समाचारहरू

कात्तिक २१ गते २ हजार ९ सय ९ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ८८ हजार ८ सय ८३ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १० हजार १ सय ५३ जनाको स्वाब परीक्षण गरिएको मन्त्रालयले जनाएको छ । सङ्क्रमितमध्ये १ लाख ५२ हजार ९ सय ८ जना निको भएका छन् । कात्तिक २१ गते ४ हजार ५ सय जना निको भएका छन् भने निको हुनेको दर ८१ प्रतिशत रहेको मन्त्रालयले जनाएको छ । कात्तिक २१ गतेसम्म १ हजार ७० जना कोभिड सङ्क्रमितको मृत्यु भएको मन्त्रालयले जनाएको छ । ३४ हजार ९ सय ५ जनाको उपचार भइरहेको छ । २८ हजार ९ सय ९३ जना होम आइसोलेशनमा छन् भने ३ सय ८० जनाको उपचार आइसीयूमा र ८३ जनाको उपचार भेण्टिलेटरमा भइरहेको छ ।

गण्डकी प्रदेश
कास्की प्रतिनिधि सुशन घिमिरेका अनुसार कर्मचारीमा कोभिड–१९ सङ्क्रमण पुष्टि भएपछि रुपा गाउँपालिकाको सम्पूर्ण सेवा कात्तिक २१ गतेदेखि बन्द गरिएको छ । गाउँपालिका अध्यक्ष नवराज ओझाले गाउँपालिकाका एक कर्मचारीमा कोभिड पुष्टि भएकाले कात्तिक २१ गतेदेखि कात्तिक २३ गतेसम्म कार्यालय बन्द गरिएको जानकारी दिनुभयो । उहाँले गाउँपालिकावासीलाई सुरक्षित राख्ने हेतुले कार्यालय बन्द गरिएको बताउनुभयो । ‘सङ्क्रमण थप नफैलियोस् भनेर कार्यालय बन्द गर्नुको विकल्प रहेन ।’–उहाँले भन्नुभयो ।
म्याग्दी प्रतिनिधि अमृतप्रसाद पौडेलका अनुसार बेनी नगरपालिका थप एक हप्ता सील गर्ने निर्णय गरिएको छ । गत कात्तिक १४ देखि कात्तिक २१ गते राति १२ बजेसम्मका लागि अत्यावश्यक बाहेकका सबै सेवा एक हप्ताका लागि सील गरिएको थियो । जिल्ला कोभिड–१९ सङ्कट व्यवस्थापन केन्द्रको कात्तिक २१ गते बसेको बैठकले बेनी नगरपालिका कात्तिक २१ गतेदेखि कात्तिक २८ गते राति १२ बजेसम्म सील गर्ने निर्णय गरेको हो ।

अनलाइन डेस्क