समाचारहरू

साउन २८ गते २ हजार ४ सय ७३ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख २५ हजार ७ सय ६९ पुगेको स्वास्थ्य तथा जनसङ्ख्या मन्त्रालयले जनाएको छ । साउन २८ गते परीक्षण गरिएकामध्ये २३ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.५ प्रतिशतमा सङ्क्रमण पुष्टि भएको छ । गत २४ घण्टामा १० हजार ८ सय ६ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ७७ हजार ३ सय ७७ जना निको भएका छन् । साउन २८ गते २ हजार २ सय ९४ जना निको भएका छन् भने निको हुनेको दर ९३.३ प्रतिशत रहेको मन्त्रालयले जनाएको छ । साउन २८ गतेसम्म १० हजार २ सय १२ जना कोभिड सङ्क्रमितको मृत्यु भएको मन्त्रालयले जनाएको छ । साउन २८ गते ३२ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३८ हजार १ सय ८० रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, सिन्धुपाल्चोक, दोलखा, नुवाकोट, नवलपरासी पूर्व, कास्की, बागलुङ, गोरखा, स्याङ्जा, तनहुँ, रुपन्देही, सुर्खेत र कैलालीमा सक्रिय सङ्क्रमित ५ सयभन्दा बढी रहेका छन् ।

सङ्खुवासभा प्रतिनिधि भविन कार्कीका अनुसार कोभिड–१९ को सङ्क्रमण बढेकाले मादी नगरपालिकाले साउन २८ गते राति १२ बजेदेखि भदौ ४ गते राति १२ बजेसम्म नगरपालिका सील गर्ने निर्णय गरेको छ । साउन २७ गतेको बैठकले सील गर्ने निर्णय गरिएको मादी नगरपालिका प्रमुख विदुर सुब्बा लिङ्थेपले बताउनु भयो । सील गरिएको समयमा नगरपालिकाबाट प्रवाह हुने अत्यावश्यक सेवा बाहेक सबै किसिमका सेवासहित नगरपालिका कार्यालय बन्द गर्ने निर्णय गरिएको नगरपालिकाले जनाएको छ ।

कास्की प्रतिनिधि सुशन घिमिरेका अनुसार जिल्ला प्रशासन कार्यालय कास्कीले साउन २७ गते सूचना जारी गर्दै भदौ ३ गते राति १२ बजेसम्मका लागि निषेध आदेश थप गरेको  छ । कोभिड–१९ को सङ्क्रमण दर र मृत्युदर बढेकाले यसअघि साउन ३ गते जारी गरिएको निषेध आदेशलाई पुनः निरन्तरता दिएको प्रशासनले जनाएको छ । जारी रहेको निषेध आदेश अवधि भरमा सवारी साधनमा जोरबिजोर प्रणाली हटाइएको छ भने लामो दुरीका सवारी साधन सम्बन्धित सङ्घसंस्थाको सिफारिसको आधारमा जिल्ला प्रशासन कार्यालयसँग समन्वय गरी सञ्चालन गर्न पाइने भनिएको छ । यस्तै प्रशासन कार्यालयले सरकारी तथा गैरसरकारी संस्थाहरुलाई होटल, रिसोर्टहरुमा कुनै पनि कार्यक्रम, भेला र गोष्ठी नगर्न आदेशमा उल्लेख गरेको छ ।

अनलाइन डेस्क