समाचारहरू

साउन ९ गते २ हजार ३ सय ९ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ७९ हजार १७ पुगेको स्वास्थ्य तथा जनसङ्ख्या मन्त्रालयले जनाएको छ । साउन ९ गते परीक्षण गरिएकामध्ये २२ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.२ प्रतिशतमा सङ्क्रमण पुष्टि भएको छ । गत २४ घण्टामा १० हजार ६ सय २५ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ४१ हजार ५ सय ६५ जना निको भएका छन् । साउन ९ गते २ हजार १ सय ९७ जना निको भएका छन् भने निको हुनेको दर ९४.५ प्रतिशत रहेको मन्त्रालयले जनाएको छ । साउन ९ गतेसम्म ९ हजार ६ सय ९५ जना कोभिड सङ्क्रमितको मृत्यु भएको मन्त्रालयले जनाएको छ । साउन ९ गते १६ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २७ हजार ७ सय ५७ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, नवलपरासी पूर्व, कास्की र रुपन्देहीमा सक्रिय सङ्क्रमित ५ सयभन्दा बढी रहेका छन् ।

गुल्मी प्रतिनिधि टोपलाल अर्यालका अनुसार गुल्मीमा ०७७ फागुन तेस्रो साता कोभिशिल्डको पहिलो डोज लगाएका १७ हजार ९ सय १ जना ६५ वर्ष माथिका ज्येष्ठ नागरिक दोस्रो डोजबाट वञ्चित भएका छन् । जिल्लामा कोभिशिल्ड र भेरासिल गरेर दुई ओटा खोप अभियान सञ्चालन भएका छन् । कोभिडशिल्ड दोस्रो डोज भारतबाट आउन बन्द भएका कारण ज्येष्ठ नागरिक पुरा खोप लगाउनबाट वञ्चित भएको स्वास्थ्य कार्यालय गुल्मीका सूचना अधिकारी पशुपति आचार्यले जानकारी दिनुभयो । पहिलो खोप लगाएको दुई महिनाभित्र दोस्रो खोप लगाउनुपर्ने विज्ञहरूले जनाएका छन् । तर, चार महिनासम्म ज्येष्ठ नागरिक खोपबाट वञ्चित भएका छन् । इस्मा गाउँपालिका–४ की ७५ वर्षीया धनकला अधिकारीले सरकारले ज्येष्ठ नागरिकलाई कोभिड–१९ विरूद्धको पहिलो खोप मात्रै लगाएर झन जोखिम बढाएको गुनासो गर्नुभयो । उहाँले चार महिनासम्म नपाएपछि अब खोप पाउनु र लगाउनुको अर्थ नभएको बताउनु भयो । गत फागुन तेस्रो साता ६५ वर्ष माथिका ज्येष्ठ नागरिक, एम्बुलेन्स चालक पाँच जना, महिला स्वास्थ्य स्वयम्सेविका ७४ जना, शव व्यवस्थापनमा खटिने सुरक्षाकर्मी १ सय १६ जना, स्वास्थ्यकर्मी ५० जना, वृद्धाश्रमका ज्येष्ठ नागरिक, कैदीबन्दी र फोहोर व्यावस्थापनकर्मीहरूले कोभिडशिल्डको दोस्रो डोज नपाएको स्वास्थ्य कार्यालय गुल्मीका सहजकर्ता सुजन ढकालले जानकारी दिनुभयो । पहिलो प्राथमिकतामा परेका ६५ वर्ष माथिका ज्येष्ठ नागरिक, अन्य विभिन्न क्षेत्रका ५ सय १ गरेर १८ हजार ४ सय २ जनाले दोस्रो खोप लगाउन नपाएको ढकालले बताउनु भयो । पहिलो खोप लगाएको लामो समय अर्को डोज नपाएपछि निकै अन्यौल भएको पत्रकार महेश बोहोराले बताउनु भयो । ‘कसैले सही निर्णय दिँदैनन् । पहिलो खोप कोभिशिल्ड खोप लगाएँ । समयमै अर्को पाइएन ।’बोहोराले भन्नुभयो । कोभिशिल्डकै प्रतिक्षा गर्ने वा दुवै डोज भेरोसिल लगाउने भन्ने अन्यौलमा परेको उहाँहरूको भनाइ छ । स्वास्थ्य कार्यालय गुल्मीका अनुसार जिल्लामा खोप लगाउने १ लाख ४७ हजार १ सय ५५ जना १८ वर्ष माथिका नागरिक छन् । अहिलेसम्म ४३ हजार ३ सय १८ जनाले खोप लगाएका छन् भने अझै १ लाख ३ हजार ८ सय ३७ जना खोप लगाउन बाँकी रहेका छन् ।

अनलाइन डेस्क