समाचारहरू

भदौ १७ गते १ हजार ६ सय १९ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ६५ हजार ९ सय १४ पुगेको स्वास्थ्य तथा जनसङ्ख्या मन्त्रालयले जनाएको छ । भदौ १७ गते परीक्षण गरिएकामध्ये १५ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.५ प्रतिशतमा सङ्क्रमण पुष्टि भएको छ । गत २४ घण्टामा १० हजार ६ सय ५८ ओटा स्वाब पिसिआर परीक्षणका लागि सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख २१ हजार १ सय ८२ जना निको भएका छन् । भदौ १७ गते १ हजार ८ सय ४६ जना निको भएका छन् भने निको हुनेको दर ९४.२ प्रतिशत रहेको मन्त्रालयले जनाएको छ । भदौ १७ गतेसम्म १० हजार ७ सय ८६ जना कोभिड सङ्क्रमितको मृत्यु भएको मन्त्रालयले जनाएको छ । भदौ १७ गते १६ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३३ हजार ९ सय ४६ रहेको छ ।

स्वास्थ्य मन्त्रालयका अनुसार भदौ १७ गते ३ हजार ९ सय ९२ ओटा स्वाब एण्टिजेन विधिबाट परीक्षण गरेकामा ३ सय ८५ जनालाई कोभिड पुष्टि भएको छ ।  भदौ १७ गतेसम्म एण्टिजेन परीक्षणबाट ८४ हजार २ सय ९४ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ १७ गतेसम्म ४६ लाख ७७ हजार ९ सय ७६ जनाले पूर्ण खोप पाइसकेका छन् ।

मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, सिन्धुपाल्चोक, नुवाकोट, नवलपरासी पूर्व, कास्की, बागलुङ, गोरखा, स्याङ्जा, तनहुँ, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् ।

गोरखा प्रतिनिधि हरिराम उप्रेतीका अनुसार जिल्लामा जारी निषेध आदेश असोज २ गतेसम्म थप गरिएको छ । कोभिड व्यवस्थापन समितिको भदौ १७ गते बसेको बैठकको सिफारिसमा सहायक प्रमुख जिल्ला अधिकारी कमलराज भण्डारीले निषेध आदेशको अवधि थप गर्नुभएको हो । विद्यमान सङ्क्रमणको दर, प्रवृत्ति र मृत्यूदरको आधारमा निषेध आदेश भदौ १८ गतेबाट असोज २ गतेसम्म थप भएको जिल्ला प्रशासन कार्यलयका अधिकृत हर्क रोकाले बताउनुभयो । यसपटकको निषेध आदेशको अवधिमा यसअघि सवारी साधनमा लगाइएको जोर विजोर प्रणाली हटाइएको छ ।

म्याग्दी प्रतिनिधि अमृतप्रसाद पौडेलका अनुसार मुस्ताङमा जारी निषेध आदेश भदौ २२ गतेसम्म थप गरिएको छ । जिल्ला कोभिड-१९ सङ्कट व्यवस्थापन समितिको भदौ १५ गतेको बैठकको निर्णय अनुसार जिल्ला प्रशासन कार्यालय मुस्ताङले सूचना जारी गर्दै निषेध आदेशको अवधि थप गरिएको जनाएको हो ।

कास्की प्रतिनिधि सुशन घिमिरेका अनुसार जिल्लामा जारी निषेध आदेश भदौ ३१ गतेसम्म थप गरिएको छ । प्रमुख जिल्ला अधिकारी थानेश्वर गौतमले भदौ १७ गते सूचना प्रकाशन गरी जिल्लामा निषेध आदेश भदौ १८ गते राति १२ बजेदेखि भदौ ३१ गते राति १२ बजेसम्म थप गरिएको जानकारी दिनुभएको छ ।

अनलाइन डेस्क