समाचारहरू

साउन २४ गते २ हजार १ सय ३७ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख १४ हजार ८ सय ७७ पुगेको स्वास्थ्य तथा जनसङ्ख्या मन्त्रालयले जनाएको छ । साउन २४ गते परीक्षण गरिएकामध्ये २४ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.४ प्रतिशतमा सङ्क्रमण पुष्टि भएको छ । गत २४ घण्टामा ९ हजार ३३ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ६९ हजार २ सय ९९ जना निको भएका छन् । साउन २४ गते २ हजार २९ जना निको भएका छन् भने निको हुनेको दर ९३.६ प्रतिशत रहेको मन्त्रालयले जनाएको छ । साउन २४ गतेसम्म १० हजार ९३ जना कोभिड सङ्क्रमितको मृत्यु भएको मन्त्रालयले जनाएको छ । साउन २४ गते ५५ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३५ हजार ४ सय ८५ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, नुवाकोट, नवलपरासी पूर्व, बागलुङ, कास्की, गोरखा, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् । हालसम्म ४० प्रतिशत महिला र ६० प्रतिशत पुरुष सङ्क्रमित भएका छन् ।

चितवन प्रतिनिधि दिपेन्द्र अधिकारीका अनुसार जिल्लामा जारी रहेको निषेध आदेश कडाई गर्दै जाने र सङ्क्रमण बढेमा जुनसुकै बेलामा पूर्ण निषेध आदेश लागु गर्ने जनाएको छ । जिल्ला प्रशासन कार्यालयले साउन २४ गते एक सूचना जारी गर्दै कोरोना कोभिड–१९ को जोखिम बढ्दै गएकाले यसको रोकथामका लागि निषेधाज्ञामा साउन ३२ गतेसम्म लागु गर्दै निषेध आदेशमा कडाइ गरिएको हो । प्रशासनको आदेशअनुसार खाद्यान्न, तरकारी, फलफूल, दुध डेरी, माछामासु, अण्डा, चल्ला, दाना, खान पकाउने ग्यास पसल, एग्रोभेट, बीउबिजन, रासाायनिक मल र भेटेनरी औषधि पसल, पूजा सामग्री पसल दैनिक बिहान १० बजेसम्म मात्रै सञ्चालन गर्न पाइने व्यवस्था गरिएको छ । दुध डेरीको हकमा साँझ ५ बजेदेखि ७ बजेसम्म समेत सञ्चालन गर्न पाइने छ । यस्तै अन्य पसलहरू आइतबार, मङ्गलबार र बिहिबार दिउँसो १२ बजेदेखि साँझ ६ बजेसम्म सञ्चालन गर्न पाइने प्रशासनको आदेशमा उल्लेख छ । यस्तै सवारी साधन जोर गते जोर नम्बर र बिजोर गरे बिजोर नम्बर मात्रै सञ्चालन गर्न पाइने प्रमुख जिल्ला अधिकारी प्रेमलाल लामिछानेले बताउनुभयो ।

गोरखा प्रतिनिधि हरिराम उप्रेतिका अनुसार पाँच जना कर्मचारीमा कोभिड-१९ सङ्क्रमण देखिएपछि गोरखा नगरपालिकाले अत्यावश्यकबाहेकका सेवा बन्द गरेको छ । साउन २४ गते सूचना जारी गर्दै नगरपालिकाले पाँच जना कर्मचारीलाई कोभिड सङ्क्रमण देखिएको तथा थप ६ जना कर्मचारीको स्वाब सङ्कलन गरी पिसिआर परीक्षणको लागि पठाइएकाले अत्यावश्यक बाहेकका सेवा बन्द गरिएको जनाएको छ । प्रमुख प्रशासकीय अधिकृत दिनेश राज पन्तद्वारा हस्ताक्षरित सूचनामा साउन २५ गतेबाट अर्को सूचना जारी नभएसम्मका लागि सेवा बन्द गरिएको उल्लेख छ । वडा कार्यालय र स्वास्थ्य संस्थाहरूबाट प्रवाह हुने सेवा भने सुचारु रहने नगरपालिकाले जनाएको छ ।

अनलाइन डेस्क