समाचारहरू

साउन ५ गते २ हजार २ सय २ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ७० हजार ९ सय ३५ पुगेको स्वास्थ्य तथा जनसङ्ख्या मन्त्रालयले जनाएको छ । साउन ५ गते परीक्षण गरिएकामध्ये २५ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.२ प्रतिशतमा सङ्क्रमण पुष्टि भएको छ । गत २४ घण्टामा ८ हजार ८ सय ३६ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ३४ हजार ९ सय २७ जना निको भएका छन् । साउन ५ गते १ हजार ५ सय ९५ जना निको भएका छन् भने निको हुनेको दर ९४.६ प्रतिशत रहेको मन्त्रालयले जनाएको छ । साउन ५ गतेसम्म ९ हजार ६ सय ७ जना कोभिड सङ्क्रमितको मृत्यु भएको मन्त्रालयले जनाएको छ । साउन ५ गते २५ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २६ हजार ४ सय १९ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, कास्की, नवलपरासी पूर्व, रुपन्देही, सुर्खेत र कैलालीमा सक्रिय सङ्क्रमित ५ सयभन्दा बढी रहेका छन् ।

बागलुङ प्रतिनिधि सिर्जना पन्तका अनुसार जिल्ला प्रशासन कार्यालय बागलुङले निषेध आदेश खुकुलो बनाउँदै साउन १४ गतेसम्मको लागि थप गरेको छ । जिल्ला प्रशासन कार्यालय बागलुङमा साउन ४ गते बसेको जिल्ला कोभिड १९ व्यवस्थापन केन्द्रको बैठकले साउन १४ गते राति १२ बजे सम्म लागु हुने गरी निषेध आदेश थप गरिएको प्रमुख जिल्ला अधिकारी शिव कुमार कार्कीले जानकारी दिनुभयो ।

नवलपरासी वर्दाघाट सूस्ता पूर्व प्रतिनिधि तिर्थराज डुम्रेका अनुसार जिल्लामा जारी रहेको निषेध आदेश साउन २१ गतेसम्म थप गरिएको छ । जिल्ला प्रशासन कार्यालय नवलपरासी (वर्दाघाट सूस्ता पूर्व) ले साउन ५ गते एक सूचना जारी गर्दै जिल्लामा जारी रहेको निषेध आदेश केही खुकुलो पार्दै थप गरिएको जनाएको हो ।

अनलाइन डेस्क