कोभिड–१९ को सङ्क्रमणसम्बन्धी दैनिक अपडेट (भदौ १२ गते)

भदौ १२ गते १ हजार ५ सय १६ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ५८ हजार ८ पुगेको स्वास्थ्य तथा जनसङ्ख्या मन्त्रालयले जनाएको छ । भदौ १२ गते परीक्षण गरिएकामध्ये १६ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.५ प्रतिशतमा सङ्क्रमण पुष्टि भएको छ । गत २४ घण्टामा ९ हजार ४ सय ९ ओटा पिसिआर परीक्षणका लागि स्वाब सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख १० हजार ४ सय ५२ जना निको भएका छन् । भदौ १२ गते २ हजार २ सय २२ जना निको भएका छन् भने निको हुनेको दर ९३.७ प्रतिशत रहेको मन्त्रालयले जनाएको छ । भदौ १२ गतेसम्म १० हजार ६ सय ९० जना कोभिड सङ्क्रमितको मृत्यु भएको मन्त्रालयले जनाएको छ । भदौ १2 गते २७ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३६ हजार ८ सय ६६ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, सिन्धुपाल्चोक, नुवाकोट, नवलपरासी पूर्व, कास्की, बागलुङ, गोरखा, स्याङ्जा, तनहुँ, दाङ, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् । स्वास्थ्य मन्त्रालयका अनुसार भदौ १२ गते ३ हजार ७ सय ६७ ओटा स्वाब एण्टिजेन विधिबाट परीक्षण गरेकामा ३ सय ४१ जनालाई कोभिड पुष्टि भएको छ ।  भदौ १२ गतेसम्म एण्टिजेन परीक्षणबाट ८२ हजार ४ सय ५६ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ १२ गतेसम्म ४० लाख ५२ हजार ७ सय ६५ जनाले पूर्ण खोप पाइसकेका छन् । मन्त्रालयद्वारा जारी अवस्था प्रतिवेदन अभिलेखमा भदौ ११ र १२ गते पूर्ण खोप लगाउनेको सङ्ख्या उही देखिन्छ ।

Corona Infographics 2078-05-12

ओखलढुङ्गा प्रतिनिधि सरस्वती बानियाका अनुसार जिल्लामा जारी निषेध आदेशको समय भदौ २७ गते सम्मका लागि थप गरिएको छ । जिल्ला कोभिड सङ्कट व्यवस्थापन केन्द्रको भदौ १२ गतेको बैठकले निषेध आदेशको समय थप गर्ने निर्णय गरिएको प्रमुख जिल्ला अधिकारी बन्दना राईले बताउनु भएको छ ।

सङ्खुवासभा प्रतिनिधि भविन कार्कीका जिल्लामा जारी निषेध आदेशको समय भदौ २१ गते सम्मका लागि थप गरिएको छ । निषेध आदेशको समयमा स्वास्थ्य मापदण्ड अपनाएर सबै प्रकारका पसलहरू बिहान ६ बजेदेखि साँझ ६ बजेसम्म मात्र खुल्ला गर्ने पाइने निर्णय गरिएको निमित्त प्रमुख जिल्ला अधिकारी मोहनमणि घिमिरे बताउनु भएको छ ।

भोजपुर प्रतिनिधि गणेश विष्टका अनुसार समुदायस्तरमा कोभिड–१९ को सङक्रमण फैलिएपछि टेम्केमैयुङ गाउँपालिका–१ तिम्माको  वडा कार्यालयबाट प्रवाह हुने सेवा भदौ १९ गतेसम्म बन्द गर्ने निर्णय गरिएको वडाध्यक्ष नरबहादुर राईले बताउनु भएको छ । वडाका विभिन्न स्थानमा कोभिड–१९ को सङक्रमण पुष्टि भएपछि सेवा प्रवाह गर्दा समुदायस्तरमा थप सङक्रमण फैलन सक्ने भएकोले सेवा बन्द गर्ने निर्णय गरिएको वडाध्यक्ष राईले बताउनु भएको छ ।

रामेछाप प्रतिनिधि नवराज घिमिरेका अनुसार कोभिड–१९ सङ्क्रमण नियन्त्रणमा नआएपछि रामेछाप नगरपालिकाले अत्यावश्यक सेवा बाहेकका सबै सेवा बन्द गरेको छ । नगरपालिकाले भदौ ११ गते एक सूचना जारी गरी भदौ २२ गतेसम्म पालिकाले प्रदान गर्ने सेवा बन्द गरेको जनाएको हो । जिल्लामा स्थानीय प्रशासनले पनि भदौ २२ गतेसम्मका लागि निषेध आदेश जारी गरेपछि रामेछाप नगरपालिकाले स्वास्थ्य सेवा र फोहोरमैला व्यवस्थापन बाहेकका सेवा बन्द गरिएको प्रमुख प्रशासकीय अधिकृत रामचन्द्र लाम्गादेले जानकारी दिनुभयो ।


अनलाइन डेस्क