कोभिड–१९ को सङ्क्रमणसम्बन्धी दैनिक अपडेट (असार १८ गते)

असार १८ गते १ हजार ३ सय ९१ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ४२ हजार ५३ पुगेको स्वास्थ्य तथा जनसङ्ख्या मन्त्रालयले जनाएको छ । असार १८ गते परीक्षण गरिएकामध्ये २१ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९.१ प्रतिशतमा सङ्क्रमण पुष्टि भएको छ । असार १८ गते २० वर्ष मुनिका १ सय ५८ जनामा कोभिड सङ्क्रमणको पुष्टि भएको छ । गत २४ घण्टामा ६ हजार ५ सय ६६ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ६ लाख ३ हजार ६ सय जना निको भएका छन् । असार १८ गते ३ हजार ४ सय ५१ जना निको भएका छन् भने निको हुनेको दर ९४ प्रतिशत रहेको मन्त्रालयले जनाएको छ । असार १८ गतेसम्म ९ हजार १ सय ७९ जना कोभिड सङ्क्रमितको मृत्यु भएको मन्त्रालयले जनाएको छ । असार १८ गते ३४ जना सङ्क्रमितको मृत्यु भएको मन्त्रालयले जनाएको छ । आइसोलेशनमा पुष्टि भएका केसहरूको सङ्ख्या भनी सङ्क्रमितको सङ्ख्या २९ हजार ३ सय ८ देखाइएको छ । कोभिड १९ विरुद्धको दुवै मात्रा खोप लगाउनेको सङ्ख्या ७ लाख ५७ हजार ६ सय ३५ रहेको मन्त्रालयले जनाएको छ ।

Corona Infographics 2078-03-18

coviddata20210702daily

धनकुटा प्रतिनिधि ईश्वर थापाका अनुसार जिल्लामा जारी निषेध आदेशको समय असार २५ गते सम्मका लागि थप गरिएको छ । जिल्ला कोभिड सङ्कट व्यवस्थापन केन्द्रको असार १८ गतेको बैठकले केही खुकुलो गरी निषेध आदेशको समय थप गर्ने निर्णय गरिएको प्रमुख जिल्ला अधिकारी कृष्णराज पन्तले बताउनु भएको छ । निषेध आदेशको समयमा स्वास्थ्य मापदण्ड पुरा गरेर खाद्यान्न र मासु पसल बिहान ६ बजेदेखि ६ बजेसम्म, फलफूल, तरकारी पसल बिहान ६ बजेदेखि ६ बजेसम्म र पुस्तक तथा कृषि सामग्रीका पसल बिहान ७ बजेदेखि दिउँसो ४ बजेसम्म सञ्चालन अनुमति हुने गरी जिल्ला प्रशासन कार्यालयले जनाएको छ ।

गोरखा प्रतिनिधि हरिराम उप्रेतीका अनुसार जिल्लामा निषेध आदेशको अवधि १० दिन थप गरिएको छ । जिल्ला कोभिड-१९ सङ्कट व्यवस्थापन केन्द्रको असार १८ गते बसेको बैठकको सिफारिसमा प्रमुख जिल्ला अधिकारी शालिग्राम शर्मा पौडेलले असार १९ गतेदेखि असार २९ गते राति १२ बजेसम्म निषेध आदेश थप भएको जानकारी दिनुभएको छ । सङ्क्रमणको दर, प्रवृत्ति र मृत्यूदरको विश्लेषणको आधारमा निषेध आदेशको अवधि थप गरिएको जिल्ला प्रशासन कार्यालय गोरखाका अधिकृत हर्क रोकाले बताउनुभयो । 

एक वर्षअघि

स्वास्थ्य तथा जनसङ्ख्या मन्त्रालयले ०७७ असार १८ गतेसम्म १४ हजार ५ सय ९१ जनामा कोभिड-१९ पुष्टि भएको जनाएको थियो ।

कोरोना भाइरसको सङ्क्रमणसम्बन्धी दैनिक अपडेट (२०७७ असार १८ गते)


अनलाइन डेस्क