु भयो ।