समाचारहरू

साउन ४ गते १ हजार ६ सय ४२ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ६८ हजार ७ सय ५१ पुगेको स्वास्थ्य तथा जनसङ्ख्या मन्त्रालयले जनाएको छ । साउन ४ गते परीक्षण गरिएकामध्ये १६ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.२ प्रतिशतमा सङ्क्रमण पुष्टि भएको छ । गत २४ घण्टामा ७ हजार ८ सय ३३ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ३३ हजार ३ सय ३२ जना निको भएका छन् । साउन ४ गते १ हजार २ सय ५८ जना निको भएका छन् भने निको हुनेको दर ९४.७ प्रतिशत रहेको मन्त्रालयले जनाएको छ । साउन ४ गतेसम्म ९ हजार ५ सय ८२ जना कोभिड सङ्क्रमितको मृत्यु भएको मन्त्रालयले जनाएको छ । साउन ४ गते ३२ जना सङ्क्रमितको मृत्यु भएको मन्त्रालयले जनाएको छ । सक्रिय सङ्क्रमितको सङ्ख्या २५ हजार ८ सय ३७ रहेको छ । मन्त्रालयका अनुसार मोरङ, सुनसरी, झापा, काठमाडौँ, ललितपुर, भक्तपुर, चितवन, कास्की, रुपन्देही र सुर्खेतमा सक्रिय सङ्क्रमित ५ सयभन्दा बढी रहेका छन् ।

ओखलढुङ्गा प्रतिनिधि सरस्वती बानियाका अनुसार जिल्लामा जारी निषेध आदेशको समय साउन १४ गतेसम्मका लागि थप गरिएको छ । जिल्ला कोभिड सङ्कट व्यवस्थापन केन्द्रको साउन ४ गतेको बैठकले निषेध आदेशको समय थप गर्ने निर्णय गरिएको प्रमुख जिल्ला अधिकारी वन्दना राईले बताउनु भएको छ । निषेध आदेशको समयमा खाद्यान्नलगायतका पसल सञ्चालन अनुमति रहेको जिल्ला प्रशासन कार्यालयद्वारा जारी निषेध आदेश सम्बन्धी सूचनामा उल्लेख छ ।

सङ्खुवासभा प्रतिनिधि भविन कार्कीका अनुसार जिल्लामा जारी निषेध आदेशको समय साउन १३ गते सम्मका लागि थप गरिएको छ । जिल्ला कोभिड सङ्कट व्यवस्थापन केन्द्रको साउन ३ गतेको बैठकले निषेध आदेशको समय थप गर्ने निर्णय गरिएको प्रमुख जिल्ला अधिकारी टेकनारायण पौडेलले बताउनु भएको छ । निषेध आदेशको समयमा स्वास्थ्य मापदण्डसहित जिल्ला भित्र सार्वजनिक सवारी साधन सञ्चालनका अनुमति हुने निर्णय गरिएको छ । उपभोग्य वस्तु एवम् खाद्यान्न, तरकारी र फलफुलका पसलहरू बिहान ६ बजेदेखि बेलुका ६ बजेसम्म स्वास्थ्य मापदण्ड अपनाएर सञ्चालन गर्न पाइने जिल्ला प्रशासन कार्यालयद्वारा जारी सूचनामा उल्लेख छ । सरकारी कार्यालय, बैङ्क, वित्तीय संस्थाहरू र सहकारी संस्था जनस्वास्थ्यका मापदण्ड पालना गर्दे सुचारू गर्ने बैठकले निर्णय गरेको छ ।

पाँचथर प्रतिनिधि मङ्गल बेघाका अनुसार जिल्लामा जारी निषेध आदेशको समय साउन ११ गते सम्मका लागि थप गरिएको छ । जिल्ला कोभिड सङ्कट व्यवस्थापन केन्द्रको साउन ४ गतेको बैठकले निषेध आदेशको समय थप गर्ने निर्णय गरिएको प्रमुख जिल्ला अधिकारी पुण्यप्रसाद ढकालले बताउनु भएको छ । निषेध आदेशको सयमा अत्यावश्यक सेवाका पसलहरू बिहान ५ बजेदेखि दिउँसो १ बजेसम्म मात्र सञ्चालन गर्न दिने निर्णय गरिएको प्रमुख जिल्ला अधिकारी ढकालले बताउनु भयो । स्थानीय प्रशासनको अनुमति लिएर मात्र लामो दूरीका सवारी साधन सञ्चालन गर्न पाइने जिल्ला प्रशासन कार्यालयद्वारा जारी निषेध आदेशसम्बन्धी सूचनामा उल्लेख छ ।

झापा प्रतिनिधि नरेश खातीका अनुसार कोभिड–१९ सङक्रमण बढेकोले वुद्धशान्ति गाउँपालिकाले साउन ५ गतेदेखि लागू हुने गरी एक साताका लागि गाउँपालिका सील गर्ने निर्णय गरेको छ । कोभिड–१९ को सङ्क्रमण बढेकाले गाउँपालिकाका सबै वडा सील गर्ने निर्णय साउन ४ गते गरिएको गाउँपालिका अध्यक्ष रमेश भुजेलले बताउनु भएको छ ।

धादिङ प्रतिनिधि सीताराम अधिकारीका अनुसार निलकण्ठ नगरपालिकामा कोभिड–१९ विरुद्धको खोप चौथो चरण अन्तर्गत भेरोसिल खोप कार्यक्रम साउन २ गतेदेखि सुरु भएको छ । निलकण्ठ नगरपालिकासहित जिल्लाभर सुरु भएको खोप कार्यक्रममा ५५ वर्षभन्दा माथि उमेर समूहका व्यक्तिहरू, शिक्षकहरू र यसअघि प्राथमिकतामा परेर पनि खोप लगाउन छुट भएकाहरूलाई यस पटकको खोप लगाइने धादिङ स्वास्थ्य कार्यालयका खोप सुपरभाइजर अधिकृत श्यामप्रसाद पोखरेलले बताउनु भएको छ । तर, कोभिडविरुद्धको खोप भेरोसिल्ड लगाउन तोकिएको उमेर समूहभन्दा कम उमेरका व्यक्तिहरूले खोप लगाएका कारण आफूहरू खोपबाट वञ्चित भएको सरकारले तोकेको खोप उमेर समूहमा पर्नु हुने धनबहादुर तामाङ्ले बताउनु भयो । निलकण्ड नगरपालिकामा तोकिएको उमेर समूहा ३ हजार ८ सय जना भेरोसिल खोप लगाउनेहरू रहेकोमा अहिलेसम्म खोप लगाउनेको सङ्ख्या १ हजार ६ सय रहेको र खोप कार्यक्रममा तोकिएको मापदण्ड बमोजिम भएको नीलकण्ठ नगरपालिका स्वास्थ्य संयोजक विष्णु रिजालले बताउनुभएको छ ।

कास्की प्रतिनिधि सुशन घिमिरेका अनुसार कास्की जिल्ला प्रशासन कार्यालयले साउन २० गतेसम्मलाई निषेध आदेशको अवधि थप गरेको छ । प्रमुख जिल्ला अधिकारी थानेश्वर गौतमले साउन २ गतेदेखि निषेध आदेशलाई खुलुको पार्दै लम्ब्याएका छन् । ०७८ असार ५ गते राति १२ बजेबाट लागु हुने गरी थप गरिएको निषेध आदेशमा कास्की जिल्लामा चल्ने नीजि तथा सार्वजनिक सवारीमा जोर बिजोर प्रणाली हटाइएको छ भने  लामो दुरीका सवारी साधन सम्बन्धित सङ्घसंस्थाको सिफारिसको आधारमा जिल्ला प्रशासन कार्यालयसँग समन्वय  गरी  सञ्चालन गर्न पाइनेछ ।

नवलपरासी (बर्दाघाट सुस्ता पूर्व)प्रतिनिधि तिर्थराज डुम्रेका अनुसार नवलपुरको मध्यविन्दु नगरपालिकामा कोभिड–१९ विरुद्धको खोप लगाउन लाइन बसेका शिक्षकहरु खोप नपाएपछि खोप नलगाइ फर्किएका छन् । चोरमारा प्राथमिक स्वास्थ्य केन्द्रमा साउन ४ गते खोप लगाउन पुगेका लक्ष्मी आदर्श आधारभूत विद्यालय मध्यविन्दु–७ अम्रसाका १२ जना शिक्षक खोप नलागाइ फर्किएका हुन् । चोरमारा प्राथमिक स्वास्थ्य केन्द्रमा साउन ३ गते मध्यविन्दु–८ र ९ का लक्षित वर्ग र साउन ४ गते मध्यविन्दु–६ को केही भाग र ७ का लक्षित वर्गलाई खोप लगाउने समय तोकिएका थियो । सोही सूचना अनुसार साउन ४ गते बिहानबाट नै खोप लगाउन लाइनमा बसेपनि खोप नपाएपछि खोप नलगाइ फर्किएको विद्यालयका शिक्षक सागर महतोले बताउनुभयो । स्वास्थ्य केन्द्रमा प्राप्त खोप अपुग भएको कारण सो समस्या भएको चोरमारा प्राथमिक स्वास्थ्य केन्द्रका निमित्त प्रमुख रामप्रसाद पाण्डेले बताउनुभयो । स्वास्थ्य केन्द्रमा आठ सय ५७ भायल खोप आएको र उमेर समुह अनुसारको एकिन तथ्याङ्क नगरी थोरै खोप आएको कारण समस्या भएको स्वास्थ्य केन्द्रका अध्यक्ष अमृत ज्ञवालीले बताउनुभयो ।

सुर्खेत प्रतिनिधि दुर्गा थापाका अनुसार कर्णाली प्रदेशका १ लाख ५८ हजार नागरिकले कोभिड–१९ विरूद्धको खोप लगाएका छन । प्रदेश स्वास्थ्य निर्देशनालय सुर्खेतका निर्देशक डाक्टर रविन खड्काले ०७७ माघ १४ गतेदेखि असार मसान्तसम्म चार चरणमा गरी प्रदेशमा १ लाख ५८ हजार जनाले खोप लगाइसकेको बताउनु भयो । ५५ वर्ष माथि उमेर समूहका नागरिकहरूका लागि भेरोसेल र ५० देखि ५४ वर्ष उमेर समूहका लागि जोन्सन एण्ड जोन्सन खोप ल्याउने तयारी भइरहेको र खोप आउने बित्तिकै प्रदेशका नागरिकहरूलाई खोप लगाइने निर्देशक खड्काले जानकारी दिनुभयो ।

अनलाइन डेस्क