समाचारहरू

जेठ २६ गते ३ हजार ४ सय ४९ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ५ लाख ९८ हजार ८ सय १३ पुगेको स्वास्थ्य तथा जनसङ्ख्या मन्त्रालयले जनाएको छ । जेठ २६ गते परीक्षण गरिएकामध्ये २९ प्रतिशतमा कोभिड पुष्टि भएको भएपनि समग्रमा परीक्षण गरिएकामध्ये १८.८ प्रतिशतमा सङ्क्रमण पुष्टि भएको छ । जेठ २६ गते १९ वर्ष मुनिका ४ सय ३ जनामा कोभिड सङ्क्रमणको पुष्टि भएको छ । गत २४ घण्टामा १२ हजार ४७ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये ५ लाख १० हजार २ सय ९८ जना निको भएका छन् । जेठ २६ गते ५ हजार ७ सय ६८ जना निको भएका छन् भने निको हुनेको दर ८५.२ प्रतिशत रहेको मन्त्रालयले जनाएको छ । जेठ २६ गतेसम्म ८ हजार १ सय ७९ जना कोभिड सङ्क्रमितको मृत्यु भएको मन्त्रालयले जनाएको छ । जेठ २६ गते ८१ जनाको मृत्यु भएको मन्त्रालयले जनाएको छ । आइसोलेशनमा पुष्टि भएका केसहरूको सङ्ख्या भनी सङ्क्रमितको सङ्ख्या ८० हजार ३ सय ३६ देखाइएको छ ।

मोरङ, सुनसरी, झापा, रौतहट, धनुषा, पर्सा, महोत्तरी, बारा, सप्तरी, सिरहा, सर्लाही, काठमाडौँ, ललितपुर, भक्तपुर, चितवन, काभ्रेपलाञ्चोक, मकवानपुर, धादिङ, नुवाकोट, सिन्धुपाल्चोक, सिन्धुली, रामेछाप, दोलखा, कास्की, नवलपरासी पूर्व, गोरखा, तनहुँ, स्याङ्जा, लमजुङ, दाङ, बाँके, रुपन्देही, पाल्पा, बर्दिया, कपिलवस्तु, गुल्मी, नवलपरासी पश्चिम, रोल्पा, सुर्खेत, दैलेख, डडेल्धुरा, कैलाली, कञ्चनपुर, बैतडी, डोटी र अछाममा सक्रिय सङ्क्रमित ५ सयभन्दा बढी रहेका छन् । गृह मन्त्रालयका अनुसार जेठ २६ गते साँझसम्म ७५ जिल्लामा पूर्ण तथा आंशिक निषेध आदेश जारी गरिएको छ ।

प्रदेश १

सोलुखुम्बु प्रतिनिधि भोजराज कार्कीका अनुसार जिल्लामा कोभिड–१९ को जोखिम न्यूनीकरणका लागि जारी रहेको निषेध आदेशको समय थप गरिएको छ । जेठ ३१ गतेसम्मका लागि निषेध आदेश थप गरिएको सहायक प्रमुख जिल्ला अधिकारी उर्मिला खतिवडाले बताउनु भएको छ । सोलुखुम्बुमा वैशाख २६ गतेदेखि प्रशासनले निषेध आदेश जारी गर्दै आएको छ ।

सुनसरी प्रतिनिधि जयकृष्ण यादवका अनुसार इनरूवा नगरपालिका–२ गते ६२ वर्षदेखि ६५ वर्ष उमेर समूहका लागि सञ्चालन गरेको कोभिड–१९ विरूद्धको खोप कार्यक्रम वडा–२ मा जेठ २६ गते प्रभावित भएको छ । खोप केन्द्र तोकिएको इनरूवा अस्पतालमा खोप लगाउन माग गर्दै उमेर तोकिएका बाहेकका व्यक्तिले अवरोध गरेपछि आधा समय मात्र खोप अभियान सञ्चालन गरेको वडाध्यक्ष सुरेन्द्रप्रसाद यादवले बताउनु भएको छ । खोप लगाइरहेको अवस्थामा तोकिएको उमेर बाहेकका स्थानीयले खोप केन्द्र घेराऊ गरेपछि तीन जना नेपाल प्रहरी र ६ जना नगर प्रहरीको तैनाथीमा खोप लगाइएको वडाध्यक्ष यादवले बताउनु भयो । खोप लगाउन माग गर्दै स्थानीयले अवरोध गरेपछि ४ बजेसम्म तोकिएको खोप कार्यक्रम दिउँसो २ बजे स्थगन गरेको वडाध्यक्ष यादवको भनाइ छ । जेठ २६ गते खोप लगाउन नपाएका १८ जनालाई जेठ २७ गते खोप लगाइने भएको छ ।

धनकुटा प्रतिनिधि ईश्वर थापाका अनुसार कोभिड–१९ को जोखिम न्यूनीकरणका लागि जिल्ला प्रसाशन कार्यालयले जारी गरेको निषेध आदेशको समय थप गरिएको छ । जेठ २६ गतेदेखि असार ३ गतेसम्मका लागि निषेध आदेशको समय थप गरिएको प्रमुख जिल्ला अधिकारी बासुदेव दहालले बताउनु भएको छ । वैशाख २० गतेदेखि प्रशासनले जिल्लामा निषेध आदेश जारी गर्दै आएको छ । निषेध आदेशको समयमा दैनिक उपभोग्य वस्तुका पसल बिहान ७ देखि १० बजेसम्म सञ्चालनका लागि अनुमति हुने प्रशासनले जनाएको छ ।

सङ्खुवासभा प्रतिनिधि भविन कार्कीका अनुसार कोभिड–१९ सङ्क्रमणको जोखिम न्यूनीकरणका लागि खाँदबारी नगरपालिकाले वडा–२ मा असार ८ गतेसम्मका लागि सील गरेको छ । वडा–२ को पूर्वी बेतिनी टोल, खोरिया टोल, अरूण उपत्यका टोल र भद्रकाली टोलमा कोभिड–१९ को सङ्क्रमण रोक्नका लागि जेठ २५ गतेदेखि सील गरिएको वडाध्यक्ष ज्ञानबहादुर श्रेष्ठले बताउनु भएको छ ।

ओखलढुङ्गा प्रतिनिधि सरस्वती बानियाका अनुसार कोभिड–१९ को सङ्क्रमण तथा जोखिम निन्त्रणका लागि जारी गरिएको निषेध आदेशको समय थप गरिएको छ । जिल्ला कोभिड–१९ सङ्कट व्यवस्थापन केन्द्रको जेठ २६ गतेको बैठकले निषेध आदेशको समय जेठ मसान्तसम्मका लागि थप गरिएको हो । जिल्लामा कोभिड–१९ को जोखिम कायमै रहेकाले निषेध आदेशको समय थप गरिएको प्रमुख जिल्ला अधिकारी बन्दना राईले बताउनु भएको छ ।

प्रदेश २

रौतहट प्रतिनिधि कोपिला तिमल्सिनाका अनुसार जिल्लास्तरीय कोभिड–१९ सङ्कट व्यवस्थापन समितिको जेठ २६ गते बसेको बैठकले जेठ ३१ गतेसम्मका लागि निषेध आदेश थप गर्ने निर्णय गरेको छ । वैशाख १६ गतेदेखि जारी निषेध आदेशलाई निरन्तरता दिँदै बैठकले जेठ ३१ गते सम्मका लागि समयावधि थप गरेको हो । यसअघि जेठ २६ गते राति १२ बजे सम्मका लागि निषेध आदेश जारी गरिएको थियो ।

बागमती प्रदेश

रामेछाप प्रतिनिधि नवराज घिमिरेका अनुसार असार २ गतेसम्मका लागि निषेध आदेशको अवधि थप गरिएको छ । यसअघि जारी गरिएको निषेध आदेश जेठ २६ गते राति १२ बजेबाट सकिने भएपछि स्थानीय प्रशासनले असार २ गतेसम्मका लागि निषेध आदेश थपेको हो । जिल्ला सुरक्षा समितिको जेठ २५ गतेको बैठकको निर्णय अनुसार सात दिनको लागि निषेध आदेशको अवधि थपिएको प्रमुख जिल्ला अधिकारी गौलोचन सैजूले जानकारी दिनुभयो ।

दोलखा प्रतिनिधि उद्धव पोखरेलका अनुसार कोभिड सङ्क्रमितको सङ्ख्या बढेको भन्दै न्यूनीकरणका लागि गौरीशङ्कर गाउँपालिका–८ खारेलाई एक साताका लागि सील गरिएको छ । जारी निषेध आदेशका बिच गाउँपालिकामा मानिसहरूको आवातजावत बढेको र त्योसँगै गाउँपालिकाको वडा नम्बर खारेमा भने कोभिड सङ्क्रमित समेत बढेको भन्दै एक साताका लागि बढी सङ्क्रमित देखिएको वडा सील गरिएको गाउँपालिकाका अध्यक्ष स्वयम्बहादुर खड्काले बताउनु भयो । सील गरिएको अवस्थामा अत्यावश्यक काम बाहेक वडाबासीलाई घर बाहिर निस्कन पुर्ण रूपमा रोक लगाइएको गाउँपालिकाले जनाएको छ । 

एक वर्षअघि

स्वास्थ्य तथा जनसङ्ख्या मन्त्रालयले ०७७ जेठ २६ गतेसम्म ३ हजार ७ सय ६२ जनामा कोभिड-१९ पुष्टि भएको जनाएको थियो ।

कोरोना भाइरसको सङ्क्रमणसम्बन्धी दैनिक अपडेट (२०७७ जेठ २६ गते)

अनलाइन डेस्क