समाचारहरू

असार ५ गते १ हजार ६ सय ८८ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख १९ हजार ६ सय ३५ पुगेको स्वास्थ्य तथा जनसङ्ख्या मन्त्रालयले जनाएको छ । असार ५ गते परीक्षण गरिएकामध्ये २४ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १९ प्रतिशतमा सङ्क्रमण पुष्टि भएको छ । असार ५ गते १९ वर्ष मुनिका १ सय ८७ जनामा कोभिड सङ्क्रमणको पुष्टि भएको छ । गत २४ घण्टामा ७ हजार १० ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ५ लाख ५३ हजार ३ सय ४२ जना निको भएका छन् । असार ५ गते ३ हजार ६ सय ६० जना निको भएका छन् भने निको हुनेको दर ८९.३ प्रतिशत रहेको मन्त्रालयले जनाएको छ । असार ५ गतेसम्म ८ हजार ६ सय ७५ जना कोभिड सङ्क्रमितको मृत्यु भएको मन्त्रालयले जनाएको छ । असार ५ गते ३४ जनाको मृत्यु भएको मन्त्रालयले जनाएको छ । आइसोलेशनमा पुष्टि भएका केसहरूको सङ्ख्या भनी सङ्क्रमितको सङ्ख्या ५७ हजार ६ सय १८ देखाइएको छ ।

मोरङ, सुनसरी, झापा, धनुषा, पर्सा, महोत्तरी, बारा, सप्तरी, सिरहा, काठमाडौँ, ललितपुर, भक्तपुर, चितवन, काभ्रेपलाञ्चोक, मकवानपुर, धादिङ, सिन्धुपाल्चोक, सिन्धुली, नुवाकोट, दोलखा, रामेछाप, कास्की, गोरखा, नवलपरासी पूर्व, तनहुँ, बागलुङ, दाङ, बाँके, रुपन्देही, पाल्पा, बर्दिया, कपिलवस्तु, नवलपरासी पश्चिम, रोल्पा, सुर्खेत, दैलेख, डडेल्धुरा, कैलाली, कञ्चनपुर, बैतडी, डोटी र अछाममा सक्रिय सङ्क्रमित ५ सयभन्दा बढी रहेका छन् ।

चितवन प्रतिनिधि दिपेन्द्र अधिकारीका अनुसार निषेधाज्ञा लगत्तै बन्द भएको भरतपुर अस्पतालको ओपिडी सेवा असार ६ गतेबाट पुनः सञ्चालनमा ल्याउने निर्णय गरिएको छ । कोभिड–१९ सङ्क्रमितको उपचारका लागि भन्दै अस्पतालले ओपिडी सेवा वैशाख १७ गतेबाट बन्द गरेको थियो । हाल कोभिड–१९ सङ्क्रमितको सङ्ख्या घटेर अवस्था सामान्यतर्फ उन्मुख भएको भन्दै अस्पतालले ओपिडी सेवा दिने निर्णय गरेको भरतपुर अस्पतालका प्रमुख मेडिकल सुपरिटेण्डेण्ट डाक्टर रोशन न्यौपानेले बताउनु भयो । यसअघि सामान्य अवस्थामा दैनिक १ हजार २ सय जनासम्मले ओपिडी सेवा लिने गरेका थिए ।

एक वर्षअघि

स्वास्थ्य तथा जनसङ्ख्या मन्त्रालयले ०७७ असार ५ गतेसम्म ८ हजार २ सय ७४ जनामा कोभिड-१९ पुष्टि भएको जनाएको थियो ।

कोरोना भाइरसको सङ्क्रमणसम्बन्धी दैनिक अपडेट (२०७७ असार ५ गते)

अनलाइन डेस्क