समाचारहरू

साउन २० गते २ हजार ९ सय ७५ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ७ लाख ५ हजार ७२ पुगेको स्वास्थ्य तथा जनसङ्ख्या मन्त्रालयले जनाएको छ । साउन २० गते परीक्षण गरिएकामध्ये २६ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.३ प्रतिशतमा सङ्क्रमण पुष्टि भएको छ । गत २४ घण्टामा ११ हजार ३ सय ५४ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ६१ हजार १ सय ५१ जना निको भएका छन् । साउन २० गते १ हजार ५ सय ३५ जना निको भएका छन् भने निको हुनेको दर ९३.८ प्रतिशत रहेको मन्त्रालयले जनाएको छ । साउन २० गतेसम्म ९ हजार ९ सय ५७ जना कोभिड सङ्क्रमितको मृत्यु भएको मन्त्रालयले जनाएको छ । साउन २० गते ३५ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३३ हजार ४ सय ६४ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, काभ्रेपलाञ्चोक, नुवाकोट, नवलपरासी पूर्व, बागलुङ, कास्की, बागलुङ, गोरखा, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् ।

सप्तरी प्रतिनिधि मनोहरकुमार पोखरेलका अनुसार सप्तरी जिल्लाभरी लागु गरिएको निषेध आदेश साउन २० गतेदेखि साउन २६ गतेसम्मका लागि थप गरिएको छ । कोभिड–१९ सङ्कट व्यवस्थापन अध्यादेश २०७८ को दफा ४ र स्थानीय प्रशासन ऐन २०२८ को  दफा ६ को उपदफा ३ बमोजिम कोरोना सङ्क्रमण नियन्त्रणका लागि लागु गरिएको निषेध आदेशको अवधि एक साताका लागि थप गर्दै साउन २६ गते सम्मका लागि निषेध आदेश जारी गरिएको जिल्ला प्रशासन कार्यालय सप्तरीले जनाएको छ । कोभिड–१९ को सङ्क्रमण रोकथाम, नियन्त्रणका लागि तत्काल थप सतर्कता अपनाई स्वास्थ्य सुरक्षाको मापदण्डलाई कडाईका साथ पालना गरी गराई निषेध आदेशको अवधि थप गरिएको सिडिओ जयनारायण आचार्यले बताउनु भयो ।

नुवाकोट प्रतिनिधि नवदीप श्रेष्ठका अनुसार कोभिड–१९ को सङ्क्रमणलाई नियन्त्रण गर्न भन्दै जिल्ला प्रशासन कार्यालयले साउन ३२ गतेसम्मको लागि निषेध आदेशको अवधि थप गरेको छ । प्रमुख जिल्ला अधिकारी जीवनप्रसाद दुलालले साउन २० गते जारी गरेको सूचनामा जारी निषेध आदेश साउन ३२ गते गते राति १२ बजेसम्म रहने छ । जिल्लामा कोभिड–१९ सङ्क्रमणमा कमि नआएको कारण निषेधाज्ञ थप गर्नु परेको प्रमुख जिल्ला अधिकारी दुलालले बताउनु भयो । निषेध आदेश जारी रहे पनि जिल्लाका प्रायः सबै क्षेत्र खुलेका छन् । सार्वजनिक यातायातमा मास्क समेत अनिवार्य नगरी कोचाकोच यात्रु राखेर सञ्चालन भइरहेको छ । पछिल्ला दिनहरूका सङ्क्रमणको दर पनि बढ्न थालेको छ । स्वास्थ्य कार्यालयले दिएको जानकारी अनुसार साउन २० गते जिल्लामा ५ सय १३ जना सक्रिय सङ्क्रमित रहेका छन् । कोरोनाको कारण हालसम्म जिल्लामा ४१ जनाको ज्यान गइसकेको  छ । जिल्लामा गएको वैशाख २१ गतेबाट निषेध आदेश सुरु भएको हो ।

धादिङ प्रतिनिधि सीताराम अधिकारीका अनुसार जिल्लामा जारी निषेध आदेश कोभिड–१९ सङ्कट व्यवस्थापन केन्द्रको साउन २० गतेको बैठकले साउन ३२ गतेसम्मका लागि थप गर्ने निर्णय गरेको छ । बैठकले निषेध आदेश पूर्ववत आदेशहरू कायमै रहने गरी जारी गरिएको जनाएको छ । देशभर कोभिडको सङ्क्रमण बढेपछि जिल्लामा वैशाख २१ गतेदेखि निषेध आदेश जारी छ ।

तनहुँ प्रतिनिधि प्रकाशचन्द्र भट्टराईका अनुसार तनहुँमा जारी रहेको निषेध आदेश आगामी साउन ३२ गतेसम्म थप भएको छ । प्रमुख जिल्ला अधिकारी सागर आचार्यले साउन २० गते सूचना जारी गर्दै हाल कायम रहेको निषेध आदेश साउन ३२ गतेसम्म लम्ब्याउनुभएको हो । यसअघि साउन २० गतेसम्म निषेध आदेश थियो । जिल्लामा कोभिडको जोखिम अझै कम नभएको र सक्रिय सङ्क्रमितको सङ्ख्या पनि धेरै नै भएको तथा छिमेकी जिल्लाहरुमा नयाँ डेल्टा भेरियन्टको सङ्क्रमण देखिएको हुँदा जारी निषेध आदेशलाई निरन्तरता दिनुपर्ने देखिएको प्रमुख जिल्ला अधिकारी आचार्यले जारी गरेको सूचनामा उल्लेख छ । कोभिड–१९ को जोखिमबाट बच्न भन्दै गत वैशाख २२ गतेबाट जारी भएको निषेध आदेश पटक पटक थप गर्दै पछिल्लो पटक साउन २० गतेसम्मका लागि लम्ब्याइएको थियो ।

लमजुङ प्रतिनिधि दलबहादुर मजाकोटीका अनुसार जिल्लामा जारी रहेको निषेध आदेश साउन २७ गतेसम्म थप भएको छ । जिल्ला प्रशासन कार्यालय लमजुङले साउन १७ गते सूचना जारी गर्दै जिल्लामा जारी रहेको निषेध आदेश साउन १७ गतेबाट साउन २७ गतेसम्म लम्ब्याइएको जानकारी दिएको छ ।

पाल्पा प्रतिनिधि यज्ञमूर्ति तिमिल्सिनाका अनुसार जिल्ला प्रशासन कार्यालयका कर्मचारीहरूमा कोभिड–१९ सङ्क्रमण पुष्टि भएपछि अत्यावश्यक बाहेकका अन्य सबै सेवा बन्द गरिएका छन् । केही कर्मचारीहरूमा रुघाखोकी, ज्वरोको लक्षण देखिएपछि साउन १९ गते नौ जना कर्मचारीहरूको एन्टिजेन परीक्षण गर्दा पाँच जनाको रिर्पोट पोजेटिभ आएको थियो । अन्य कर्मचारीहरूलाई पनि कोभिड हुन सक्ने र सेवाग्राहीहरूलाई पनि जोखिम हुने भएकाले साउन २० गतेदेखि साउन २९ गतेसम्मका लागि अत्यावश्यक बाहेकका सेवा बन्द गर्ने निर्णय गरिएको प्रमुख जिल्ला अधिकारी योगेन्द्रप्रसाद पाण्डेले बताउनु भयो । शान्ति सुरक्षा, विपद् व्यवस्थापन र मुद्दा तथा ठाडो उजुरी बाहेकका अन्य सबै सेवा बन्द रहने प्रमुख जिल्ला अधिकारी पाण्डेले बताउनु भयो ।

सुर्खेत प्रतिनिधि दुर्गा थापाका अनुसार पछिल्लो केही दिनयता जिल्लामा कोभिड–१९ को सङ्क्रमण दर बढेपछि  साउन २० गते वीरेन्द्रनगरमा ‘तपाईंको मास्क खै ?’ भन्दै नागरिकहरूलाई मास्क वितरण गरिएको छ । प्रहरीले ‘तपाईंको मास्क खै ?’ भन्ने अभियान सञ्चालन गरेको भोलिपल्ट जिल्ला प्रशासन कार्यालय सुर्खेत, गैरसरकारी संस्था महासङ्घ, इन्सेक र रेडक्रस लगायतका सङ्घ–संस्थाहरूको संयोजनमा मास्क वितरण गरिएको हो । निषेधाज्ञा खुकुलो बनाएसँगै प्रदेश राजधानी समेत रहेको वीरेन्द्रनगरमा मानिसको आवत–जावत बाक्लिएको र नागरिकहरूले जनस्वास्थ्यका मापदण्डहरू पालना गर्नेतर्फ हेलचेक्राई गर्दै आएकाले उनीहरूलाई सचेत बनाउन मास्क वितरण गरिएको प्रमुख जिल्ला अधिकारी छविलाल रिजालले बताउनु भयो । वीरेन्द्रनगरबाट सुरु गरिएको अभियान जिल्लाभर सञ्चालन गर्ने, प्रहरीको नियमित कार्य अन्तर्गत यस अभियानलाई सफल बनाउन सबैको सहयोग र समन्वयको खाँचो रहेको जिल्ला प्रहरी कार्यालयका डीएसपी रामप्रसाद घर्तीले बताउनु भयो । प्रहरीले यस अभियान अन्र्तगत वीरेन्द्रनगरका चोक–चोकमा बसेर मास्क वितरण गर्नुको साथै मास्क नलगाउने मानिसहरूलाई सचेत पार्न जनही १ सय रुपियाँ जरिबाना गर्ने गरेको डीएसपी घर्तीले जानकारी दिनु भयो । वीरेन्द्रनगरको क्याम्पस रोडबाट सुरु गरिएको मास्क वितरण कार्यक्रम धमलाचौकमा पुगेर टुङ्गिएको थियो । ५ सय भन्दा बढी नागरिकलाई मास्क वितरण गरिएको इन्सेक कर्णाली प्रदेश कार्यालय सुर्खेतका संयोजक नारायण सुवेदीले बताउनु भयो । कार्यक्रममा प्रमुख जिल्ला अधिकारी छविलाल रिजाल, रेडक्रस सुर्खेतका सभापति रामप्रसाद आचार्य, इन्सेक कर्णाली प्रदेश संयोजक नारायण सुवेदी, गैसस महासङ्घ सुर्खेतका अध्यक्ष घनश्याम केसी, सुरक्षा निकायका प्रमुख र नागरिक सङ्घ–संस्थाहरूका प्रमुख एवम् प्रतिनिधिहरूको सहभागिता रहेको थियो ।

अनलाइन डेस्क