समाचारहरू

साउन १५ गते २ हजार ४ सय ६७ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ९३ हजार १ सय ९ पुगेको स्वास्थ्य तथा जनसङ्ख्या मन्त्रालयले जनाएको छ । साउन १५ गते परीक्षण गरिएकामध्ये २५ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.३ प्रतिशतमा सङ्क्रमण पुष्टि भएको छ । गत २४ घण्टामा ९ हजार ७ सय ८३ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ५२ हजार २ सय ६१ जना निको भएका छन् । साउन १५ गते १ हजार ८ सय १६ जना निको भएका छन् भने निको हुनेको दर ९४.१ प्रतिशत रहेको मन्त्रालयले जनाएको छ । साउन १५ गतेसम्म ९ हजार ८ सय ३४ जना कोभिड सङ्क्रमितको मृत्यु भएको मन्त्रालयले जनाएको छ । साउन १५ गते २७ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या ३१ हजार १४ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, मकवानपुर, नवलपरासी पूर्व, कास्की, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् ।

बागलुङ प्रतिनिधि सिर्जना पन्तका अनुसार केही दिनदेखि बागलुङमा जारी रहेको कोरोना बिरुद्धको खोप अभियानमा पहुँचवालाहरुले अनावश्यक दबाब र दुरुपयोग गरेको व्यापक गुनासोपछि केन्द्रको निर्देशनमा स्थगन भएको छ । खोपको लागि लक्षित वर्ग नतोकेको कारण मन्त्रालयको निर्देशन नआउँदा सम्मको लागि कार्यक्रम स्थगित गरिएको स्वास्थ्य कार्यालय बागलुङका खोप सुपरभाइजर राजु खत्रीले जानकारी दिनुभयो । सरकारले लक्षित वर्गलाई खोप लगाउनका लागि दिएको निर्देशन अनुसार बागलुङमा खोप लगाइसकिएको र अब माथिबाट निर्देशन नआउँदा सम्मका लागि स्थगित भएको उहाँको भनाइ छ । सरकारले तोकेको लक्षित वर्ग छुटेको भए ती व्यक्तिलाई भने खोप लगाइने खत्रीले बताउनुभयो । सरकारले लक्षित गरेका करिब सबै नागरिकले खोप पाइसकेको र अर्को लक्षित वर्ग तोकी नसकेकाले खोप लगाउन नसकिएको उहाँले बताउनुभयो ।

सरकारबाट नयाँ लक्षित वर्ग तोकिए पछि मात्रै खोप अभियानलाई अगाडि बढाइने छ । जिल्लामा अहिलेसम्म कोभिड शिल्ड, भेरोसेल र जोनसन एण्ड जोनसन खोप लगाइएको स्वास्थ्य कार्यालय बागलुङले जनाएको छ । हालसम्म जिल्लामा ५१ हजार ४ सय ८७ जनाले खोप लगाएको स्वास्थ्य कार्यालयको तथ्याङ्क छ । जिल्लामा जोनसन एण्ड जोनसन ११ हजार बढी, भेरोसेल २२ हजार र कोभिड शिल्ड १४ हजार ६ सय ४० ले लगाएको सुपरभाइजर खत्रीले जानकारी दिनुभयो ।जिल्लामा भेरोसेल खोपको पहिलो डोज २२ हजार २ जनालाई लगाइएको र दोस्रो डोज भने १८ हजार १२ जनालाई लगाउन बाँकी रहेको उहाँको भनाई छ । १२ हजार ६० डोज जोनसेन एण्ड जोनसेन खोप आएकोमा १० हजार ३ सय नागरिकलाई लगाइएको खत्रीको भनाइ छ । बागलुङमा १८ वर्ष माथिका १ लाख १ सय ८१ जनालाई खोप लगाउनु पर्ने खत्रीले बताउनुभयो ।

त्यस्तै जिल्ला प्रशासन कार्यालय बागलुङले अर्को सूचना नभएसम्मका लागि तोकिएका सेवा सञ्चालन हुने गरी निषेध आदेश थप गरेको छ । साउन १५ गतेसम्म जारी भएको निषेध आदेश अनिश्चित कालका लागि थप गरिएको भएपनि होटल व्यवसाय ५० प्रतिशत क्षमतामा सञ्चालन गर्न अनुमति दिएको छ । साउन १४ गते बसेको जिल्ला कोभिड सङ्कट व्यवस्थापन समिति (डिसिसिएमसी)को बैठकले सिफारिस गरेअनुसार ५० प्रतिशत क्षमतामा होटल सञ्चालन गर्न पाउने व्यवस्था गरेको प्रमुख जिल्ला अधिकरी शिव कुमार कार्कीले जानकारी दिनुभयो । यसअघि भएका निर्णयमा रेष्टुराँ र खाजाघर खुल्ला गरेपनि आवासीय होटल सञ्चालन गर्न दिइएको थिएन । होटल व्यवसायीले होटल खुल्ला गर्न र खोप लगाउन माग गर्दै आएका थिए । सरकारले खुल्ला लामो तथा छोटो दुरीका सार्वजनिक यातायात पनि स्वास्थ्य मापदण्ड पालना गरेर सञ्चालन गर्न प्रशासनले सूचना जारी गर्दै अनुरोध गरेको छ । विद्यालय तथा परीक्षा सञ्चालन नगर्ने तर विश्वविद्यालय र उच्च माबिका परीक्षा सरकारले निकाले तालिका अनुसार मापदण्ड पुर्‍याएर गर्न पाउने व्यवस्था भएको छ ।

बाजुरा प्रतिनिधि पदमबहादुर सिंहका अनुसार जिल्लामा कोभिड–१९ विरुद्धको तेस्रो चरणको खोप साउन १५ गतेबाट सुरु भएको छ । साउन १५ गते बडिमालिका नगरपालिका वडा नम्बर ८, ९ र  त्रिबेणी नगरपालिकाबाट सुरु गरिएको र साउन १६ गतेबाट बुढीगङ्गा नगरपालिका, खप्तड छेडेदह गाउँपालिका, गौमुल गाउँपालिका र बडिमालिका नगरपालिकाका अन्य वडाहरूमा सुरु गरिने स्वास्थ्य कार्यालय, बाजुराका निमित्त कार्यालय प्रमुख महेश चन्दले बताउनु भयो । यसैगरी, जिल्लाका पूर्वी उत्तरी क्षेत्रका चार ओटा स्थानीय तह बुढीनन्दा नगरपालिका, स्वामीकार्तिक खापर गाउँपालिका, जगन्नाथ गाउँपालिका र हिमाली गाउँपालिकामा साउन १७ गतेबाट खोप अभियान सञ्चालन गरिने चन्दले बताउनु भयो । तेस्रो चरणको खोप अभियानमा ५५ वर्षदेखि ६१ वर्ष उमेर समूहका नागरिक, व्यापारी, सामाजिक व्यक्ति, शिक्षक, सार्वजनिक यातायात चालक, सहचालक र खोप अनिवार्य गरेका विदेशमा जाने नागरिकहरूलाई लक्षित गरेर खोप लगाउन सुरु गरिएको बडिमालिका नगरपालिकाका स्वास्थ्य संयोजक टेकबहादुर खड्काले बताउनु भयो । यो पटक जिल्लामा ९ हजार ७ सय डोज खोप उपलब्ध छ ।

जिल्लामा सबैलाई नपुग्ने भएकोले बढी जोखिम तथा समूहलाई प्राथमिकताका आधारमा खोप लगाउने व्यवस्था मिलाइएको जिल्ला स्वास्थ्य कार्यालयका निमित्त कार्यालय प्रमुख महेश चन्द्रले बताउनु भयो । कोभिड–१९ विरुद्धको खोप अभियान व्यवस्थित हुन नसक्दा कोभिड सङ्क्रमणको जोखिम बढ्ने बताउँदै खोप केन्द्रहरूमा भिड धेरै भएको भएपनि सामाजिक दूरी कायन नगरिएको स्थानीय योगेन्द्र थापाले बताउनु भयो । जिल्लामा उपलब्ध खोप बडिमालिका नगरपालिकामा १ हजार ६ सय ४८ डोज, बुढीगङ्गा नगरपालिकामा १ हजार ९ सय ९० डोज, बुढीनन्दा नगरपालिकामा ६ सय ७० डोज, त्रिबेणी नगरपालिकामा १ हजार ६ सय ९० डोज, खप्तड छेडेदह गाउँपालिकामा १ हजार ७ सय २८ डोज, गौमूल गाउँपालिकामा ७ सय ८९ डोज, स्वामीकार्तिक खापर गाउँपालिकामा ४ सय ४६ डोज, जगन्नाग गाउँपालिकामा ३ सय २९ डोज र हिमाली गाउँपालिकामा ३ सय २४ डोज पठाएको निमित्त प्रमुख चन्दले बताउनु भयो । पहिलो र दोस्रो चरणको खोप अभियानमा जिल्लाका १९ हजार १ सय ३१ जनामा खोप लगाइएको थियो ।

अनलाइन डेस्क