समाचारहरू

साउन ६ गते १ हजार ९ सय १८ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ७२ हजार ८ सय ७१ पुगेको स्वास्थ्य तथा जनसङ्ख्या मन्त्रालयले जनाएको छ । साउन ६ गते परीक्षण गरिएकामध्ये २२ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.२ प्रतिशतमा सङ्क्रमण पुष्टि भएको छ । गत २४ घण्टामा ८ हजार ७ सय १५ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ३६ हजार ४ सय २ जना निको भएका छन् । साउन ६ गते १ हजार ४ सय ७५ जना निको भएका छन् भने निको हुनेको दर ९४.६ प्रतिशत रहेको मन्त्रालयले जनाएको छ । साउन ६ गतेसम्म ९ हजार ६ सय ३७ जना कोभिड सङ्क्रमितको मृत्यु भएको मन्त्रालयले जनाएको छ । साउन ६ गते ३० जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २६ हजार ८ सय ३२ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, कास्की, रुपन्देही र कैलालीमा सक्रिय सङ्क्रमित ५ सयभन्दा बढी रहेका छन् ।

सुनसरी प्रतिनिधि जयकृष्ण यादवका अनुसार मालपोत कार्यालय धरानका दुई जना कर्मचारीमा कोभिड–१९ को सङ्क्रमण पुष्टि भएपछि एक साताका लागि कार्यालय बन्द गरिएको छ । कार्यालयका मालपोत अधिकृत गणेशकुमार ढकालले दिएको जानकारी अनुसार कम्प्युटर अपरेटर र खरिदार दुई जनामा सङ्क्रमण पुष्टि भएपछि साउन ७ गतेदेखि साउन १३ गते सम्मका लागि कार्यालय बन्द गर्ने निर्णय गरिएको छ ।

अनलाइन डेस्क