समाचारहरू

असार २३ गते २ हजार ७७ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ५० हजार १ सय ६२ पुगेको स्वास्थ्य तथा जनसङ्ख्या मन्त्रालयले जनाएको छ । असार २३ गते परीक्षण गरिएकामध्ये २६.५ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.२ प्रतिशतमा सङ्क्रमण पुष्टि भएको छ । असार २३ गते २० वर्ष मुनिका २ सय ६६ जनामा कोभिड सङ्क्रमणको पुष्टि भएको छ । गत २४ घण्टामा ७ हजार ८ सय ३५ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख १४ हजार ३ सय २७ जना निको भएका छन् । असार २३ गते १ हजार ३ सय ३३ जना निको भएका छन् भने निको हुनेको दर ९४.५ प्रतिशत रहेको मन्त्रालयले जनाएको छ । असार २३ गतेसम्म ९ हजार २ सय ९१ जना कोभिड सङ्क्रमितको मृत्यु भएको मन्त्रालयले जनाएको छ । असार २३ गते २८ जना सङ्क्रमितको मृत्यु भएको मन्त्रालयले जनाएको छ । आइसोलेशनमा पुष्टि भएका केसहरूको सङ्ख्या २६ हजार ६ सय ९० रहेको छ ।

सिन्धुपाल्चोक प्रतिनिधि नातिबावु धितालका अनुसार कोभिड–१९ को सङ्क्रमण समुदाय स्तरसम्म फैलिएको र नियन्त्रण नभएको भन्दै जिल्ला प्रशासन कार्यालयले असार २३ गतेदेखि असार ३१ गतेसम्मका लागि  निषेध आदेश थप गरेको छ । प्रमुख जिल्ला अधिकारी अरुण पोखरेलको अध्यक्षतामा असार २२ गते बसेको डिसिएमसीको बैठकले असार ३१ गतेसम्मका लागि निषेध आदेशको अवधि थप गर्न निर्णय गरेको हो । जारी निषेध आदेशमा जिल्लाभित्र निजी सवारी साधन सञ्चलन गर्न र पसल व्यवसाय बिहान ११ बजेदेखि साँझ ६ बजेसम्म गर्न पाउने गरी केही खुकुलो बनाएको प्रमुख जिल्ला अधिकारी पोखरेलले बताउनु भयो ।

तनहुँ प्रतिनिधि प्रकाशचन्द्र भट्टराईका अनुसार कोभिड–१९ बाट सिर्जित जटिल परिस्थिती र मानव अधिकारको अवस्था अनुगमनको लागि तनहुँमा गठित मानव अधिकार अनुगमन समितिमा इन्सेक सदस्यको रुपमा चयन भएको छ । केन्द्रमा राष्ट्रिय मानव अधिकार आयोगको नेतृत्व रहेको उक्त समितिमा नेपाल बार एशोसिएशन, नेपाल पत्रकार महासङ्घ र गैरसरकारी संस्था महासङ्घको जिल्ला स्तरीय नेतृत्व सदस्य भएका छन् । त्यसबाहेक समितिले मानव अधिकारको क्षेत्रमा क्रियाशील अन्य सङ्घसंस्थाका प्रतिनिधिलाई पनि सदस्य चयन गर्न सक्ने छ । सोही अनुसार असार २३ गते नेपाल बार एशोसिएशन तनहुँका अध्यक्ष भानुभक्त सुवेदीको अध्यक्षतामा सम्पन्न बैठकले मानव अधिकार अवस्था अनुगमन समिति गठन गर्ने निर्णय गरेको हो । बैठकले नेपाल पत्रकार महासङ्घ तनहुँका अध्यक्ष उज्वल पौडेल र इन्सेक तनहुँ प्रतिनिधि प्रकाशचन्द्र भट्टराईलाई सदस्य चयन गरेको हो । यसका साथै सदस्यहरुमा आदिवासी जनजाती महासङ्घका जिल्ला अध्यक्ष बसुन्धरा घर्ती, महिला मानव अधिकार रक्षक सञ्जालकी कल्पना पौडेल, गैरसरकारी संस्था समन्वय समितिका महासचिव राजेश्वर हड्खले र दलित पत्रकार सङ्घका अध्यक्ष सानेबहादुर नेपालीलाई थप गर्ने निर्णय गरेको छ । गठन गरिएको उक्त समितिले कोभिड–१९ को कारण सिर्जित विषम परिस्थिति र बन्दाबन्दीको कारण नागरिकको मानव अधिकारमा परेको असरको बारेमा जिल्लामा अनुगमन गर्ने जनाइएको छ ।

म्याग्दी प्रतिनिधि अमृतप्रसाद पौडेलका अनुसार मुस्ताङ जिल्लामा कोभिड सङ्क्रमण पुनः फैलिन थालेपछि थासाङ गाउँपालिका, घरपझोङ गाउँपालिका र बाह्रगुङ मुक्तिक्षेत्र गाउँपालिका क्षेत्रमा आगामी असार ३१ गतेसम्मका लागि निषेध आदेश थप गर्ने निर्णय गरेको छ । जिल्ला कोभिड व्यवस्थापन समितिको असार २२ गतेको सिफारिस बमोजिम स्थानीय प्रशासन ऐन २०२८ को दफा ६(३) कोभिड–१९ सङ्कट व्यवस्थापन अध्यादेश–२०७८ को दफा ५(२) र सङ्क्रामक रोग ऐन २०२० को दफा २ बमोजिम निषेध आदेश असार २३ गतेबाट असार ३१ गतेसम्म आदेश जारी गरिएको निमित्त प्रमुख जिल्ला अधिकारी रामचन्द्र ढकालले जानकारी दिनुभयो । यसअघि जिल्लामा जारी रहेको निषेध आदेश असार २२ गते राति १२ बजे सकिएको छ ।

लमजुङ प्रतिनिधि दलबहादुर मजाकोटीका अनुसार जिल्लामा जारी रहेको निषेध आदेश केही खुकुलो गरी अवधि थप गरिएको छ । जिल्ला प्रशासन कार्यालय लमजुङले असार २३ गते सूचना प्रकाशन गर्दै निषेध आदेश असार २४ गतेबाट असार ३१ गतेसम्म थप गरिएको जानकारी दिएको छ । 

एक वर्षअघि

स्वास्थ्य तथा जनसङ्ख्या मन्त्रालयले ०७७ असार २३ गतेसम्म १६ हजार १ सय ६८ जनामा कोभिड-१९ पुष्टि भएको जनाएको थियो ।

कोरोना भाइरसको सङ्क्रमणसम्बन्धी दैनिक अपडेट (२०७७ असार २३ गते)

अनलाइन डेस्क