समाचारहरू

भदौ ३ गते २ हजार ३ सय २१ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ४२ हजार २ सय २८ पुगेको स्वास्थ्य तथा जनसङ्ख्या मन्त्रालयले जनाएको छ । भदौ ३ गते परीक्षण गरिएकामध्ये  प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.५ प्रतिशतमा सङ्क्रमण पुष्टि भएको छ । गत २४ घण्टामा ११ हजार ९ सय ४६ ओटा पिसिआर परीक्षणका लागि स्वाब सङ्कलन गरेको पनि मन्त्रालयले जनाएको छ । सङ्क्रमितमध्ये ६ लाख ९१ हजार २ सय ९९ जना निको भएका छन् । भदौ ३ गते २ हजार १ सय २६ जना निको भएका छन् भने निको हुनेको दर ९३.१ प्रतिशत रहेको मन्त्रालयले जनाएको छ । भदौ ३ गतेसम्म १० हजार ४ सय २९ जना कोभिड सङ्क्रमितको मृत्यु भएको मन्त्रालयले जनाएको छ । भदौ ३ गते ३३ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ४० हजार ५ सय रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, सिन्धुपाल्चोक, दोलखा, नुवाकोट, नवलपरासी पूर्व, कास्की, बागलुङ, गोरखा, स्याङ्जा, तनहुँ, दाङ, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् । स्वास्थ्य मन्त्रालयका अनुसार भदौ ३ गते ४ हजार ४ सय ९२ ओटा स्वाब एण्टिजेन विधिबाट परीक्षण गरेकामा ७ सय ५४ जनालाई कोभिड पुष्टि भएको छ ।  भदौ ३ गतेसम्म एण्टिजेन परीक्षणबाट ७८ हजार ३ सय ७७ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ ३ गतेसम्म ३७ लाख ८ हजार ६ सय ८८ जनाले पूर्ण खोप पाइसकेका छन् ।

दोलखा प्रतिनिधि उद्धव पोखरेलका अनुसार जिल्ला सदरमुकाम चरिकोटमा जारी निषेध आदेश पुनः सात दिनका लागि थप गरिएको छ । जिल्ला कोभिड सङ्कट व्यवस्थापन केन्द्र (डिसिसिएमसि) को भदौ २ गते बसेको बैठकले जिल्लामा कोराना सङ्क्रमितको सङ्ख्या बढ्दै गएको भन्दै आगामी भदौ ९ गतेसम्मका लागि सदरमुकाम चरिकोट क्षेत्र पूर्ण रूपमा बन्द गर्ने निर्णय गरेको प्रमुख जिल्ला अधिकारी बासुदेव घिमिरेल बताउनु भयो । भीमेश्वर नगरपालिकाको वडा नम्बर ३ र ६ भित्र पर्ने चरिकोट बजारका लागि जारी गरिएको निशेधाज्ञामा सम्पूर्ण पसल, व्यापार, होटल, रेष्टुरेन्ट लगायत अन्य सबै व्यवसाय सहित बैङ्क तथा वित्तिय संस्था सहकारी संस्थाहरू पूर्ण रुपमा बन्द भएका छन् । निषेध आदेशको समयमा भिडभाड हुने कुनै पनि किसिमको सभा, सम्मेलन, विवाह ब्रतबन्ध, धार्मिक, सांस्कृतिक गतिविधिहरू गर्न समेत रोक लगाइएको प्रमुख जिल्ला अधिकारी घिमिरेद्वारा सूचनामा उल्लेख गरिएको छ । चरिकोट बजार क्षेत्रमा यातायातका साधन सञ्चालनमा रोक लगाइएको भए पनि लामो दुरीका यातायाता साधान भने सञ्चालन भएका छन् । जिल्ला स्थित सरकारी कार्यालयहरूले पनि गाउँपालिका अनुसार तालिका बनाई सेवा प्रवाह गर्दै आएका छन् ।

कास्की प्रतिनिधि सुशन घिमिरेका अनुसार जिल्लामा जारी रहेको निषेध आदेशमा कडाई गर्दै थप गरिएको छ । जिल्ला प्रशासन कार्यालय कास्कीले भदौ २ गते सूचना जारी गर्दै जिल्लामा जारी रहेको निषेध आदेश भदौ ३ गते राति १२ बजेदेखि भदौ १० गते राति १२ बजेसम्म गप भएको छ । जारी गरिएको आदेश अवधिभर सार्वजनिक तथा नीजि सवारी साधनमा जोरविजोर प्रणाली लागु गरिएको छ ।

म्याग्दी प्रतिनिधि अमृतप्रसाद पौडेलका अनुसार मुस्ताङमा जारी रहेको निषेध आदेश भदौ १५ गतेसम्म थप भएको छ । जिल्ला प्रशासन कार्यालय मुस्ताङले साउन ३२ गते एक सूचना प्रकाशन गरी निषेध आदेश साउन ३२ गते राति १२ बजेदेखि भदौ १५ गतेसम्म थप भएको जानकारी दिएको छ ।

पाल्पा प्रतिनिधि यज्ञमूर्ति तिमिल्सिनाका अनुसार समुदाय स्तरमासमेत कोभिड–१९ सङ्क्रमण फैलिएपछि रम्भा गाउँपालिका–२ फोक्सिङकोटको वडा कार्यालयबाट प्रवाह हुने सेवा भदौ ३ गतेदेखि १० गतेसम्म बन्द गर्ने निर्णय गरिएको वडा अध्यक्ष उमानसिंह सारूले बताउनु भयो । वडाका विभिन्न स्थानमा कोभिड सङ्क्रमण पुष्टि भइरहेको बेला सेवा प्रवाह गर्दा समुदाय स्तरमा थप सङ्क्रमण फैलन सक्ने भएकोले सेवा बन्द गर्ने निर्णय गरिएको सारूले बताउनु भयो ।

अनलाइन डेस्क