समाचारहरू

भदौ ८ गते २ हजार २० जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ५१ हजार १ पुगेको स्वास्थ्य तथा जनसङ्ख्या मन्त्रालयले जनाएको छ । भदौ ८ गते परीक्षण गरिएकामध्ये २० प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.५ प्रतिशतमा सङ्क्रमण पुष्टि भएको छ । गत २४ घण्टामा ९ हजार ९ सय ९ ओटा पिसिआर परीक्षणका लागि स्वाब सङ्कलन गरेको पनि मन्त्रालयले जनाएको छ । सङ्क्रमितमध्ये ७ लाख २ हजार १ सय ८३ जना निको भएका छन् । भदौ ८ गते २ हजार ८६ जना निको भएका छन् भने निको हुनेको दर ९३.५ प्रतिशत रहेको मन्त्रालयले जनाएको छ । भदौ ८ गतेसम्म १० हजार ५ सय ६८ जना कोभिड सङ्क्रमितको मृत्यु भएको मन्त्रालयले जनाएको छ । भदौ ८ गते ३५ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३८ हजार २ सय ५० रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, सिन्धुपाल्चोक, दोलखा, नुवाकोट, नवलपरासी पूर्व, कास्की, बागलुङ, गोरखा, स्याङ्जा, तनहुँ, दाङ, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् । स्वास्थ्य मन्त्रालयका अनुसार भदौ ८ गते ४ हजार ९ सय १ ओटा स्वाब एण्टिजेन विधिबाट परीक्षण गरेकामा ५ सय ५ जनालाई कोभिड पुष्टि भएको छ ।  भदौ ८ गतेसम्म एण्टिजेन परीक्षणबाट ८० हजार ९ सय ६७ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ ८ गतेसम्म ३८ लाख ५७ हजार ५ सय ९८ जनाले पूर्ण खोप पाइसकेका छन् ।

तनहुँ प्रतिनिधि प्रकाशचन्द्र भट्टराईका अनुसार भदौ १४ गतेसम्मका लागि निषेध आदेश जारी गरिएको छ । प्रमुख जिल्ला अधिकारी सागर आचार्यले भदौ ७ गते सूचना प्रकाशन गरी आगामी भदौ १४ गतेसम्म निषेध आदेश लम्ब्याउनु भएको हो । यसअघि भदौ ७ गते दिउँसो जिल्ला प्रशासन कार्यालयमा बसेको जिल्ला कोभिड व्यवस्थापन समिति (डिसिएमसिसी) को बैठकले तनहुँमा कोभिडको जोखिम अझै कम नभएको र पछिल्लो दिनमा सङ्क्रमितको सख्या बढ्दै गएको तथा छिमेकी जिल्लाहरुमा नयाँ डेल्टा भेरियन्टको सङ्क्रमण देखिएको हुँदा जारी निषेध आदेशलाई निरन्तरता दिन प्रमुख जिल्ला अधिकारीलाई सिफारिस गरेको थियो । सोही अनुसार प्रमुख जिल्ला अधिकारीबाट निषेध आदेश जारी भएको हो । तनहुँमा कोभिडको जोखिम अझै कम नभएको र सक्रिय सङ्क्रमितको सङ्ख्या पनि धेरै नै भएको तथा छिमेकी जिल्लाहरुमा नयाँ डेल्टा भेरियन्टको सङ्क्रमण देखिएको हुँदा जारी निषेध आदेशलाई निरन्तरता दिनुपर्ने देखिएको सहायक प्रमुख जिल्ला अधिकारी चित्राङद बरालले बताउनु भयो । कोभिड–१९ को जोखिमबाट बच्न भन्दै गत वैशाख २२ गतेबाट जारी भएको निषेध आदेश पटक पटक थप गर्दै पछिल्लो पटक भदौ ७ गतेसम्मका लागि लम्ब्याइएको थियो । निषेध आदेशको सूचना अनुसार तरकारी, फलफुल, माछा मासु तथा खाद्यान्न पसल बिहान ५ देखि ११ बजेसम्म र त्यस बाहेक खोल्न अनुमति दिइएका अन्य व्यवसाय भने मध्यान्ह १२ बजेदेखि साँझ ६ बजेसम्म खोल्न पाइने भएको छ ।

अनलाइन डेस्क