समाचारहरू

कात्तिक १८ गतेसम्म आइपुग्दा १ हजारभन्दा बढी कोभिड–१९ सङ्क्रमिकतको मृत्यु भएको स्वास्थ्य तथा जनसङ्ख्या मन्त्रालयले जनाएको छ । कात्तिक १८ गते थप २० जना सङ्क्रमितको मृत्यु भएपछि र्मत्यु हुनेको सङ्ख्या १ हजार ४ पुगेको हो । कात्तिक १८ गते ३ हजार १ सय १४ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ७९ हजार ६ सय १४ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ११ हजार १ सय ६६ जनाको स्वाब परीक्षण गरिएको मन्त्रालयले जनाएको छ । सङ्क्रमितमध्ये १ लाख ४१ हजार १ सय ३४ जना निको भएका छन् । कात्तिक १८ गते ३ हजार १ सय ४२ जना निको भएका छन् भने निको हुनेको दर ७८.६ प्रतिशत रहेको मन्त्रालयले जनाएको छ । ३७ हजार ४ सय ७६ जनाको उपचार भइरहेको छ । ३० हजार ६ सय ९४ जना होम आइसोलेशनमा छन् भने ३ सय ७२ जनाको उपचार आइसीयूमा र ६८ जनाको उपचार भेण्टिलेटरमा भइरहेको छ ।

प्रदेश १
झापा प्रतिनिधि नरेश खातीका अनुसार कोभिड–१९ सङ्क्रमितको सङ्ख्या प्रतिदिन बढ्न थालेपछि दमक नगरपालिकाले कात्तिक १९ गते साँझ ४ बजेदेखि बिहान ८ बजेसम्म अर्को सूचना नआएसम्मका लागि आंशिक लकडाउन गर्ने निर्णय गरेको उपप्रमुख गीता अधिकारीले जानकारी दिनु भयो । मेयर रोमनाथ ओलीको अध्यक्षतामा कात्तिक १७ गते बसेको कोरोना रोकथाम तथा नियन्त्रण समन्वय समितिको बैठकले आंशिक लकडाउन गर्ने निर्णय गरेको उपप्रमुख अधिकारीले बताउनु भयो । बेलुकीको समय भीडभाड हुने गरेकाले त्यसलाई रोक्न सो अवधिभित्र पूर्ण रूपमा बजार पसल तथा हिँड्डुलमा रोक लगाइएको अधिकारीले बताउनु भयो ।

अनलाइन डेस्क