समाचारहरू

जेठ २९ गते २ हजार ३ सय ८२ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ६ लाख ६ हजार ७ सय ७८ पुगेको स्वास्थ्य तथा जनसङ्ख्या मन्त्रालयले जनाएको छ । जेठ २९ गते परीक्षण गरिएकामध्ये २८ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १८.९ प्रतिशतमा सङ्क्रमण पुष्टि भएको छ । जेठ २९ गते १९ वर्ष मुनिका ३ सय १३ जनामा कोभिड सङ्क्रमणको पुष्टि भएको छ । गत २४ घण्टामा ८ हजार ५ सय ६ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ५ लाख २७ हजार १ सय ११ जना निको भएका छन् । जेठ २९ गते ६ हजार २ सय ९५ जना निको भएका छन् भने निको हुनेको दर ८६.९ प्रतिशत रहेको मन्त्रालयले जनाएको छ । जेठ २९ गतेसम्म ८ हजार ३ सय ६६ जना कोभिड सङ्क्रमितको मृत्यु भएको मन्त्रालयले जनाएको छ । जेठ २९ गते ६१ जनाको मृत्यु भएको मन्त्रालयले जनाएको छ । आइसोलेशनमा पुष्टि भएका केसहरूको सङ्ख्या भनी सङ्क्रमितको सङ्ख्या ७१ हजार ३ सय १ देखाइएको छ ।

मोरङ, सुनसरी, झापा, रौतहट, धनुषा, पर्सा, महोत्तरी, बारा, सप्तरी, सिरहा, सर्लाही, काठमाडौँ, ललितपुर, भक्तपुर, चितवन, काभ्रेपलाञ्चोक, मकवानपुर, धादिङ, सिन्धुपाल्चोक, सिन्धुली, नुवाकोट, दोलखा, रामेछाप, कास्की, गोरखा, नवलपरासी पूर्व, तनहुँ, लमजुङ, दाङ, बाँके, रुपन्देही, पाल्पा, बर्दिया, कपिलवस्तु, गुल्मी, नवलपरासी पश्चिम, रोल्पा, सुर्खेत, दैलेख, डडेल्धुरा, कैलाली, कञ्चनपुर, बैतडी, डोटी र अछाममा सक्रिय सङ्क्रमित ५ सयभन्दा बढी रहेका छन् । गृह मन्त्रालयका अनुसार जेठ २९ गते बिहानसम्म ७५ जिल्लामा पूर्ण तथा आंशिक निषेध आदेश जारी गरिएको छ ।

रोल्पा प्रतिनिधि तिलक घर्ती मगरका अनुसार रोल्पा अस्पतालमा भवन अभाव हुँदा कोभिड सङ्क्रमितहरूलाई उपचारमा समस्या भएको छ । कोभिड सङ्क्रमितहरूलाई छाप्रो मुनि बेड  थपेर उपचार भइरहेको छ । जम्मा १५ शैयाको अस्पतालमा अहिले थप गरेर ५७ वटा बेडको व्यवस्थापन गरिएको छ । जसमध्ये २४ ओटा आइसोलेशनका लागि छुट्याइएको छ भने बाँकी शैयामा अन्य बिरामीहरू राखिएको रोल्पा अस्पतालका डाक्टर प्रकाशबहादुर बुढाले बताउनु भयो । अस्पताललाई ५० शैयामा स्तरोन्ती गर्न दुई वर्ष अघि नै भवन निर्माण सुरु गरिएको भएपनि समयमै भवन नबन्दा महामारीको अवस्थामा अस्पतालको सेवा प्रवाहमा समस्या भएको छ । केही दिन अघि अक्सिजन, एन्टिजेन लगायतका स्वास्थ्य सामग्री अभाव भएता पनि  अहिले उक्त समस्या नरहेको डाक्टर बुढाले बताउनु भयो ।

जुम्ला प्रतिनिधि मानदत्त रावलका अनुसार चन्दननाथ नगरपालिका–७ स्थित  सदरमुकाम खलङ्गा बजारसँग जोडिएको मिचा गाउँमा कोरोना सङ्क्रमण बढेपछि सील गरिएको छ । जिल्ला सुरक्षा समितिको जेठ २९ गतेको बैठकले जेठ २८ गते साँझदेखि गाउँमा व्यक्तिको आवत–जावतमा रोक लगाएको प्रमुख जिल्ला अधिकारी भुपेन्द्र थापाले बताउनु भयो । चन्दननाथ नगरपालिकाका स्वास्थ्य शाखाका जनस्वास्थ्य निरीक्षक क्षेत्रबहादुर महतका अनुसार मिचा गाउँमा १९ जना र महत गाउँमा ६ जना  सङ्क्रमित छन् ।

हुम्ला प्रतिनिधि नन्द सिंहका अनुसार संस्थागत आइसोलेशनमा बसेका सङ्क्रमितहरूले आफूहरूलाई कुनै पनि राम्रो सुविधा नदिइएको गुनासो गरेका छन् । खार्पुनाथ गाउँपालिकाका एक सङ्क्रमितका अनुसार राम्रोसँग खाना नपाइएको, पानी दिने मान्छे पनि नहुने, घाम ताप्न समेत नपाइने लगायतका समस्या भएपछि आफ्नो स्वास्थ्य झन जटिल भएको दुःखेसो पोख्नु भयो । यसैगरी, खाने कुरा किनेर दिनु भनेर आग्रह गर्दा पनि हेपाहा दृष्टिकोणले हेर्ने गरेको खार्पुनाथ गाउँपालिका–४ को नल्ल आइसोलेशनमा बसेका एक ज्येष्ठ नागरिकको भनाइ छ । आइसोलेशनमा गाँस, बास, कपास र उपचारको कमी नभएको साथै स्वास्थ्यकर्मीको पर्याप्त व्यवस्था गरेको खार्पुनाथ गाउँपालिकाका स्वास्थ्य संयोजक बलिराज शाहीले बताउनु भयो ।

एक वर्षअघि

स्वास्थ्य तथा जनसङ्ख्या मन्त्रालयले ०७७ जेठ २९ गतेसम्म ४ हजार ६ सय १४ जनामा कोभिड-१९ पुष्टि भएको जनाएको थियो ।

कोरोना भाइरसको सङ्क्रमणसम्बन्धी दैनिक अपडेट (२०७७ जेठ २९ गते)

अनलाइन डेस्क