समाचारहरू

साउन १७ गते १ हजार ९ सय ८१ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ९७ हजार ३ सय ७० पुगेको स्वास्थ्य तथा जनसङ्ख्या मन्त्रालयले जनाएको छ । साउन १७ गते परीक्षण गरिएकामध्ये २४ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.३ प्रतिशतमा सङ्क्रमण पुष्टि भएको छ । गत २४ घण्टामा ८ हजार ४ सय २ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ५६ हजार १ सय ९७ जना निको भएका छन् । साउन १७ गते २ हजार २० जना निको भएका छन् भने निको हुनेको दर ९४.१ प्रतिशत रहेको मन्त्रालयले जनाएको छ । साउन १७ गतेसम्म ९ हजार ८ सय ७५ जना कोभिड सङ्क्रमितको मृत्यु भएको मन्त्रालयले जनाएको छ । साउन १७ गते १८ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३१ हजार २ सय ९८ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, नवलपरासी पूर्व, कास्की, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् ।

रामेछाप प्रतिनिधि नवराज घीमिरेका अनुसार जिल्लामा जारी निषेध आदेश साउन १७ गतेबाट ३२ गतेसम्मका लागि थप गरिएको छ । कोभिड–१९ सङ्क्रमण जारी नै रहेकोले निषेध आदेश थप गरिएको प्रमुख जिल्ला अधिकारी गौलोचन सैँजूले जानकारी दिनुभयो । निषेध आदेश थप भएसँगै औषधि पसलबाहेक अन्य पसल बिहान ५ बजेदेखि साँझ ६ बजेसम्म मात्र खुल्न पाउने छन् । साथै सभा जुलुश, जात्रा, महोत्सव, भोज, भतेर गर्न रोक लगाइएको भने शैक्षिक गतिविधि, प्रशिक्षण तालिम, गोष्ठि, हाटबजार, खेलकुद्, स्वीमिङ् पुलहरू बन्द गरिएको छ ।

यसैबिच, गोकुलगङ्गा गाउँपालिकाका दुई ओटा वडा ०७८ साउन १६ गतेबाट साउन २२ गतेसम्मको लागि सील गरिएको छ । सो गाउँपालिकाको वडा नं. १ चुचुर र वडा नं. ४ बेतालीलाई सील गरिएको गाउँपालिका उपाध्यक्ष राधिका श्रेष्ठ नेवारले जानकारी दिनुभयो । कोभिड–१९ का सङ्क्रमित बढेपछि ती वडालाई सील गरिएको हो । सील गरिएका दुवै वडा कार्यालयले प्रदान गर्ने सम्पूर्ण सेवा साउन २२ गतेसम्मलाई बन्द गरिएको छ ।

सिन्धुपाल्चोक प्रतिनिधि नातिबावु धितालका अनुसार जिल्लामा कोभिड–१९ को सङ्क्रमणदर बढ्ने जोखिम कायमै रहेकोले साउन १६ गतेदेखि साउन २९ गतेसम्मका लागि निषेध आदेशको अवधि थप गरिएको छ । प्रमुख जिल्ला अधिकारी अरुण पोखरेलको अध्यक्षतामा साउन १५ गते बसेको डिसीएमसीको बैठकले निषेध आदेश थप गर्ने निर्णय गरेको साहायक प्रमुख जिल्ला अधिकारी बाबुराम खनालले बताउनु भयो । कोभिड–१९ सङ्क्रमणका कारणले बन्द भएका विद्यालयहरू कसरी सञ्चालन गर्न सकिन्छ ? भन्ने विषयमा अध्ययन गरी १० दिन भित्र प्रतिवेदन बुझाउन स्वास्थ्य कार्यालयका प्रमुख र शिक्षा विकास तथा समन्वय समितिका प्रमुखलाई बैठकले जिम्मेवारी दिएको समेत साहायक प्रमुख जिल्ला अधिकारी खनालले बताउनु भयो ।

अनलाइन डेस्क