समाचारहरू

भदौ २ गते २ हजार ६ सय १३ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ३९ हजार ९ सय ७ पुगेको स्वास्थ्य तथा जनसङ्ख्या मन्त्रालयले जनाएको छ । भदौ २ गते परीक्षण गरिएकामध्ये २२ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.५ प्रतिशतमा सङ्क्रमण पुष्टि भएको छ । गत २४ घण्टामा ११ हजार ८ सय ३९ ओटा पिसिआर परीक्षणका लागि स्वाब सङ्कलन गरेको पनि मन्त्रालयले जनाएको छ । सङ्क्रमितमध्ये ६ लाख ८९ हजार १ सय ७३ जना निको भएका छन् । भदौ २ गते २ हजार १ सय ४ जना निको भएका छन् भने निको हुनेको दर ९३.१ प्रतिशत रहेको मन्त्रालयले जनाएको छ । भदौ २ गतेसम्म १० हजार ३ सय ९६ जना कोभिड सङ्क्रमितको मृत्यु भएको मन्त्रालयले जनाएको छ । भदौ २ गते ४२ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ४० हजार ३ सय ८८ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, सिन्धुपाल्चोक, दोलखा, नुवाकोट, नवलपरासी पूर्व, कास्की, बागलुङ, गोरखा, स्याङ्जा, तनहुँ, दाङ, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् । स्वास्थ्य मन्त्रालयका अनुसार भदौ २ गते ४ हजार ९ सय ९९ ओटा स्वाब एण्टिजेन विधिबाट परीक्षण गरेकामा ७ सय ९० जनालाई कोभिड पुष्टि भएको छ ।  भदौ २ गतेसम्म एण्टिजेन परीक्षणबाट ७७ हजार ६ सय २३ जनामा कोभिड पोजेटिभ पुष्टि भएको छ । यो सङ्ख्यामा उपचार, निको र कूल सङ्क्रमितमा जोडिएको भने पाइँदैन । मन्त्रालयका अनुसार भदौ २ गतेसम्म ३६ लाख ४९ हजार ७ सय ६० जनाले पूर्ण खोप पाइसकेका छन् ।

सङ्खुवासभा प्रतिनिधि भविन कार्कीका अनुसार मादी नगरपालिकाले कोभिड–१९ सङ्क्रमण बढेकाले भदौ २ गतेदेखि १० गतेसम्मका लागि सील गर्ने निर्णय गरेको छ । जिल्ला कोभिड सङ्कट व्यवस्थापन केन्द्रको भदौ २ गतेको बैठकले सील गर्ने निर्णय गरिएको नगरपालिका प्रमुख  विदुरसुब्बा लिङ्थेपले बताउनु भयो । सील गरिएको समयमा नगरपालिका बाट प्रवाह हुने अत्यावश्यक सेवा बाहेक सबै सेवासहित नगरपालिका कार्यालयका बन्द गर्ने निर्णय गरिएको छ ।

कास्की प्रतिनिधि सुशन घिमिरेका अनुसार पोखरा महानगरपालिका वडा नम्बर ५ ले भदौ १ गते विज्ञप्ति प्रकाशन गरी भदौ २ गतेदेखि भदौ ४ गतेसम्म वडा कार्यालयको अत्यावश्यक बाहेकका दैनिक सेवा बन्द गरेको जानकारी दिएको छ । वडा कार्यालयमा कार्यरत एक कर्मचारीमा कोभिड सङ्क्रमण पुष्टि भएको र अरु तीन जना कर्मचारीमा कोभिडको लक्षण देखिएपछि कन्ट्रयाक्ट ट्रेसिङको लागि सेवा बन्द गरिएको जानकारी दिएको छ ।

पाल्पा प्रतिनिधि यज्ञमूर्ति तिमिल्सिनाका अनुसार जिल्ला कोभिड–१९ व्यवस्थापन समितिको साउन ३२ गतेको बैठकले भदौ १२ गतेसम्म निषेध आदेश थप गर्ने निर्णय गरेको छ । यस अवधिमा बिहान ७ बजेदेखि साँझ ५ बजेसम्म उद्योग, कलकारखाना, पसल/व्यवसाय सञ्चालनमा आउने छन् । अत्यावश्यक सेवाहरू, औषधि पसल लगायतका सेवा भने सुचारु हुने प्रमुख जिल्ला अधिकारी योगेन्द्रप्रसाद पाण्डेले बताउनु भयो । शिक्षण क्रियाकलाप, सभा, गोष्ठी, धार्मिक कार्यक्रम, जुलुस, सम्मेलन लगायतका काम गर्न भने रोक लगाइएको प्रजिअ पाण्डेले बताउनु भयो ।

गुल्मी प्रतिनिधि टोपलाल अर्यालका अनुसार जिल्ला कोभिड–१९ व्यवस्थापन समितिको भदौ २ गते बसेको बैठकले कोभिडको सङ्क्रमण बढी भएका स्थानीय तहमा भदौ २ गतेबाट निषेध आदेश जारी गरेको प्रमुख जिल्ला अधिकारी रुद्रादेवी शर्माले बताउनु भयो । जिल्लाको मदाने गाउँपालिकामा भदौ २ गतेबाट भदौ ७ गतेसम्म, सत्यवति र छत्रकोट गाउँपालिकामा भदौ १० गतेसम्म निषेध आदेश जारी गरिएको प्रजिअ शर्माले बताउनु भयो । मदाने गाउँपालिकामा २० जना, सत्यवति गाउँपालिकामा १ सय ३२ र छत्रकोट गाउँपालिकामा  १ सय १६ जना सक्रिय सङ्क्रमित रहेका छन् भने जिल्लामा हालसम्म ६ सय ५६ जना सक्रिय सङ्क्रमित छन् ।

मालपोत कार्यालय सुर्खेतले दुई सातासम्म अत्यावश्यक बाहेकका सेवा बन्द गरेको छ । कर्मचारीमा कोभिड– १९ को सङ्क्रमण देखिएपछि कार्यालयले सूचना जारी गर्दै भदौ २ गतेदेखि १५ गतेसम्म अत्यावश्यक बाहेकका सेवा स्थगन गरिएको जनाएको छ । यस अवधिमा विभाग, अदालत, प्रशासन, अन्तर सम्बन्धित निकाय र प्रहरी कार्यालयसँग सम्बन्धित अत्यावश्यक सेवा भने नियमित सञ्चालन हुने जारी सूचनामा उल्लेख गरिएको छ ।

अनलाइन डेस्क