समाचारहरू

भदौ ४ गते २ हजार ७९ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ४४ हजार ३ सय ७ पुगेको स्वास्थ्य तथा जनसङ्ख्या मन्त्रालयले जनाएको छ । भदौ ४ गते परीक्षण गरिएकामध्ये २० प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.५ प्रतिशतमा सङ्क्रमण पुष्टि भएको छ । गत २४ घण्टामा १० हजार ५ सय ३० ओटा पिसिआर परीक्षणका लागि स्वाब सङ्कलन गरेको पनि मन्त्रालयले जनाएको छ । सङ्क्रमितमध्ये ६ लाख ९३ हजार ५ सय ४२ जना निको भएका छन् । भदौ ४ गते २ हजार २ सय ४४ जना निको भएका छन् भने निको हुनेको दर ९३.१ प्रतिशत रहेको मन्त्रालयले जनाएको छ । भदौ ४ गतेसम्म १० हजार ४ सय ५५ जना कोभिड सङ्क्रमितको मृत्यु भएको मन्त्रालयले जनाएको छ । भदौ ४ गते २६ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ४० हजार ३ सय ९ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, सिन्धुपाल्चोक, दोलखा, नुवाकोट, नवलपरासी पूर्व, कास्की, बागलुङ, गोरखा, स्याङ्जा, दाङ, रुपन्देही, सुर्खेत र कैलालीमा सक्रिय सङ्क्रमित ५ सयभन्दा बढी रहेका छन् । स्वास्थ्य मन्त्रालयका अनुसार भदौ ४ गते ७ हजार १ सय २४ ओटा स्वाब एण्टिजेन विधिबाट परीक्षण गरेकामा ९ सय ६३ जनालाई कोभिड पुष्टि भएको छ ।  भदौ ४ गतेसम्म एण्टिजेन परीक्षणबाट ७९ हजार ३ सय ४० जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ ४ गतेसम्म ३७ लाख ९९ हजार १ सय ७८ जनाले पूर्ण खोप पाइसकेका छन् ।

काभ्रे प्रतिनिधि हिरामान तामाङका अनुसार जिल्ला प्रशासन कार्यालयले विश्वव्यापी रुपमा फैलिएको कोभिड–१९ को सङ्क्रमण दर बढेपछि भदौ ४ गतेदेखि भदौ १५ गतेसम्म स्मार्ट लकडाउनको आदेश जारी गरेको छ । प्रमुख जिल्ला अधिकारी शिवराम पोखरेलद्वारा भदौ ३ गते जारी आदेशमा स्मार्ट लकडाउनको अवधिभर सबै प्रकारका भेला, जुलुस, सभा, सम्मेलन, सिनेमा हल, रेष्टुरेन्ट, क्लब, स्वीमिङ पुल, मनोरञ्जन स्थल, शैलुन, ब्युटि पार्लर आदि सञ्चालन गर्ने पाइने छैन् । साथै हाट, मेला, जात्रा, महोत्सव, पार्टि भोज जस्ता भिडभाड हुने कार्य नगर्ने र गोष्ठी, सेमीनार, बैठक, समीक्षा प्रशिक्षण जस्ता क्रियाकलापहरु भर्चुअल माध्यमबाट सञ्चालन गर्नु आग्रह गरिएको छ । यसैगरी, सार्वजनिक सवारी साधन सञ्चालन गर्दा  कुल सिट क्षमता भन्दा बढी यात्रु नराखी निर्धारित जनस्वास्थ्य मापदण्ड अनिवार्य पालना गर्ने भनिएको छ ।

बागलुङ प्रतिनिधि सिर्जना पन्तका अनुसार जिल्लामा थप पाँच दिन निषेध आदेश थपिएको छ । जिल्लामा कोभिड सङ्क्रमितको दर उच्च गतिमा फैलिएपछि यसको नियन्त्रणका लागि पाँच दिन जिल्लाभर कडाइका साथ लागु हुने गरी निषेध आदेश थपिएको जिल्ला प्रशासन कार्यालय बागलुङले जनाएको छ ।  प्रमुख जिल्ला अधिकारी शिवकुमार कार्कीको अध्यक्षतामा भदौ ४ गते बसेको बैठकले आगामी भदौ १० गतेसम्मका लागि निषेध आदेश थप गरेको हो । यस अवधिमा स्वास्थ्य सामग्री तथा औषधि पसल चौबिसै घण्टा खुल्ने छन् भने फलफूल, तरकारी, दाना लगायतका पसल भने बिहान १० बजेसम्म मात्रै सञ्चालन हुने बताइएको छ । जिल्लामा अहिले कोभिडविरुद्ध को खोप अभियान पनि जारी छ । खोप केन्द्रमा नागरिकको भीडभाड व्यवस्थापन नहुँदा सङ्क्रमण थप बढ्ने जोखिम रहेको स्थानीयले गुनासो गरेका छन् ।

अनलाइन डेस्क